၂၆ - ‘ကိုယ်ႏတောႏယေရှု’ စꩻအုပ်စိုꩻလွဉ်

‘ကိုယ်ႏတောႏယေရှု’ ညင်သွူ ‘စာတန်မာရ်ႏနတ်’ သွေကုဲင်မုꩻဆချာတဲင် ကွျꩻသဲင်ꩻပြန်ႏခန်း ‘ဂါလိလဲ’ ဒေႏသနဝ်ꩻသွူ။ ခင်ႏလမ်း နဝ်ꩻကိုနဝ်ꩻ ထွာဝွေꩻခင်ႏလမ်းအုံတဲင် ဘုရာꩻသျင်ꩻဉာဏ်ႏအရောင်ႏတောႏနဝ်ꩻ ဖေႏဝွေꩻ ဘွုံႏတန်ႏခိုꩻဖုံႏအာငါႏတဲင် ‘ကိုယ်ႏတောႏယေရှု’ နဝ်ꩻ တထွောင်းသွူတထွောင်း လွေꩻသွဉ်သင်ခန်းလိုꩻဖုံႏ နဝ်ꩻသွူ။ လိုꩻတွိုင်ꩻနဝ်ꩻလဲ့ꩻ ဒေါ့ꩻခန်းဝွေꩻသတင်ꩻဟဝ်ဖုံႏနဝ်ꩻသွူ။

‘ကိုယ်ႏတောႏယေရှု’ နဝ်ꩻ လွေꩻသွူ ‘နာဇရက်’ ဝေင်ꩻ ကအဝ်ႏဒါႏ ဒုံꩻပေႏကိုတွော့ꩻ ဒုံꩻနဝ်ꩻနဝ်ꩻ ဝွေꩻပေႏပေႏခါႏ ထွာဝွေꩻခင်ႏလမ်းအုံလီꩻနဝ်ꩻသွူ။ ဝွေꩻနဝ်ꩻ လွေꩻသွူ ဥပုသ်နီꩻ ကိုႏကွယ်ႏဝွတ်ပျုꩻဒါႏ ခင်ႏလမ်းထျꩻတဲင် ခင်ႏလမ်း နဝ်ꩻကို ကအဝ်ႏဒါႏ ဘာႏသာႏရေꩻအွဉ်ငါသားဖုံႏနဝ်ꩻ နိမိတ်ထွားဟောꩻပညာႏအဝ်ႏသား ‘ဟေရှာယ’ ဟောꩻခါꩻတ ရာꩻဖုံႏကပါဒါႏ ပိဋကတ်ထူ တထူယို ဖေႏခန်း ‘ကိုယ်ႏတောႏယေရှု’ နဝ်ꩻသွူ။ နောဝ်ꩻတွော့ꩻ ‘ကိုယ်ႏတောႏယေရှု’ နဝ်ꩻ ပိဋကတ်ထူကို ကပါဒါႏ တရာꩻယဟန်ႏယို ဖတ်နယ်ခန်းလိုꩻဖုံႏနဝ်ꩻသွူ။

‘ကိုယ်ႏတောႏယေရှု’ နဝ်ꩻ “ခွေနဝ်ꩻ ဆင်ꩻရယ်ꩻသားတွက်တာႏ ဖေႏကမိန်းဟွိုန်နွောင်ꩻ မင်္ဂလာႏသတင်ꩻ ဟဝ်ꩻယို ဘုရာꩻသျင်ꩻဉာဏ်ႏအရောင်ႏတောႏနဝ်ꩻ ဝွေꩻဖေႏခွေနဝ်ꩻသွူ။ ဘုရာꩻသျင်ꩻနဝ်ꩻ လိုꩻကအဝ်ႏဒါႏထောင်ꩻကို ဖေႏကလွစ်၊ မဲ့တထီႏတောဝ်းလိုꩻယိုလဲ့ꩻ ဖေႏကထီႏတွမ်ႏ ပါꩻတိပ်နျꩻ ကခံႏဗာႏဒါႏလိုꩻဖုံꩻယို ဖေႏကလွစ်ထန်ႏထိုꩻအတွက် ခွေေစေလွစ်ဖေႏနဝ်ꩻသွူ။ အချိန်ႏခါႏယိုခါ ဘုရာꩻသျင်ꩻ နဝ်ꩻ နီဖုံႏအလောင်း တွမ်ႏကရုဏာႏတန်တန် ကူႏညီႏ ချိန်ႏအီႏတွိုႏလဲဉ်း” ဖတ်နယ်ခန်းနုဲင်းနဝ်ꩻသွူ။

နောဝ်ꩻဆချာ ‘ကိုယ်ႏတောႏယေရှု’ ကထွိုင်ႏအုံလင်ꩻ လိုꩻဖုံႏလွဉ်ထွားဗော့ꩻခန်းဝွေꩻနဝ်ꩻသွူ။ ဝွေꩻသီးဖုံႏနဝ်ꩻ ‘ကိုယ်ႏတောႏယေရှု’ ကဖတ်ဒါႏလိတ်ပွိုက်နဝ်ꩻ ထွာꩻ ‘မေရှိယ’ အကျောင်ꩻယို သေရီးဒျာႏနဝ်ꩻသွူ။ ‘ကိုယ်ႏတောႏ ယေရှု’ နဝ်ꩻ “ခွေကဖတ်နယ်ဒါႏသီ အကျောင်ꩻခရာႏဖုံႏအတွိုင်ꩻ ယိုခါအဝ်ႏထွာ” မိန်းခန်းနုဲင်းနဝ်ꩻသွူ။ လိုꩻ တွိုင်ꩻအံႏသြꩻသွူတဲင် “ပါꩻယိုနဝ်ꩻ ‘ယောသပ်’ ပိုခို မွေးတဝ်ႏနဲ့ꩻ” ဒေါ့ꩻလွꩻခန်းဝင်ꩻနုဲင်းနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻ “နိမိတ်ထွားဟောꩻပညာႏ အဝ်ႏသားတဖြာꩻ တန်လွဉ်ဝေင်ꩻနဝ်ꩻကို လိုꩻဖုံႏနဝ်ꩻ တလက္ခံႏ တဝ်းဝွေꩻ အမန်ႏနဝ်ꩻသွူ။ နိမိတ်ထွားဟောꩻပညာႏအဝ်ႏသား ‘ဧလိယ’ ခေတ်နဝ်ꩻ ‘ဣစရေး’ ယို မုဲင်းရင်းမူႏဖုံႏ အဝ်ႏအာငါႏနဝ်ꩻသွူ။ ကွဲတွော့ꩻ သွံနေင်ႏထာꩻဝꩻ ကထွိုင်ႏထွာခမ်းခေါင်ႏအချိန်ႏတွင်ꩻဘုရာꩻသျင်ꩻနဝ်ꩻ ‘ဣစရေး’ ကို ကအဝ်ႏဒါႏ မုဲင်းရင်းမူႏဖုံႏကိုယ်ႏစာꩻ ခမ်းလောင်းလင်ꩻထျꩻယိုအွဉ်ႏလွစ်လွေꩻ‘ဧလိယ’မိန်းခန်း နုဲင်းနဝ်ꩻသွူ။

‘ကိုယ်ႏတောႏယေရှု’ နဝ်ꩻ “နိမိတ်ထွားဟောꩻပညာႏအဝ်ႏသား ‘ဧလိရှဲ’ စူကိုတွင်ꩻနဝ်ꩻလဲ့ꩻ ‘ဣစရေး’ လိုꩻမျိုꩻဖုံႏအာဖုံႏနဝ်ꩻ အပီဆာရောဂါႏဖုံႏ ဗွို့ꩻကပ်လွခန်းနဝ်ꩻသွူ။ ဝွေꩻနဝ်ꩻ ‘ဣစရေး’ လိုꩻမျိုꩻထျꩻ ထာꩻဆာတန်ဖုံႏ နဝ်ꩻ ကုဖေႏတဝ်းတဲင် ကုꩻဖေႏလွုမ်ꩻ ‘ဣစရေး’ ရန်ႏသူႏကထွာဒါႏဗိုလ်မှုး‘နေမန်’လွုမ်ꩻ”မိန်းခန်းနုဲင်းနဝ်ꩻသွူ။ကွဲတွော့ꩻလိုꩻဖုံႏကနာႏဒါႏ ‘ကိုယ်ႏတောႏယေရှု’ ငဝ်းနဝ်ꩻ ထွာ ‘ယုဒ’ လိုꩻမျိုꩻတဲင် ကထွိုင်ႏနုဲင်းနဝ်ꩻတွော့ꩻ ဒေါသထန်ႏမွေး ခန်းဒျာႏထာꩻနဝ်ꩻသွူ။

‘နာဇရက်’ ဝေင်ꩻလိုꩻဖုံႏနဝ်ꩻ ဆွမ်ꩻသွူ ‘ကိုယ်ႏတောႏယေရှု’ တဲင် ထွို့ꩻထန်ႏထိုꩻခန်း အဝ်ႏဝတ်ပျုꩻကိုႏကွယ်ႏ ဒါႏခင်ႏလမ်းကိုနဝ်ꩻသွူ။ ဝွေꩻသီးဖုံႏနဝ်ꩻ အီႏမာꩻသီ ‘ကိုယ်ႏတောႏယေရှု’ တဲင် ဟဲ့ꩻလွေꩻခန်း ခြောင်စောက်ထျꩻနဝ်ꩻ သွူ။ ကွဲတွော့ꩻ ‘ကိုယ်ႏတောႏယေရှု’ နဝ်ꩻ ရှောင်ꩻထိုꩻသွူလိုꩻဖုံႏအခါႏတဲင် ထန်ႏထိုꩻခန်း ‘နာဇရက်’ ဝေင်ꩻနဝ်ꩻသွူ။

နောဝ်ꩻဆချာ ‘ကိုယ်ႏတောႏယေရှု’ နောဝ်ꩻ ဖျတ်လွေꩻ ‘ဂါလိလဲ’ ဒေႏသတွင်ꩻ လိုꩻအာဖုံႏယို ဖျော်ꩻလွဉ်ခန်း ‘ကိုယ်ႏတောႏယေရှု’ ထျꩻနဝ်ꩻသွူ။ လိုꩻဖုံႏနောဝ်ꩻ လိုꩻတအုံဟဝ်တဝ်းတွမ်ႏ လိုꩻထာꩻဆာအဝ်ႏသားယို ဟဲ့ꩻလွေꩻခန်း ‘ကိုယ်ႏတောႏယေရှု’ထျꩻ နဝ်ꩻသွူ။ ဝွေꩻသီးကဟဲ့ꩻလွဉ်ဒါႏ လိုꩻယဟန်ႏနဝ်ꩻထွာမဲ့ꩻတထီႏတဝ်းသားတဲင်ယဟန်ႏနဝ်ꩻတပြဲ့ꩻစွုမ်ႏတဝ်းလိုꩻဖုံႏ၊ နားတဟွိုန်တဝ်း လိုꩻဖုံႏတွမ်ႏ ထွာလိုꩻနွဲ့ꩻဖုံႏတဲင် လိုꩻတွိုင်ႏယို ‘ကိုယ်ႏတောႏယေရှု’ နောဝ်ꩻ ကုဖေႏခန်းစွုမ်ႏဖြာꩻနဝ်ꩻသွူ။

နောဝ်ꩻဆချာ ထာꩻတဟဝ်တဝ်း ကအဝ်ႏကပ်ꩻဒါႏလိုꩻဖုံႏနဝ်ꩻလဲ့ꩻ လွဉ်ကုꩻ ‘ကိုယ်ႏတောႏယေရှု’ နောဝ်ꩻသွူ။ ‘ကိုယ်ႏတောႏယေရှု’ ထာꩻတဟဝ်တဝ်းဖုံႏယို ဖေႏကထန်ႏထိုꩻတွော့ꩻ ကထွိုင်ႏဖေႏအမိန်းနဝ်ꩻ ထာꩻတဟဝ်တဝ်းဖုံႏ လဲ့ꩻထန်ႏလွဉ်ခန်းဒျာႏနဝ်ꩻသွူ။ ထာꩻတဟဝ်တဝ်းနဝ်ꩻနဝ်ꩻ တဆင်ႏဆင်ႏဒေါ့ꩻ “ နာꩻနဝ်ꩻ ထွာဘုရာꩻသျင်ꩻပိုခို” ခြဝ် ဒေါ့ꩻခန်းနုဲင်းနောဝ်ꩻသွူ။ လိုꩻဖုံႏကထွိုင်ႏဟွိုန်နုဲင်းနောဝ်ꩻတဲင်အံႏသြသွူတွော့ꩻ အံႏရောꩻလွခန်း ဘုရာꩻသျင်ꩻဂွုဏ်ႏတောႏနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻ အီႏမာꩻဝွေꩻကိုယ်ႏစာႏ ဝွေꩻတပဲ့ꩻအကို လွိုက်ရွေꩻခန်းတပဲ့ꩻတောႏတ ဆီနီဖြာꩻနဝ်ꩻသွူ။ ဝွေꩻနဝ်ꩻ လိုꩻဖုံႏယို ဟဲ့ꩻသွူတပဲ့ꩻတောႏတဲင် တပဲ့ꩻတောႏနဝ်ꩻဖုံႏနောဝ်ꩻ တွမ်ႏ ‘ကိုယ်ႏတောႏယေရှု’ လွေꩻငီꩻခန်းဝင်ꩻတဖူꩻနဝ်ꩻသွူ။

သျင်ႏမဿဲခရစ်နွို့ꩻ ၄:၁၂-၂၅; မာကုခရစ်နွို့ꩻ ၁:၁၄-၁၅, ၃၅-၃၉; ၃: ၁၃-၂၁; သျင်ႏလုကာခရစ်နွို့ꩻ ၄:၁၄-၃၀, ၃၈ -၄၄ မꩻ သမ္မာႏလိတ်ကျမ်ꩻ ငဝ်းခြုဲင်း