၃၀ - လွူးစာႏဂလိုꩻရေင်ပေါင်ꩻ အအံႏအအွဖွုံႏ
‘ကိုယ်ႏတောႏယေရှု’ နဝ်ꩻ ဝွေꩻတပဲ့ꩻတောႏဖုံႏယို ဖေႏကသွဉ်ဖန်း ဖြယ်နွောင်ꩻ လိုꩻအမျာꩻဖုံႏနဝ်ꩻ အွဉ်ႏလွေꩻခန်း ဒုံအလင်ꩻနဝ်ꩻသွူ။ ဝွေꩻသီးဖုံႏနဝ်ꩻ ကထွိုင်ႏတွိုႏသဲင်ꩻချာ ‘ကိုယ်ႏတောႏယေရှု’ က အဝ်ႏဒါႏခင်ႏလမ်းနဝ်ꩻလဲ့ꩻ ဝွေꩻသီးကမာꩻဒါႏ မှန်ႏသမျှယို သျောက်ဒင်ႏနယ်ချာခန်းနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ ဝွေꩻသီးဖုံႏ ယို ဖေႏကလွေꩻအုံပဆား ထီအွိုင်ႏအွိုးတဖဲ့ꩻ ကယေန်က တစ်ꩻဒါႏခင်ႏလမ်းသူႏနဝ်ꩻ မိန်းလွေꩻခန်းဒျာႏနုဲင်းနဝ်ꩻသွူ။ နဝ်ꩻတွော့ꩻ ဝွေꩻသီးဖုံႏနဝ်ꩻ ထင်ႏသွူ ဖြီလောင်းတဲင် ဖျက်ကာႏလွေꩻခန်း ထီအွိုင်ႏအွိုးတဖဲ့ꩻနဝ်ꩻသွူ။
ကွဲတွော့ꩻ ‘ကိုယ်ႏတောႏယေရှု’ တွမ်ႏ ဝွေꩻတပဲ့ꩻဖုံႏကထန်ႏလွေꩻ စွဉ်ႏတွမ်ႏဖြီယို လိုꩻအမျာꩻဖုံႏထီႏထိုꩻခန်းဒျာႏနဝ်ꩻသွူ။ လိုꩻနဝ်ꩻဖုံႏနောဝ်ꩻ ဖေႏကတွိုႏရီး ‘ကိုယ်ႏတောႏယေရှု’ သီးတဲင် ဖင်းပတ်လွေꩻခန်း ထီႏအွိုင်ႏသောင်အွိုးတဖဲ့ꩻနဝ်ꩻသွူ။ ‘ကိုယ်ႏတောႏယေရှု’ တွမ်ႏ ဝွေꩻတပဲ့ꩻဖုံႏ ကထွိုင်ႏတွိုႏလွဉ်နဝ်ꩻ လိုꩻနဝ်ꩻဖုံႏတွိုႏရီးလဲဉ်း နဝ်ꩻသွူ။
လိုꩻစွိုꩻနဝ်ꩻဖုံႏနဝ်ꩻ တွက်ပါတဝ်း လိုꩻမူႏတွမ်ႏလိုꩻပေႏတဲင် လိုꩻခိုပါသော့ꩻခန်း အဖြာꩻပေါင်ꩻ ငတ်ꩻရေင်လွိုရပ်နဝ်ꩻသွူ။ လိုꩻနဝ်ꩻဖုံႏနဝ်ꩻ ဗွိုန်နုဲင်း ဗဲ့ꩻ၊ ဗဲ့ꩻတီသား တအဝ်ႏတဝ်း ဗဲ့ꩻဖုံႏတဲင် လိုꩻဖုံႏနဝ်ꩻအလောင်း ကိုယ်ႏတောႏနဝ်ꩻ သꩻသညင်ꩻကရုဏာႏအဝ်ႏလွဉ်သွူတွော့ꩻ ဝွေꩻသီးဖုံႏနဝ်ꩻအကို လိုꩻတခြိွုင်ႏတဝ်းသားယိုလဲ့ꩻ ကုꩻဖေႏခန်းဒျာႏ နဝ်ꩻသွူ။
တနီꩻနဝ်ꩻ မွူႏလွဲꩻအချိန်ႏ တပဲ့ꩻတောႏတဖြာꩻ သျောက်လဝ်းခန်း ‘ကိုယ်ႏတောႏယေရှု’ “အချိန်ႏတဲ့ꩻလွဉ်လဲဉ်း ယိုအဗော့ꩻနဝ်ꩻလဲ့ꩻ ဒုံဝေင်ꩻဖုံႏတအဝ်ႏတဝ်းသွူ။ လိုꩻဖုံႏဖေႏကလွေꩻအံႏအဟာႏရတစွိုးစွိုးနောဝ်ꩻ အွဉ်ႏလွစ် လွေꩻခန်းဒျာႏနဝ်ꩻသွူ။”
ကွဲတွော့ꩻ ‘ကိုယ်ႏတောႏယေရှု’ တပဲ့ꩻကထွာဒါႏဝွေꩻနောဝ်ꩻ “သီဖုံႏ ဖေႏသွော့ꩻဝွေꩻသီးဖုံႏ အံႏခရာႏတစွိုးစွိုးဟုဲင်း” မိန်းခန်းနုဲင်းနဝ်ꩻ တဲင် တပဲ့ꩻနဝ်ꩻနဝ်ꩻ “နီထျꩻဖုံႏယို အဝ်ႏကွို့ꩻ တခိုးပေါင်မုန့်ငတ်ꩻဖြုံႏတွမ်ႏထပေႏနီဗာႏလွုမ်ꩻမာꩻဗာႏနုဲင်းမုဲင်ꩻ” ရီလဝ်းခန်းနုဲင်းနဝ်ꩻသွူ။
‘ကိုယ်ႏတောႏယေရှု’ နဝ်ꩻ လိုꩻစွိုꩻဖုံႏယို တစွိုꩻတစွိုꩻနဝ်ꩻ လိုꩻအဖြာꩻငတ်ꩻဆီယို ဖေႏကအုံလင်ꩻဟံႏလောင်း တဲင် ဝွေꩻတပဲ့ꩻဖုံႏထွဉ်ႏအုံဖေႏခန်းဒျာႏနဝ်ꩻသွူ။
နဝ်ꩻဆချာ ‘ကိုယ်ႏတောႏယေရှု’ နဝ်ꩻ ထူႏသွူတခိုး(ပေါင်မုန့်)ငတ်ꩻဖြုံႏတွမ်ႏ ထပေႏနီဗာႏတဲင် မော့ꩻအွော့ꩻရံꩻ ထွားထင်ႏသွူမို့ꩻ လောင်းတွော့ꩻ အအံႏအအွဖုံႏအတာႏအံႏဖြာꩻဆုꩻတောင်ꩻခန်းဘုရာꩻသျင်ꩻဂွုဏ်ႏကေꩻဇူꩻနဝ်ꩻသွူ။
နဝ်ꩻဆချာ ‘ကိုယ်ႏတောႏယေရှု’ နဝ်ꩻ တခိုးတွမ်ႏ ထပေႏဖုံႏယို အဲ့ꩻသွူပဉ်ခဝ်ခဝ်တဲင် ဝွေꩻတပဲ့ꩻဖုံႏမꩻတဆင်ꩻ ဝွေꩻဖေႏခန်းလိုꩻဖုံႏနဝ်ꩻသွူ။ တပဲ့ꩻတောႏဖုံႏ လယ်ႏဝွေꩻဖေႏအအံႏအအွဖုံႏနဝ်ꩻ လို့ထိုꩻတအဝ်ႏထဝ်းတဲင် လိုꩻတွိုင်ꩻသꩻကေꩻနပ်နပ် အံႏဗာႏကွို့ꩻမွေးလွဝင်ꩻ နဝ်ꩻသွူ။
နဝ်ꩻဆချာ တပဲ့ꩻတောႏဖုံႏနဝ်ꩻ ကလꩻအံႏဗာႏတဝ်းဒွုမ်း ကအဝ်ႏလွိုဒါႏ အအံႏအအွဖုံႏယို ကထွိုင်ႏလယ်ႏစုꩻ တဲင်၊ အဝ်ႏလွိုခန်း ချင်ႏတဆီနီဖြုံႏနဝ်ꩻသွူ။ အအံႏအအွအလို့နောဝ်ꩻ အောဝ်ႏတခိုးငတ်ꩻဖြုံႏတွမ်ႏ ထပေႏနီဗာႏကို လꩻလွဉ်နဝ်ꩻသွူ။
သျင်ႏမဿဲခရစ်နွို့ꩻ ၁၄:၁၃-၂၁; မာကုခရစ်နွို့ꩻ ၆:၃၁-၄၄; သျင်ႏလုကာခရစ်နွို့ꩻ ၉:၁၀-၁၇; သျင်ႏယောဟန်ခရစ်နွို့ꩻ ၆:၅-၁၅ မꩻ သမ္မာႏလိတ်ကျမ်ꩻ ငဝ်းခြုဲင်း