၃၈ - သစ္စာႏဖောက် ‘ကိုယ်ႏတောႏယေရှု’

‘ယုဒ’ လိုꩻမျိုꩻဖုံႏနောဝ်ꩻ ပွယ်ꩻတောႏပသခါယို မာꩻလွေꩻစွုမ်ႏနေင်ႏနေင်ႏနောဝ်ꩻသွူ။ ကမာꩻဗာႏပွယ်ꩻယို အဓိပ္ပါယ်ႏနဝ်ꩻ ဝွေꩻသီးဖုံႏမွိုးဖြားဖာဖြားသီးယို ကထွူထိုꩻလဲဉ်းဒျာႏနေင်ႏပေါင်ꩻရျာꩻစုꩻအကို ‘အီဂျစ်’ အသွဉ်း အသယ်ႏဘဝဖေႏကလွစ်ထန်ႏကကူႏညီႏဖေႏဒါႏဘုရာꩻသျင်ꩻယို ထွာဂွုဏ်ႏပျုလေွꩻနဝ်ꩻသွူ။ ‘ကိုယ်ႏတောႏယေရှု’ နဝ်ꩻ လိုꩻအမျာꩻဖဲ့ꩻငါယိုဒေါ့ꩻဟောꩻသွဉ်သင်စခန်းဝွေꩻတပဲ့ꩻတောႏဖုံႏတဲင် ထင်ႏရှာꩻလွဉ်သွူတွော့ꩻ ကထွိုင်ႏညလွဉ် သွံနေင်ႏအချိန်ႏရပ်တွင်ꩻ ‘ယေရုရှလင်’ ကို တွမ်ႏဝွေꩻတပဲ့ꩻဖုံႏ မဲဉ်မာꩻငီꩻပသခါ ပွယ်ꩻတောႏအကျောင်ꩻတွမ်ႏ ပွယ်ꩻ ယို ဝွေꩻအီႏခံႏဗာႏဝင်ꩻမာꩻသီယို မိန်းရီးခန်းဒျာႏနဝ်ꩻသွူ။

‘ကိုယ်ႏတောႏယေရှု’ နဝ်ꩻ ‘ယုဒ’ ကဟဲ့ꩻဒါႏတပဲ့ꩻတောႏတဖြာꩻအဝ်ႏနဝ်ꩻသွူ။ ‘ယုဒ’ နဝ်ꩻကောက်ခံႏကလꩻ ဒါႏရွဉ်လူꩻယို တဆင်ႏဆင်ႏ ရွဉ်အိတ်နဝ်ꩻအကိုရွဉ်ဖုံႏယိုသွုံꩻစွယ်ꩻတခွန်ꩻတဲ့ꩻအဝ်ႏနောဝ်ꩻသွူ။ ‘ကိုယ်ႏတောႏယေရှု’ တွမ်ႏ လွိုက်ꩻဝွေꩻဆချာသားဖုံႏနဝ်ꩻ ကထွိုင်ႏတွိုႏ ‘ယေရုရှလင်’ ဝေင်ꩻကိုအချိန်ႏတွင်ꩻ ‘ယုဒ’ နဝ်ꩻလွေꩻခွဲခန်း ‘ယုဒ’ လိုꩻမျိုꩻအွဉ်ငါသားဖုံႏနဝ်ꩻသွူ။ နဝ်ꩻဆချာဝွေꩻနဝ်ꩻ ဒေါ့ꩻနယ်ခန်း ‘ကိုယ်ႏတောႏယေရှု’ ပွုံႏစံႏသဏ္ဍာန်ႏတဲင် ဝွေꩻသီး အလောင်းယိုကွီသွူရွဉ်ခံꩻတွော့ꩻ အီဖောက်သစ္စာႏကျံႏစဲႏခန်းဒျာႏနဝ်ꩻသွူ။ နောဝ်ꩻတွော့ꩻ ‘ယုဒ’ အွဉ်ငါသားဖုံႏနဝ်ꩻ ‘ကိုယ်ႏတောႏယေရှု’ ယို ‘မေရှိယ’ ဒျာႏတလက္ခံႏတဝ်းတွော့ꩻ မဲဉ်မာꩻသီလွဝင်ꩻအကျောင်ꩻယိုလဲ့ꩻ သေဗာႏနဝ်ꩻသွူ။

သာႏသနာႏရေꩻဆဲင်ႏရာꩻ မဟာနာယကအွဉ်ငါဒါႏ ‘ယုဒ’ အွဉ်ငါသားဖုံႏနဝ်ꩻ ‘ကိုယ်ႏတောႏယေရှု’ ယို ဖေႏ ကသော့ꩻဖေႏဝွေꩻသီးစူကိုထွဉ်ႏသွူနုဲင်းနောဝ်ꩻတဲင် ဖေႏသွူ ‘ယုဒ’ ရွဉ်သင်္ကာႏသွံဆီတွော့ꩻထွဉ်ႏသစ္စာႏဖောက်ခန်း နဝ်ꩻသွူ။ အကျောင်ꩻခရာႏဖုံႏယို နဝ်ꩻ နိမိတ်ထွားဟော်ꩻပညာႏအဝ်ႏသားဒေါ့ꩻအတွိုင်ႏထွာကုဲင်လွဉ်နဝ်ꩻသွူ။ ‘ယုဒ’ အီဖောက်သစ္စာႏယိုသꩻဘောႏတူႏသွူတဲင်ထူႏသွူရွဉ်ဖုံႏတွော့ꩻထန်ႏထိုꩻခန်းဒျာႏအွိုးအညာꩻနဝ်ꩻသွူ။ နောဝ်ꩻဆချာ ‘ကိုယ်ႏတောႏယေရှု’ ယို ‘ယုဒ’ လိုꩻမျိုꩻဖုံႏဆွမ်ꩻခွင်ꩻဖေႏကလꩻအတာႏ စကျံႏစဲႏခန်းတဖူꩻအနယ်ႏနဝ်ꩻသွူ။

‘ကိုယ်ႏတောႏယေရှု’ နဝ်ꩻ ‘ယေရုရှလင်’ ကို တွမ်ႏဝွေꩻတပဲ့ꩻတောႏဖုံႏမာꩻခန်းပွယ်ꩻတောႏပသခါ နဝ်ꩻသွူ။ အံႏသွုံꩻပသခါအချိန်ႏ ‘ကိုယ်ႏတောႏယေရှု’ နဝ်ꩻ ထူႏသွူတခိုးပေါင်မုန့်ယဟန်ႏတဲင် ဗဲင်ႏတ ခဝ်သွူတွော့ꩻ “ထူႏအံႏ သွုံꩻတခိုးယိုဟုဲင်း။ တခိုးယိုနဝ်ꩻ ထွာခွေနမ်းခန္ဓာႏတဲင်ခွေနဝ်ꩻအီဖေႏသီဖုံႏတခိုးယိုသွူ။ သီဖုံႏဖေႏကယူႏလꩻတ သေႏခွေအတာႏ မာꩻသွော့ꩻနုဲင်းယိုဟုဲင်း” မိန်းခန်းနုဲင်းနဝ်ꩻသွူ။ တွမ်ႏအနယ်ꩻယိုတဲင် ‘ကိုယ်ႏတောႏယေရှု’ နဝ်ꩻ ဝွေꩻအသက်တွမ်ႏဝွေꩻနမ်းခန္ဓာႏယို ဝွေꩻသီးအတွက် စွဉ်ꩻလူꩻလွေꩻဒျာႏ အကျောင်ꩻယို မိန်းခန်းဒျာႏနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻခွုင်သွူဝိုင်ဘောက်ꩻတဘောက်တဲင် “သွုံꩻအွလွသွော့ꩻစပျစ်ထီယို ဟုဲင်း။ စပျစ်ထီယိုနဝ်ꩻ ပဋိညာဉ်တသာအတွက်ထွာခွေသွီႏနဝ်ꩻသွူ။ ကွပ်ခွေသွီႏတဲင် သီဖုံႏထာꩻတဟဝ်တဝ်း ဒုစရိုက်ဖုံႏနဝ်ꩻ မဲ့ꩻဘုရာꩻသျင်ꩻခွင်ꩻလွစ်ဖေႏဒျာႏနဝ်ꩻသွူ။ ယိုခါခွေကမာꩻဒါႏအတွိုင်ꩻမာꩻလွဉ်ꩻလွသွူတဲင် သွုံꩻအွတွိုင်ꩻစပျစ်ထီယိုဖေႏကယူႏလꩻလွသွော့ꩻခွေ” မိန်းခန်းနုဲင်းနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻ ဝွေꩻတပဲ့ꩻဖုံႏယို “သီဖုံႏအကိုလိုꩻတဖြာꩻဖြာꩻနဝ်ꩻ မဲ့ꩻသစ္စာႏအီႏဖောက် ခွေ” မိဉ်မိန်းနုဲင်းနဝ်ꩻ နဝ်ꩻ ဝွေꩻတပဲ့ꩻတောႏဖုံႏ အီႏအံႏဩသꩻဝꩻလွတဲင် ထာꩻမာꩻနုဲင်းယို နဝ်ꩻတမုဲင်ꩻအီႏမာꩻဟောင်း ဒေါ့ꩻလွခန်းဝင်ꩻနုဲင်းနဝ်ꩻသွူ။ ‘ကိုယ်ႏတောႏယေရှု’ နောဝ်ꩻ “ခွေပေါင်မုန့်ယို ကဖေႏဒါႏလိုꩻနဝ်ꩻထွာ သစ္စာႏဖောက်” မိန်းခန်းနုဲင်းနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ ပေါင်မုန့်ယို ဖေႏခန်း ‘ယုဒ’ နဝ်ꩻသွူ။

‘ယုဒ’ ထူႏတခိုးပေါင်မုန့်ကထွိုင်ႏထွူအချိန်ႏတွင်ꩻ ‘စာတန်’ မာရ်ႏနတ်နဝ်ꩻလဲ့ꩻ နွို့ꩻသော့ꩻခန်းဝွေꩻနမ်းကို နဝ်ꩻသွူ။ နဝ်ꩻဆချာ ‘ယုဒ’ နဝ်ꩻထန်ႏထိုꩻသွူတဲင် ဖေႏကဆွမ်ꩻနွောင်ꩻ ‘ကိုယ်ႏတောႏယေရှု’ ယို ‘ယုဒ’ လိုꩻမျိုꩻအွဉ် ငါသားဖုံႏနဝ်ꩻလွဉ်ကူႏညီႏခန်းဒျာႏနဝ်ꩻသွူ။ နဝ်ꩻအချိန်ႏနဝ်ꩻ ထာꩻလွိုက်ꩻလဲဉ်းနဝ်ꩻသွူ။

အံႏအွကထွိုင်ႏထွူအချိန်ႏတွော့ꩻ ‘ကိုယ်ႏတောႏယေရှု’ တွမ်ႏ ဝွေꩻတပဲ့ꩻဖုံႏနောဝ်ꩻထင်ႏလွေꩻခန်း ‘သံလွင်’ ကောင်လောင်းနဝ်ꩻသွူ။ ‘ကိုယ်ႏတောႏယေရှု’ နောဝ်ꩻ “ဟန်ႏဟာယို သီဖုံႏနဝ်ꩻအီႏစွဉ်ꩻပယ်ႏထိုꩻသွူခွေတဲင် အ ကျောင်ꩻခရာႏဖုံႏယိုနဝ်ꩻ အွိုးကရီးခါကာႏ ထွာတဲမ်းခါꩻဒျာႏနဝ်ꩻသွူ။ ‘ကွပ် ဗဲ့ꩻ တီသားတွဲႏတဲင် မဲ့ꩻ ဗဲ့ꩻဖုံႏ ဖြတ်ꩻလီ ပြုဲင်ပြင်ꩻထိုꩻဒျာႏ’ မိန်းခန်းနုဲင်းနဝ်ꩻသွူ။

‘ပေတရု’ နဝ်ꩻ “လိုꩻအလင်ꩻဖုံႏအွဉ်ႏကုဲင်ခါ နီဗွေႏတဲ့ꩻ တပဲ့ꩻတောႏခွေသွဉ်းနဝ်ꩻ အီႏအွဉ်ႏကုဲင်ခါꩻ တမွေး တဝ်း” သျောက်ပြန်ႏခါꩻခန်းနုဲင်းနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ ရိုꩻ ‘ပေတရု’ “စာတန် နဝ်ꩻ မဲဉ်လꩻ သီဖုံႏအလို့ꩻနဝ်ꩻသွူ။ ကွဲတွော့ꩻခွေနဝ်ꩻ အီႏဆုတောင်ꩻဖေႏ သီဖုံႏအတွက်တဲင်သီဖုံႏထာꩻယွုမ်းအံႏမုꩻယို တထဲ့ꩻသွုမ်ꩻ ထိုꩻတဝ်းသွူ။ ကွဲတွော့ꩻ ဟန်ႏဟာယို ကလားကဟွိုန်ဆျာကဦႏထာꩻအချိန်ႏတွင်ꩻနဝ်ꩻကာႏ နာꩻနဝ်ꩻခွေယို တသေ အဝ်ႏတဝ်းယို မဲ့ꩻအီႏညင်ထွူလဲဉ်းသွံလဲင်ႏ” မိန်းခန်းနုဲင်းနဝ်ꩻသွူ။

နဝ်ꩻဆချာ ‘ပေတရု’ နဝ်ꩻ သျောက်ပြန်ႏခန်း ‘ကိုယ်ႏတောႏယေရှု’ “တပဲ့ꩻတောႏအီႏသီဗာႏရိုꩻစွဉ်ႏလဲ့ꩻ ကိုယ်ႏတောႏယို အီႏညင်ꩻလွို ဆန်ꩻတမွေးတဝ်း သျောက်ဒင်ႏချာခန်းနုဲင်းနဝ်ꩻ။ တပဲ့ꩻတောႏအ လင်ဖုံႏနဝ်ꩻလဲ့ꩻ ဒေါ့ꩻလွခန်းနုဲင်းနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻ ဝွေꩻတပဲ့ꩻတောႏဖုံႏယို ဟဲ့ꩻလွေꩻခန်း ‘ဂေသရှေမန်’ အရပ်တဲင် သꩻ မဲဉ်မာꩻအပဲစ်ဖေႏကအွဉ်ႏမွိုန်းအတာႏ ထွဉ်ႏဆုꩻတောင်ꩻခန်းဒျာႏနဝ်ꩻသွူ။ နဝ်ဆချာ ‘ကိုယ်ႏတောႏယေရှု’ နောဝ်ꩻ အီႏဆုတောင်ꩻဘုရာꩻသျင်ꩻတဖြာꩻဝွေꩻတဲင် ထန်ႏလွေꩻခန်းဒျာႏနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻ “ဖာဘုရာꩻ ဒုက္ခဝေဒနာႏဗောက်ꩻယို မဉ်ႏထွာနွောင်ꩻနဝ်ꩻ တွမ်ႏဖေႏ အွမွိုန်ႏပိုခိုတောႏမွိုင်။ ကွဲတွော့ꩻ အီႏခွင်ꩻလွတ်ဖေႏလိုꩻဖုံႏအပဲစ်ဖုံႏယို အနယ်အလင်မဉ်ႏတအဝ်ႏတဝ်းတဲ့ꩻ ဖာဘု ရာꩻအလွိုႏဆန္ဒအတွိုင်ꩻဖေႏကထွာဗာႏ” ဆုꩻတောင်ꩻခန်းသွံလဲင်ႏနဝ်ꩻသွူ။ ‘ကိုယ်ႏတောႏယေရှု’ နဝ်ꩻ သꩻသောက တွိုႏထွာမွေးငါႏတဲင်ဝွေꩻတသိုꩻစက်ꩻဖုံႏနဝ်ꩻ ဗွိုန်နုဲင်းသွီႏ စက်ꩻရီႏလင်ခန်းဒျာႏနဝ်ꩻသွူ။ ဘုရာꩻသျင်ꩻနဝ်ꩻ ဖေႏကဒေါ့ꩻ သရေꩻဖေႏ ‘ကိုယ်ႏတောႏယေရှု’ ယိုအတာႏအွဉ်ႏလွစ်လွေꩻခန်းဒျာႏတနံ ဗျဟ္မာႏဖုံႏနဝ်ꩻသွူ။

ဆုꩻတောင်ꩻထွူအလဲင်ႏတွိုင်ꩻ ‘ကိုယ်ႏတောႏယေရှု’ နဝ်ꩻ လွေꩻတချာခွုမ်ꩻခန်း ဝွေꩻတပဲ့ꩻဖုံႏထျꩻနဝ်ꩻသွူ။ ကွဲတွော့ꩻ ဝွေꩻတပဲ့ꩻတောႏဖုံႏနဝ်ꩻ ဗေင်ႏအွီႏလွဒျာႏထာꩻဖုံႏနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ “ထွိုင်ႏလွ ခန်းလုဲင်ႏ ခွေသစ္စာႏဖောက်တွိုႏလွဉ်လဲဉ်းခင်ႏလမ်းယိုကို” မိန်းဟွိုန်ခန်းနုဲင်းနဝ်ꩻသွူ။

‘ယုဒ’ နဝ်ꩻ ‘ကိုယ်ႏတောႏယေရှု’ ထျꩻယို ‘ယုဒ’ လိုꩻမျိုꩻအွဉ်ငါသားဖုံႏ၊ စဲ့ꩻသားဖုံႏမꩻအလင် ဟဲ့ꩻလွေꩻခန်း လိုꩻစွိုꩻအာဖုံႏနဝ်ꩻသွူ။ ဝွေꩻသီးဖုံႏနဝ်ꩻ ခွိုန်လွေꩻခန်း နꩻဖုံႏတွမ်ႏ ခွဉ်းတွုတ်ဖုံႏနဝ်ꩻသွူ။ ‘ယုဒ’ နဝ်ꩻ လွဉ်သွူ ‘ကိုယ်ႏ တောႏယေရှု’ ထျꩻတဲင် “မင်္ဂလာႏဒျာႏဆရာႏ” ဒေါ့ꩻသွူနုဲင်းနဝ်ꩻတဲင်နွို့ခန်းဒျာႏနဝ်ꩻသွူ။ ဝွေꩻကမာꩻဗာႏနုဲင်းယိုနဝ်ꩻ ‘ယုဒ’ လိုꩻမျိုꩻအွဉ်ငါသားဖုံႏ သီဖုံႏကအီႏဆွမ်ꩻဗာႏလိုꩻနဝ်ꩻ ထွာလိုꩻယိုအကျောင်ꩻ ထွာဖေႏအချက်နဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ “ယုဒ၊ နွို့နယ်သွူခွေတွော့ꩻ သစ္စာႏဖောက်ထာꩻနဲ့ꩻ” ရီလဝ်းခန်းနုဲင်းနဝ်ꩻသွူ။

စဲ့ꩻသားဖုံႏကထွိုင်ႏနွို့ꩻဆွမ်ꩻ ‘ကိုယ်ႏတောႏယေရှု’ အချိန်ႏယို ‘ပေတရု’ နဝ်ꩻ ထေသွူနꩻတဲင် သာႏသနာႏ ရေꩻဆဲင်ႏရာꩻမဟာႏနာႏယကတဖြာꩻထျꩻအမုꩻကထမ်ႏဒါႏအသွဉ်းအသယ်ႏတဖြာꩻနားလာႏယို ဖဲ့ꩻခန်းဒျာႏတွမ်ႏနꩻ နဝ်ꩻသွူ။ ကွဲတွော့ꩻ ‘ကိုယ်ႏတောႏယေရှု’ နဝ်ꩻ “ပေတရု ချꩻခါꩻနာꩻနꩻနဝ်ꩻဟုဲင်း။ ဖေႏကကာႏကွယ်ႏဖေႏခွေအတွက် ခွေဖာအထျꩻစဲ့ꩻတပ်တတပ်ဝွေႏကအဝ်ႏဒါႏ တနံဗျဟ္မာႏယိုမဉ်ႏကွီလꩻဒျာႏနဝ်ꩻသွူ။ ကွဲတွော့ꩻခွေနဝ်ꩻ ထွာနာႏခံႏဗာႏ ခွေဖာဘုရာꩻသီးငဝ်း” မိန်းဟွိုန်ခန်းနုဲင်းနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ အဝ်ႏကုꩻဖေႏလိုꩻနဝ်ꩻနား လာႏအချိန်ႏတွင်ꩻ တပဲ့ꩻတောႏကားကအဝ်ႏဖုံႏနဝ်ꩻ ဖင်းထန်ႏထိုꩻလွခန်းအွိုးအညာꩻဖုံႏ နဝ်ꩻသွူ။

သျင်ႏမဿဲခရစ်နွို့ꩻ ၂၆:၁၄-၅၆; မာကုခရစ်နွို့ꩻ ၁၄:၁၀-၅၀; သျင်ႏလုကာခရ်နွို့ꩻ ၂၂:၁-၅၃; သျင်ႏယောဟန်ခရစ်နွို့ꩻ ၁၂:၆; ၁၈:၁-၁၁ မꩻ သမ္မာႏလိတ်ကျမ်ꩻ ငဝ်းခြုဲင်း