၃၅ - သꩻဆန္ဒတန်မွေးငါႏ ဖာတဖြာꩻငဝ်းခြုဲင်း
တွိုႏတနီꩻတွော့ꩻ ‘ကိုယ်ႏတောႏယေရှု’ နဝ်ꩻ ဝွေꩻကရိုꩻဆွုံꩻမမုꩻဖုံႏ ကနာႏခံႏဒါႏလိုꩻဖုံႏယို ဒေါ့ꩻရိုꩻသွဉ်သင်ခန်း နဝ်ꩻသွူ။ လိုꩻနဝ်ꩻဖုံႏအကို အခွဉ်ႏကောက်ခံႏသားတွမ်ႏတလွိုက်နာႏတဝ်း ‘မောရှေ’ ဥပဒေႏသားလဲ့ꩻပါသော့ꩻငီꩻ နောဝ်ꩻသွူ။
ဘာႏသာႏရေꩻအွဉ်ငါသားယဟန်ႏဖုံႏယို ‘ကိုယ်ႏတောႏယေရှု’ နဝ်ꩻ လိုꩻစားနဝ်ꩻဖုံႏယို ဗွိုန်နုဲင်းသွꩻပေႏမိတ် ဆွေႏတွော့ꩻ ကထွိုင်ႏထီႏဒေါ့ꩻရိုꩻဆွိုက်ဆံႏလွေꩻနုဲင်းနဝ်ꩻတဲင် ‘ကိုယ်ႏတောႏယေရှု’ ကကျိုꩻဆောင်ႏဒါႏထာꩻမာꩻယို ထွာအမာႏတန် အချင်ꩻချင်ꩻဒေါ့ꩻရိုꩻလွꩻခန်းဝင်ꩻနုဲင်းနဝ်ꩻသွူ။
နုဲင်းနဝ် ဖာတဖြာꩻယို ပိုအဝ်ႏဝင်ꩻနီꩻနဝ်ꩻသွူ။ တနီꩻတွော့ꩻ ပိုခိုပေႏ နဝ်ꩻ ဒေါ့ꩻခန်းကထွာအဖာꩻ ‘ဖာ ပိုခိုအမွီႏယို မဉ်ႏလꩻလဲဉ်းယိုခါတလဲင်ႏချင်ꩻ တဲင် အဖာကပဲင်ႏဆဲင်ႏမုꩻအလို့ယို ခွဲဖေႏခန်း ပိုခိုဝင်ꩻနီ နဝ်ꩻသွူ။”
“တညတဝ်းအချိန်ႏတွင်ꩻ ပိုခိုပေႏနဝ်ꩻ ထူႏသွူဝွေꩻပဲင်ႏဆဲင်ႏမုꩻကားကအဝ်ႏတဲင် ထွဉ်ႏလွေꩻသွူအွိုးအညာꩻ တွော့ꩻ ရွဉ်တောင်ꩻဥစ္စာႏဖုံႏယို ဖြွုံꩻထိုꩻသွူတဲင် မာꩻလွေꩻခန်းဒုစရိုက်အပဲစ်ဖုံႏနဝ်ꩻသွူ။”
“ကထွိုင်ႏဖြွုံꩻထိုꩻထွူနုဲင်းနဝ်ꩻတွော့ꩻ ပိုခိုပေႏကအုံဒါႏခင်ႏလမ်းယိုကျွုံႏမော့ꩻခွဲဗာႏခန်းတွမ်ႏဟုဲင်းသန်မွေး ထာꩻအံႏမꩻဘေꩻတဲင် ပိုခိုပေႏနဝ်ꩻ အီႏဖြေꩻအအံႏအအွအတာႏ ရွဉ်တလွံးတဝ်းဒွုမ်သွူ။ နဝ်ꩻတွော့ꩻဝွေꩻနဝ်ꩻ ဝွေꩻက လꩻနွောင်ꩻဒါႏထာꩻမာꩻတဗာႏယို မာꩻလွေꩻ ခန်းဗွူႏထော့ꩻဆာႏထာꩻမာꩻနဝ်ꩻသွူ။ ဝွေꩻနဝ်ꩻ မော့ꩻလွဉ်ꩻငါႏထာꩻဒုက္ခတဲင် ဟို့ꩻခိုးလွဉ်ꩻငါႏတွော့ꩻ လဲင်ꩻမိဉ်ႏအံႏလုဲင်ႏစွဉ်ႏ ထော့ꩻဆာႏဖုံႏနဝ်ꩻသွူ။”
အဆုဲင်ꩻသွတ်ꩻတွော့ꩻ ပိုခိုပေႏနဝ်ꩻနဝ်ꩻ “ယိုကို ခွေမာꩻတမုဲင်ꩻတန်နဲ၊ နီဖာသီးအသွဉ်းအသယ်ႏဖုံႏမဉ်ႏတဲ့ꩻ အအံႏအအွဖုံႏပြန်ꩻပျွော်ႏတဲင် ယိုခါခွေနဝ်ꩻအံႏခရာႏငါꩻတဲ့အဝ်ႏတဝ်းသွူ။ ခွေသဲင်ꩻပြန်ႏချာသွူနီဖာထျꩻတဲင် ထွာ ဝွေꩻအသွဉ်းအသယ်ႏတဖြာꩻအနေႏအုံခွင်ꩻဖေႏကလꩻအီႏလေွꩻကွိီ” ဝွေꩻနမ်းတွမ်ႏဝွေꩻဒေါ့ꩻရိုꩻခွိုꩻခွိုꩻခန်းနုဲင်းနဝ်ꩻသွူ။
“နဝ်ꩻဆချာ ပိုခိုပေႏနဝ်ꩻ လွေꩻတွိုႏခန်းဝွေꩻဖာလမ်းထျꩻနဝ်ꩻသွူ။ ဝွေꩻဖာနဝ်ꩻ အဝ်ႏညာꩻထီႏခန်းဝွေꩻတဲင် ပျောႏသွင်ႏမွေးငါႏတွော့ꩻဖမ်းတဖော့သွူဝွေꩻတဲင် တဖော့နို့ꩻခန်းဒျာႏဝွေꩻနဝ်ꩻသွူ။”
“ဖာ ခွေနဝ်ꩻ ဘုရာꩻသျင်ꩻအလောင်းတွမ်ႏ နီဖာအလောင်းယို ကွပ်မာꩻမာႏအပဲစ်တဲင် တထွိုက်တန်ႏ တဝ်းဒွုမ်နီဖာပိုခိုအထွာ” ပိုခိုပေႏ ဒေါ့ꩻဟွိုန်တောင်ꩻပြန်ႏခန်းအဖာနုဲင်းနဝ်ꩻသွူ။
“ကွဲတွော့ꩻဝွေꩻဖာနဝ်ꩻ ရိုꩻခန်းအသွဉ်းအသယ်ႏဖုံႏ ဟွေး အမွိုင်သွတ်ꩻထူႏလွဉ်သွူအဟဝ်သွတ်ꩻခွမ်ꩻလာꩻ တဲင် အွဉ်ႏကꩻဖေႏခွေိပိုခိုနဝ်ꩻဟုဲင်း။ ဝွေꩻစူယို အွဉ်ႏဆွဖေႏခန်း စူသွို့ꩻတကွင်ꩻတဲင် ဝွေꩻခင်ႏယိုလဲ့ꩻအွဉ်ႏထွုမ်းဖေႏ ခန်းခင်ႏဖာႏတခိုႏနဝ်ꩻသွူ။ နီဖုံႏကအဝ်ႏဒါႏ အယံသွတ်ꩻဖိုးပေါက်ꩻပေႏဖုံႏအလောင်း မာꩻဖေႏခန်းပျောႏပွယ်ꩻ သွင်ႏ ပွယ်ꩻနဝ်ꩻသွူ။ ပွိုးတမုဲင်ꩻနဲးတဲင်ခွေိပိုခိုနဝ်ꩻ ထွာအဝ်ႏထာꩻသီဒုံသဲင်ꩻလွဉ်ချာအကျောင်ꩻနဝ်ꩻသွူ။ ကထိုꩻမားဒါႏ ပိုယို ယိုခါခွေထွုမ်ႏမော့ꩻတချာလဲဉ်းနဝ်ꩻသွူ။”
“နဝ်ꩻအချိန်ႏတွင်ꩻလိုꩻဖုံႏနဝ်ꩻ အီမာꩻပျောႏပွယ်ꩻသွင်ႏပွယ်ꩻစီႏရင်ႏစꩻခန်းဒျာႏနဝ်ꩻသွူ။ တညတဝ်းအချိန်ႏ ပိုခိုတန်နဝ်ꩻမာꩻထာꩻမာꩻလုဲင်းကို ကထွိုင်ႏထွူ သဲင်ꩻခန်းလမ်းနဝ်ꩻသွူ။ ဝွေꩻကထွိုင်ႏဟွိုန်ငဝ်းသချင်ꩻဖုံႏတွမ်ႏ တိန်ႏငဝ်းဖုံႏယို ထွာနုဲင်းမုဲင်ꩻကရိုꩻနဝ်ꩻမဲဉ်သေခန်းဒျာႏနဝ်ꩻသွူ။
“အပိုတန်ကထွိုင်ႏသေဝွေꩻဖူးတွိုႏသဲင်ꩻချာလမ်းတဲင် မာꩻဖေႏပျောႏပွယ်ꩻသွင်ႏပွယ်ꩻနုဲင်းယိုနဝ်ꩻ ဒေါ့ꩻသ ထန်ႏသန်သွူထာꩻတွော့ꩻ တမဲဉ်နွို့ꩻတဝ်းလမ်းကိုနဝ်ꩻသွူ။ ဝွေꩻဖာနဝ်ꩻထန်ႏသွူအထန်ႏတဲင် မာꩻငီꩻသွော့ꩻတွမ်ႏဝွေꩻ သီးပျောႏပွယ်ꩻသွင်ႏပွယ်ꩻလွဉ်ဒေါ့ꩻရိုꩻ ရိုꩻကီလဲ့ꩻကထွာအဝေးနဝ်ꩻ လွိုဆန်ꩻထိုꩻခန်းနဝ်ꩻသွူ။”
ပိုခိုတန်နဝ်ꩻ ရိုꩻခန်းအဖာ “ခွေသွဉ်းနဝ်ꩻ နာꩻအထျꩻသစ္စာႏအဝ်ႏအဝ်ႏအုံအဝ်ႏငီꩻ ညနေင်ႏပေါင်ꩻအာတဲင် မာꩻ လွဉ်ဗာႏထာꩻမာꩻ နဝ်ꩻသွူ။ ခွေနဝ်ꩻ လွိုဆန်ꩻဖိုတဝ်းနီဖာငဝ်းရိုꩻကီလဲ့ꩻ ခွေတွမ်ႏခွေသွꩻဖုံႏအီမာꩻပျောႏပွယ်ꩻသွင်ႏ ပွယ်ꩻတွက်တာႏ ဆိတ်ပေႏတဗာႏငါႏတဲ့ꩻတဖေႏတဝ်းသွူ။ ကွဲတွော့ꩻ နီဖာပိုခိုပေႏနောဝ်ꩻ ဖြွုံꩻကုဲင်ထိုꩻနီဖာသီးရွဉ်ခံꩻ ဥစ္စာႏဖုံႏလဲ့ꩻ ကထွိုင်ႏတွိုႏသဲင်လွဉ်လမ်းအချိန်ႏ တွင်ꩻ နီဖာနဝ်ꩻဝွေေꩻအတွက်မာꩻဖေႏပျောႏပွယ်ꩻသွင်ႏပွယ်ꩻအတာႏ အယံသွတ်ꩻဖိုးဖုံႏတဲ့ꩻမာꩻသီဖေႏ” ဒေါ့ꩻခန်းအဖာနုဲင်းနဝ်ꩻသွူ။
“အဖာရိုꩻ ‘ခွေပိုခိုနဝ်ꩻအဝ်ႏငီꩻတွမ်ႏခွေတဲင် ခွေထျꩻကအဝ်ႏဒါႏမှန်ႏသမျကားကအဝ်ႏတွိုင်ႏနဝ်ꩻ ထွာနာꩻ တွက်တာႏနဝ်ꩻသွူ။ ကွဲတွော့ꩻ နီဖုံႏကမာꩻဗာႏနုဲင်းယိုနဝ်ꩻနာꩻဖူးယို ထွာအဝ်ႏထာꩻသီဒုံသဲင်ꩻလွဉ်ချာနဝ်ꩻသွူ။ ကထိုꩻ မားဒါႏပိုခိုယို ထွုမ်ႏမော့ꩻချာတွော့ꩻ ပျောႏသွင်ႏငါႏတဲင် မာꩻဖေႏပွယ်ꩻတောႏဒျာႏ’ သျင်ꩻပျနယ်ခန်းနုဲင်းနဝ်ꩻသွူ။”
သျင်ႏလုကာခရစ်နွို့ꩻ ၁၅:၁၁-၃၂ မꩻ သမ္မာႏလိတ်ကျမ်ꩻ ငဝ်းခြုဲင်း