၂၈ - ကချံႏသာႏဒါႏအရာႏအဝ်ႏ လိုꩻပေႏတဖြာꩻ

တွိုႏတနီꩻတွော့ꩻ ရွယ်ႏပေႏကချံႏသာႏဒါႏ အရာႏအဝ်ႏလိုꩻပေႏတဖြာꩻနဝ်ꩻ လွဉ်သွူ ‘ကိုယ်ႏတောႏယေရှု’ ထျꩻ တဲင် “မျတ်ꩻဟဝ်မွေးငါႏဆရာႏ ခွေဖေႏကလꩻ နိစ္စထာꩻဝရအသက်နဝ်ꩻ အီႏမာꩻဗာႏနုဲင်းမုဲင်ꩻ” ရီခန်းနုဲင်းနဝ်ꩻသွူ။ ‘ကိုယ်တောႏယေရှု’ ရိုꩻဝွေꩻ “နာꩻပွိုးတ မုဲင်ꩻ ဟဲ့ꩻတွိုႏခွေ ဆရာႏမျတ်ꩻဟောင်း။ လောကကို မျတ်ꩻဟဝ်မွေးငါႏ ဆရာႏအဝ်ႏ တဖြာꩻလွုမ်ꩻတဲင် ဝွေꩻနဝ်ꩻထွာꩻဘုရာꩻသျင်ꩻနဝ်ꩻသွူ။ ကွဲတွော့ꩻ နာꩻနဝ်ꩻ မဉ်ႏမဲဉ်ထူႏ နိစ္စထာꩻဝရအသက်ယို လွိုက် နာႏဗာႏ ဘုရာꩻသျင်ꩻပညတ်တောႏ” မိန်းခန်းနုဲင်းနဝ်ꩻသွူ။

“ခွေအီႏလွိုက်ꩻနာႏဗာႏ ပညတ်တောႏနုဲင်းမုဲင်ꩻဖုံႏဟောင်း” ပါꩻနဝ်ꩻ နဝ်ꩻ ရီပြန်ႏဖြေႏချာခန်းနုဲင်းနဝ်ꩻသွူ။ တွိုႏနဝ်ꩻတွော့ꩻ ‘ကိုယ်ႏတောႏယေရှု’ နဝ်ꩻ “မာꩻသီဗာႏတဝ်းဝင်ꩻသက်၊ ဖောက်ပြန်ႏအိမ်ႏထောင်ႏရေꩻလတဝ်း၊ တခွန်ဝင်ꩻတခြိွုꩻလꩻတဝ်း၊ လဲဉ်ထာꩻလꩻတဝ်း၊ ရိုႏသေႏသွူမွိုးဖာတဲင် နာꩻလမ်းသောင်ရင်ꩻယိုလဲ့ꩻ နမ်းတွမ်ႏနမ်း ရက်အတွိုင်ႏ ရက်နုဲင်းဗာႏ” မိန်းခန်းနုဲင်းနဝ်ꩻသွူ။

ကွဲတွော့ꩻ ပါꩻပေႏနဝ်ꩻနဝ်ꩻ “ပညတ်တောႏဖုံႏယို ခွေလွိုက်ꩻနာႏဒျာႏ ပေႏပေႏခါꩻကာႏနဝ်ꩻသွူ။ ခွေအီႏထူႏလꩻ နိစ္စထာꩻဝရအသက်ယို အီႏမာꩻစမ်းဗာႏယင်းတမုဲင်ꩻဖုံႏဟောင်း” သျောက်လဝ်းချာခန်းနုဲင်းနောဝ်ꩻသွူ။နဝ်ꩻတွော့ꩻ ‘ကိုယ်ႏတောႏယေရှု’ နဝ်ꩻ ထွားသွူပါပေႏ နဝ်ꩻတဲင် ဟွိုန်ရက်နိက်သက်ခန်းနဝ်ꩻသွူ။

‘ကိုယ်ႏတောႏယေရှု’ ရိုꩻ “နာꩻနဝ်ꩻ မဉ်ႏထွာလိုꩻပြဲ့ꩻစွုမ်ႏတဖြာꩻတဲ့ꩻ နာꩻကပဲင်ႏဆဲင်ႏဒါႏဥစ္စာႏကားကအဝ်ႏယို စာထိုꩻသွူတဲင် ဖေႏ ဆွိုက်ထိုꩻခန်း ဆင်ꩻရယ်ꩻသားဖုံႏနဝ်ꩻဟုဲင်း။ နဝ်ꩻဆချာ လွဉ်သွူခွေထျꩻတဲင် ခံႏထူႏထွာခွေတပဲ့ꩻတဖြာꩻနဝ်ꩻသွူ။ နဝ်ꩻတွော့ꩻနာꩻနဝ်ꩻ မဲ့ꩻအီႏခံႏစာꩻဗာႏ နိဗ္ဗာန်ႏခံꩻဝေင်ꩻတွမ်ႏကစပ်ဆွိုင်ꩻဒါႏ ရတနာႏစီႏ စိမ်ႏဖုံႏ” မိန်း ခန်းနုဲင်းနဝ်ꩻသွူ။

ပါꩻပေႏနဝ်ꩻ ကထွိုင်ႏဟွိုန် ‘ကိုယ်ႏတောႏယေရှု’ အမိန်းယို သꩻတဟဝ်တဝ်းစွဉ်ႏဒျာႏနဝ်ꩻသွူ။ ပွိုးတမုဲင်နဲးတဲင် ဝွေꩻနဝ်ꩻထွာလိုꩻချံႏသာႏတန်တဖြာꩻတွော့ꩻ ဝွေꩻပဲင်ႏဆဲင်ႏမုꩻဖုံႏယို သꩻမဲဉ်ဖေႏတဝ်းလိုꩻလောင်းလင်ဖုံႏနဝ်ꩻသွူ။ နဝ်ꩻတွော့ꩻဝွေꩻနဝ်ꩻ ခွဲႏထိုꩻသွူ ‘ကိုယ်ႏတောႏယေရှု’ တဲင် ထန်ႏထိုꩻခန်းဒျာႏနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ ဆွုံႏမꩻဝွေꩻတပဲ့ꩻဖုံႏ “ကချံႏသာႏဒါႏလိုꩻဖုံႏနဝ်ꩻ ကအီႏလွေꩻနိဗ္ဗာန်ႏခံꩻဝေင်ꩻယို ခုဲင်ႏငါႏနုဲင်းနဝ်ꩻသွူ။ ‘ကုလာꩻအုပ်’ တဗာႏနဝ်ꩻ နွိုꩻသော့ꩻ ထꩻဖူꩻယိုꩻရိုꩻကီလဲ့ꩻ ကချံႏသာႏဒါႏလိုꩻဖုံႏ ကအီႏနွိုꩻသော့ꩻဒါႏ နိဗ္ဗာန်ႏခံꩻဝေင်ꩻယို ခုဲင်ႏမွေးငါႏနဝ်ꩻသွူ။”

‘ကိုယ်ႏတောႏယေရှု’ တပဲ့ꩻဖုံႏ ကထွိုင်ႏဟွိုန်ငဝ်းနောဝ်ꩻအံႏသြသွူတဲင် ဝွေꩻသီးဖုံႏယို “မဉ်ႏထွာနုဲင်းယိုနဝ်ꩻဘုရာꩻသျင်ꩻ အီႏကယ်ႏဒင်ႏဗာႏပါမုဲင်ꩻဟောင်း” ရီလဝ်းခန်းနုဲင်းနဝ်ꩻသွူ။

‘ကိုယ်ႏတောႏယေရှု’ နဝ်ꩻ ထွားသွူဝွေꩻတပဲ့ꩻတဲင် “လိုꩻဖုံႏနဝ်ꩻ ဝွေꩻသီးတွမ်ႏဝွေꩻသီး အီႏကယ်ႏဒင်ႏယို တ ထွာနွောင်ꩻတဝ်းရိုꩻလဲ့ꩻ ဘုရာꩻသျင်ꩻအတွက်နဝ်ꩻ အမျိုꩻမုဲင်ꩻတယဝ်း တထွာနွောင်ꩻတဝ်းနဝ်ꩻ တအဝ်ႏထဝ်း” မိန်း ခန်းနုဲင်းနဝ်ꩻသွူ။

‘ပေတရု’ ရိုꩻ ‘ကိုယ်ႏတောႏယေရှု’ “တပဲ့ꩻကထွာဒါႏနီဖုံႏနောဝ်ꩻအွဉ်ႏကုဲင်သွူတခြိွုꩻဥစ္စာႏကားကအဝ်ႏတဲင်ပါလွေꩻလွဉ်ခန်း ‘ကိုယ်ႏတောႏ’ ဆချာနဝ်ꩻသွူ။ နီဖုံႏတွက်တာႏ ဆုꩻလာဒ်နဝ်ꩻ အီႏထွာလွဉ်တမုဲင်ꩻ” သျောက်လဝ်း ခန်းနုဲင်းနဝ်ꩻသွူ။

‘ကိုယ်ႏတောႏယေရှု’ နောဝ်ꩻ “သီလမ်းဖုံႏ၊ မွိုးဖာဖုံႏ၊ ဖူးဝေးဖုံႏ၊ ပိုဖုံႏတွမ်ႏ ပဲင်ႏဆဲင်ႏမုꩻဖုံႏယို စွဉ်ꩻပယ်ႏထိုꩻထွူတဲင် ခွေတပဲ့ꩻ ကအီႏလꩻဒါႏ နိစ္စထာꩻဝရအသက်နောဝ်ꩻ အသက်တရျာꩻမကာႏ အီႏလꩻ ဒွုမ်းက ဆုꩻလာဒ်ဖုံႏနဝ်ꩻသွူ။ ကွဲတွော့ꩻ ကတွိုႏရီးဒါႏ လိုꩻဖုံႏနဝ်ꩻ ထွာသွူအဆုဲင်ꩻသားတဲင်၊ ဝွေꩻသီး ကတွိုႏဆုဲင်ꩻသားဖုံႏနဝ်ꩻ ထွာထိုꩻအရီး” မိန်းချာခန်းနုဲင်းနဝ်ꩻသွူ။

သျင်ႏမဿဲခရစ်နွို့ꩻ ၁၉:၁၆-၃၀; မာကုခရစ်နွို့ꩻ ၁၀:၁၇-၃၁; သျင်ႏလုကာခရစ်နွို့ꩻ ၁၈:၁၈-၃၀ မꩻ သမ္မာꩻလိတ်ကျမ်ꩻ ငဝ်းခြုဲင်း