၁၇ - ဘုရာꩻသျင်ꩻတွမ်ႏ ဒါ၀ိဒ် အခါ်ႏငေါဝ်းကတိ

‘ရှောလု’ နဝ်ꩻ ထွာ ‘ဣစရေး’ ပထမသွတ်ꩻခွန်တဲင် လိုꩻအမျာꩻက မဲဉ်လꩻအတွိုင်ႏ နမ်းထိုလွိုးယောင်ꩻဆင်ꩻတရေꩻသွူ။ ‘ရှောလု’ ကအုပ်ချွုတ်ဒါႏ ‘ဣစရေး’ နေင်ႏအဆေ့ꩻကျာꩻ ထွာခွန်ယံရိုꩻကီလဲ့ꩻ ဆုဲင်ꩻနောဝ်ꩻတလွိုက်နာႏတဝ်းဘုရာꩻသျင်ꩻ၊ ထွာထိုꩻဒျာႏ လိုꩻသꩻတကျင်ႏတဖြာꩻသွူ။ နဝ်ꩻတွော့ꩻ ဘုရာꩻသျင်ꩻနောဝ်ꩻ လွိုက်ရွေꩻ ဖေႏခန်း ‘ရှောလု’ ခင်ႏလမ်း တနီꩻကအီႏထွာလွဉ်ဒါႏခွန် လိုꩻတဖြာꩻနဝ်ꩻသွူ။

ဘုရာꩻသျင်ꩻနဝ်ꩻ လွိုက်ရွေꩻသွူ ‘ဒါဝိဒ်’ ကဟဲ့ꩻဒါႏ ‘ဣစရေ’လိုꩻပေႏတဖြာꩻတဲင်တနီနီတချိန်ႏချိန်ႏ ‘ရှောလု’ ခွန် ဆချာ ဆုဲင်ꩻအီႏထွာခွန် စီႏဆင်ႏခန်းနုဲင်းနောဝ်ꩻသွူ။ ‘ဒါဝိဒ်’ နောဝ်ꩻ ‘ဗက်လင်’ ကို ထွာဒျာႏ ဗဲ့ꩻ တီသားတဖြာꩻတဲင် အွိုးတချိန်ႏ အဝ်ႏထွားထိန်ꩻတီဖေႏအဖာ ဗဲ့ꩻ ဖုံႏတွင် ဝွေꩻမာꩻသီဖို ကလွဉ်ရံႏဒါႏဝွေꩻ ချင်္သေ့တဗာႏတွမ်ႏ ၀က်ဝံတဗာႏနဝ်ꩻသွူ။ ‘ဒါဝိဒ်’ နဝ်ꩻ ထွာရိုꩻသာꩻစွဉ်ႏစွော့ꩻလိုꩻတဖြာꩻထွူမကာႏ၊ ယွုမ်းအံႏကိုႏကွယ်ႏဘုရာꩻသျင်ꩻလိုꩻတဖြာꩻလဲ့ထွာနဝ်ꩻသွူ။

‘ဒါဝိဒ်’ ပေႏခါနဝ်ꩻ နက်ဗာႏဖို ‘ဂေါလျတ်’ ကရိုꩻဒါႏ လိုꩻဘီလူꩻတန်တဖြာꩻနဝ်ꩻသွူ။ ‘ဂေါလျတ်’ နဝ်ꩻ ထွာစဲ့ꩻသားယံတဖြာꩻထွူ ဆွော့ꩻကတဲ့မွေးငါႏတဲင် အနမ်းနောဝ်ꩻဆွာꩻစွဉ်ႏ ကွတ်ပေႏလွိုနဝ်ꩻသွူ။ ကွဲႏတွော့ꩻ ဖေႏကကယ်ႏဒင်ႏနွိုင်ꩻ ‘ဣစရေး’ အတာႏ ‘ဒါဝိဒ်’ ကအီမာꩻသီဒါႏ ‘ဂေါလျတ်’ ယို ဘုရာꩻသျင်ꩻ ကူႏညီႏခန်းနောဝ်ꩻသွူ။ နောဝ်ꩻဆချာ ‘ဒါဝိဒ်’ ယို ‘ဣစရေး’ ရန်ႏသူႏဖုံႏအလောင်း လꩻမွေး စွဉ်ႏ အောင်ႏမျင်ႏမုꩻနဝ်ꩻသွူ။ ‘ဒါဝိဒ်’ နဝ်ꩻ ထွာလွဉ်စွဉ်ႏ စဲ့ꩻသာႏယံတဖြာꩻတဲင် အွဉ်နွောင်ꩻစွဉ်ႏ ‘ဣစရေး’ စဲ့ꩻတပ် တွိုက်ပွယ်ꩻဖုံႏ နောဝ်ꩻသွူ။ လိုꩻဖုံႏ ချီႏညော်ꩻအံႏဖြာꩻမွေး ဝွေꩻနဝ်ꩻသွူ။

လိုꩻအမျာꩻဖုံႏနဝ်ꩻ ဖစ်မွိုက်ရက်ငါႏ ‘ဒါဝိဒ်’ တဲင် ‘ရှောလုခွန်’ သꩻနာႏလွိုႏတဝ်းထွာလွဉ်စွဉ်ႏနဝ်ꩻသွူ။ အဆုဲင်ꩻတွော့ꩻ ‘ရှောလုခွန်’ ကျံႏမာꩻသီ ‘ဒါဝိဒ်’ တဲင် ဖေႏကလွစ်ခွန်တွမ်ႏ ခွန်စဲ့ꩻသားအတာႏ ဖင်းထမ်းထိုꩻခန်းဒျာႏ ကန္တာရ ထာꩻခြာတန်ကိုနဝ်ꩻသွူ။ ‘ရှောလုခွန်’ တွမ်ႏ ဝွေꩻစဲ့ꩻသားဖုံႏ ကထွုမ်ႏလွဉ်ꩻ ‘ဒါဝိဒ်’ နီꩻ ‘ရှောလုခွန်’ နဝ်ꩻ တွိုႏသော့ꩻစွဉ်ႏ ဂူႏတဖြုံႏကိုနဝ်ꩻသွူ။ ဂူႏနဝ်ꩻနဝ်ꩻ ထွာသွူ ‘ဒါဝိဒ်’ အုံနွို့သော့ꩻဂူႏတဲ့ ‘ရှောလုခွန်’ နဝ်ꩻ တထီႏတဝ်း ဝွေꩻသွူ။ ‘ဒါဝိဒ်’ နောဝ်ꩻ ဗော့ꩻကပ်ထိုꩻ ‘ရှောလုခွန်’ တွော့ꩻ ဖျက်ထူႏခန်းဒျာႏ ‘ရှောလုခွန်’ ခွမ်ꩻလာꩻစျꩻဆေ့ꩻဆေ့ꩻနဝ်ꩻသွူ။ နဝ်ꩻထွူတဲင် ‘ရှောလုခွန်’ ကထွိုင်ႏထန်ႏဂူႏကိုထွူတဲင် အွဉ်ႏနယ်သွူ ဝွေꩻကခွုမ်ခါꩻဒါႏ ခွမ်ꩻလာꩻတခဝ်တဲင် ခြောဝ်ဟဲ့ꩻခန်းနဝ်ꩻသွူ။ နေးတွမ်ႏအနယ်ယို မာꩻသီသွူ ဝွေꩻတွော့ꩻ ဖေႏကထွာခွန် ကျံႏစဲႏနုဲင်းနောဝ်ꩻတမွေး တဝ်းအကျောင်ꩻ ‘ရှောလုခွန်’ သေခန်းဒျာႏနဝ်ꩻသွူ။

အချိန်ႏကထွိုင်ႏညတွော့ꩻ တွိုက်ꩻပွယ်ꩻကို ‘ရှောလုခွန်’ သီထိုꩻ ခန်းဒျာႏတဲင် ‘ဒါဝိဒ်’ ထွာခွန်ထွူဆချာနဝ်ꩻ ဝွေꩻနဝ်ꩻ ထွာခွန်ယံတပါꩻတဲင် လိုꩻအမျာꩻဖုံႏရက်မွေးစွဉ်ႏဝွေႏနဝ်ꩻသွူ။ ဘုရာꩻသျင်ꩻနဝ်ꩻ ဖေႏခန်း ‘ဒါဝိဒ်’ ဆုဟဝ်ဖုံႏတဲင် အောင်ႏမျင်ႏမုꩻဖေႏကထွာအာ မာꩻဖေႏခန်းနဝ်ꩻသွူ။ ‘ဒါဝိဒ်’ ကတွိုက်ꩻဒါႏ တွိုက်ꩻပွယ်ꩻဖုံႏယို ဖေႏက နွိုင်ꩻ ‘ဣစရေး’ ရန်ႏသူႏဖုံႏ ဘုရာꩻသျင်ꩻအဝ်ႏကူႏညီႏဖေႏနဝ်ꩻသွူ။ ‘ဒါဝိဒ်’ နဝ်ꩻ သိမ်ꩻထိုꩻထွူ ‘ယေရုရှလင်’ ဝေင်ꩻတဲင် သတ် မတ် လုဲင်ႏဝေင်ꩻတောႏတွော့ꩻ နမ်းကိုယ်ႏတိုင်ႏအုံ အုပ်ချွုတ်နောဝ်ꩻသွူ။ ‘ဒါဝိဒ်’ ထွာခွန် ကထွိုင်ႏညနေင်ႏလစ်ဆီ တွော့ꩻ နဝ်ꩻအခိန်ႏ ‘ဣစရေး’ နဝ်ꩻ အာႏရဲင်ꩻတန်လွဉ်မရေႏမရာႏ ချံႏသာႏလွဉ်စွဉ်ႏဒျာႏနဝ်ꩻသွူ။

‘ဒါဝိဒ်’ နောဝ်ꩻ ‘ဣစရေး’လိုꩻမျိုꩻဖုံႏ ကိုႏကွယ်ႏထွူဘုရာꩻသျင်ꩻ ဖေႏကပူႏဇောႏနွောင်ꩻအီအတာႏ မဲဉ်မာꩻခါꩻဖေႏစွဉ်ႏဒျာႏ ဘုရာꩻ ကျောင်ꩻတောႏတဖြုံႏနဝ်ꩻသွူ။ လိုꩻဖုံႏနဝ်ꩻ ညစွဉ်ႏဒျာႏ နေင်ႏပေါင်ꩻလစ်ရျာꩻရပ် ‘မောရှေ’ ကမာꩻခါꩻဒါႏ ခွဲကျုံႏယွုံႏကိုယို ထွာကိုႏ ကွယ်ႏသော့ꩻဘုရာꩻသျင်ꩻ မာꩻသော့ꩻအီပူႏဇောႏမုꩻဖုံႏနဝ်ꩻသွူ။

ကွဲတွော့ꩻ ‘နာသန်’ ကဟဲ့ꩻဒါႏ နိမိတ်ထွားဟောꩻပညာႏသားတဖြာꩻအဝ်ႏသွူ။ ဝွေꩻယို ဘုရာꩻသျင်ꩻ အွဉ်ႏစွလွေꩻသွူ ‘ဒါဝိဒ်’ ထျꩻတဲင် “နာꩻနောဝ်ꩻ တွိုက်ꩻလွဉ်ဗာႏ တွိုက်ꩻပွယ်ꩻအာတဲင် တွမ်ႏမာꩻဖေး မွိုန်း ခွေကျောင်ꩻတောႏယိုဟုဲင်း၊ လွိုႏနာꩻပိုမာꩻဖေႏဒျာႏသွူ။ ကွဲႏတွော့ꩻ ခွေနဝ်ꩻ အီဖေႏနာꩻ အတန်စားထာꩻဟဝ်တဲင် နာꩻဆုဲင်ꩻချာ သားဖုံႏယိုနဝ်ꩻ ခွေလိုꩻဖုံႏယိုအလောင်း ထွာခွန်အနေႏ ထာꩻ၀ရအီႏအုပ်ချွုတ်လွေꩻဗာႏ “ထွဉ်ႏမိန်းလဝ်းခန်းနုဲင်းနဝ်ꩻသွူ။ ထာꩻ၀ရ ကအီႏအုပ်စိုꩻနွောင်ꩻဒါႏ ‘ဒါဝိဒ်ခွန်’ မျိုꩻဆက်တဖြာꩻဒျာႏကရိုꩻနဝ်ꩻ ထွာ (မေရှိယ) တဖြာꩻလွုမ်ꩻတဲင် ‘မေရှိယ’ ကရိုꩻယို ဖေႏကကယ်ႏ ကမ္ဘာႏလောင်းကအဝ်ႏဒါႏလိုꩻဖုံႏ အပဲစ်တရာႏတာႏ ထွာဒျာႏဘုရာꩻသျင်ꩻလွိုက်ရွေꩻခါꩻလိုꩻနဝ်ꩻသွူ။

‘ဒါဝိဒ်’ ကထွိုင်ႏဟွိုန် ‘နာသန်’ ငဝ်းချိန်ႏတွင် ဝွေꩻအံႏယော်ꩻအံႏဖြာꩻမွေးစွဉ်ႏ ဘုရာꩻသျင်ꩻ ကေꩻဇူꩻသွူ။ ဘုရာꩻသျင်ꩻနဝ်ꩻ အွဉ်ႏမွေးဖေႏမွေးဝွေꩻ အရေꩻတွော့ꩻ ဖေႏဗောႏဗာႏခန်း ဝွေꩻထာꩻဟဝ်ဖုံႏနဝ်ꩻသွူ။ ကွဲတွော့ꩻ ‘ဒါဝိဒ်’ နောဝ်ꩻ အချိန်ႏမုဲင်ꩻ ဘုရာꩻသျင်ꩻအီမာꩻတမုဲင်ꩻယို တသေဗာႏတဝ်းသွူ။ ကလား ‘မေရှိယ’ ကလွဉ် ပွိုးထဲင်းဗာႏက နေင်ႏတရေင်ရပ်ကရိုꩻယို ‘ဣစရေး’လိုꩻမျိုꩻဖုံႏနဝ်ꩻ အဝ်ႏသေရီးဒျာႏသွူ။

‘ဒါဝိဒ်’ နဝ်ꩻ တွမ်ႏတရာꩻမျတတဲင် နေင်ႏပေါင်ꩻညဆွာꩻ အုပ်ချွုတ် ခန်းဒျာႏ ဝွေꩻ ‘ဣစရေး’ လိုꩻမျိုꩻနောဝ်ꩻသွူ။ ဝွေꩻနောဝ်ꩻ သစ္စာႏ အဝ်ႏအဝ်ႏ လွိုက်ꩻနာႏဘုရာꩻသျင်ꩻတဲင် ဘုရာꩻသျင်ꩻဖေႏခန်းဝွေꩻ ထာꩻဟဝ်ဖုံႏနဝ်ꩻသွူ။ ကွဲတွော့ꩻ ဝွေꩻဆုဲင်ꩻနေင်ႏပေါင်ꩻအာ ကထွိုင်ႏညလွဉ်အချိန်ႏနဝ်ꩻ ဘုရာꩻသျင်ꩻအလောင်း မာꩻခန်း ကတန်ထွူႏဒါႏ အပဲစ်ဖုံႏနဝ်ꩻသွူ။

တနီꩻတွော့ꩻ ‘ဒါဝိဒ်’ နဝ်ꩻ အဝ်ႏဝွေꩻဟော်ꩻနန်ꩻကို ကထွိုင်ႏထွားအထန်ႏနဝ်ꩻ ထီႏခန်း လိုꩻမူႏတရေꩻ တဖြာꩻအဝ်ႏလူးထီသွူ။ ပါꩻမူႏယို ဝွေꩻတသေငါꩻတဝ်းသွူ။ ကွဲတွော့ꩻ ဝွေꩻမူႏအမဉ်ꩻနဝ်ꩻ ဟဲ့ꩻ ‘ဗာသရှေဘ’ သေဗာႏနုဲင်းနဝ်ꩻသွူ။

၀ွေꩻနဝ်ꩻ ခါးလားကချောင်ထွား ပါꩻမူႏယို ဖေႏကတွိုႏဝွေꩻထျꩻ ထွဉ်ႏဟဲ့ꩻလွဉ်စွဉ်ႏ ပါꩻတဖြာꩻနဝ်ꩻသွူ။ ဝွေꩻနဝ်ꩻ ဗေင်ႏညီꩻသွူပါꩻမူႏနဝ်ꩻတွော့ꩻ သဲင်ꩻပသာချာယင်း ပါꩻမူႏနဝ်ꩻအလမ်းသွူ။ တညတဝ်းအချိန်ႏတွင်ꩻ ‘ဗာသရှေဘ’ နဝ်ꩻ ဝွေꩻမူႏယို အဝ်ႏနမ်းလောင်းလဲဉ်းသွူပို ပသာခန်းလိတ် ‘ဒါဝိဒ်’ ထျꩻနုဲင်းနဝ်ꩻသွူ။

‘ဗာသရှေဘ’ ဝါꩻအမဉ်ꩻနဝ်ꩻ ထွာ ‘ဥရိယ’ သွူ။ ‘ဥရိယ’ နဝ်ꩻ ထွာ ‘ဒါဝိဒ်’ စဲ့ꩻသားယံတဖြာꩻတဲင် နဝ်ꩻအချိန်ႏထွာအဝ်ႏလွေꩻတွိုက်ꩻ တွိုက်ꩻပွယ်ꩻချိန်ႏနောဝ်ꩻသွူ။ ‘ဒါဝိဒ်’ ဟဲ့ꩻသွူ ‘ဥရိယ’ တဲင် ဖေႏကသဲင်ꩻအုံညီꩻ အမာ ဒေါ့ꩻခန်းနုဲင်း နဝ်ꩻသွူ။ ကွဲတွော့ꩻ ‘ဥရိယ’ နဝ်ꩻ စဲ့ꩻသားအလင်နဝ်ꩻ အဝ်ႏစဲ့ꩻပွယ်ꩻကို ခွေ အီသဲင်ꩻဗာႏလမ်း ကရိုꩻယို တလက္ခံႏတဝ်းသွူ။ နဝ်ꩻတွော့ꩻ ‘ဒါဝိဒ်’ နောဝ်ꩻ အွဉ်ႏစွလွေꩻချာသွူ ‘ဥရိယ’ တွိုက်ꩻပွယ်ꩻကိုတဲင် ၀င်ꩻဖေႏကခꩻသီ ‘ဥရိယ’၊ စဲ့ꩻပိုႏတန်နောဝ်ꩻ အွဉ်ႏလွေꩻခန်း ‘ဥရိယ’ ရန်ႏသူႏကအာဒါႏခင်ႏလမ်းတွော့ꩻ တွိုက်ꩻပွယ်ꩻကို‘ဥရိယ’သီထိုꩻ ခန်းဒျာႏနဝ်ꩻသွူ။

တွိုက်ꩻပွယ်ꩻကို ‘ဥရိယ’ ကထွိုင်ႏသီထွူ ‘ဒါဝိဒ်’ နောဝ်ꩻ တောႏ လမ်းလုဲင်ႏခန်း ‘ဗာသရှေဘ’ နဝ်ꩻသွူ။ အချိန်ႏကထွိုင်ႏညလွဉ်တဲင် ‘ဗာသရှေဘ’ နဝ်ꩻ လွူးဖွာꩻလင်ꩻခန်း ‘ဒါဝိဒ်’ ပိုခိုနဝ်ꩻသွူ။ ဘုရာꩻသျင်ꩻနဝ်ꩻ ‘ဒါဝိဒ်’ ကပျုခါꩻဒါႏ အမုꩻယို သꩻလျားထာꩻတဲင် ဝွေꩻနဝ်ꩻ လွေꩻသွူ နိမိတ်ထွားဟော်ꩻပညာႏသား ‘နာသန်’ ထျꩻတွော့ꩻ ဝွေꩻ အပဲစ်ယို ဟုဲင်းတခွုင်းမုဲင်ꩻ ထွဉ်ႏဒေါ့ꩻဟွိုန်နုဲင်းနဝ်ꩻသွူ။ ‘ဒါဝိဒ်’ နဝ်ꩻ ဝွေꩻအပဲစ်ဖုံႏယို ကွပ်လꩻသံဝွေႏဂတဲင် ဘု ရာꩻသျင်ꩻ ခွင်ꩻလွစ်ဖေႏဝွေꩻအပဲစ်ဖုံႏတွော့ꩻ ဝေွꩻနောဝ်ꩻ ကအဝ်ႏကုဲင်ဒါႏ ချိန်ႏယို အချိန်ႏယပ်ခိုင်ႏလို့လို့တဲင်တဖြုံႏမလွို လွိုက်ꩻနာႏသွူ ဘုရာꩻသျင်ꩻ ငဝ်းဖုံႏတဲင် ကေႏညိုႏလွေꩻစွဉ်ႏ ဘုရာꩻသျင်ꩻနဝ်ꩻသွူ။

ကွဲတွော့ꩻ ‘ဒါဝိဒ်’ ပိုခိုပေႏ သီထိုꩻခန်းဒျာႏတဲင် ဘုရာꩻသျင်ꩻဖေႏခန်းဒျာႏ ‘ဒါဝိဒ်’ အပဲစ် တွမ်ႏအနယ်ယိုနဝ်ꩻသွူ။ နဝ်ꩻဆချာ ခလား ‘ဒါ ဝိဒ်’ ကသီအချိန်ႏတွင်ꩻ ‘ဒါဝိဒ်’ မိသားစုꩻဖုံႏနဝ်ꩻ လွိုဆန်ꩻလွဝွေꩻ တဲင် ဝွေꩻစွန်ꩻအာႏဖုံႏ လို့သွတ်ꩻထိုꩻခန်းဒျာႏနဝ်ꩻသွူ။ ကွဲတွော့ꩻ ဘုရာꩻသျင်ꩻနောဝ်ꩻ ငဝ်းကတိတီႏ ‘ဒါဝိဒ်’ တဲင် ‘ဒါဝိဒ်’ တလွိုက်ꩻနာႏ တဝ်း ဝွေꩻငဝ်းရိုꩻလဲ့ ငဝ်းကတိအတွိုင်ႏ မာꩻဖေႏနဝ်ꩻသွူ။ နဝ်ꩻဆချာ ‘ဒါဝိဒ်’ တွမ်ႏ ‘ဗာသရှေဘ’ သီးနောဝ်ꩻ လွူးလင်ꩻယင်းပိုခိုတဖြာꩻတဲင် အပိုယို ဝွေꩻသီးဟဲ့ꩻဖေႏခန်း အမဉ်ꩻ ‘ဆော်လမွန်’ နုဲင်း နဝ်ꩻသွူ။

၁ တရာꩻရာႏဇဝင်ႏ ၁၀: ၁၅-၁၉: ၂၄: ၃၁: ၂ တရာꩻရာႏဇဝင်ႏ ၅: ၇: ၁၁-၁၂ မꩻ သမ္မာႏလိတ်ကျမ်ꩻ ငဝ်းခြုဲင်း