၃၂ - ထာꩻတဟဝ်တဝ်းကအဝ်ႏကပ်ဒါႏ လိုꩻခိုꩻတဖြာꩻတွမ်ႏတခြွိုင်ႏသန်ꩻတဝ်း လိုꩻမူႏတဖြာꩻယို ‘ကိုယ်ႏတောႏယေရှု’ ကုꩻဖေႏပွုံႏ

‘ကိုယ်ႏတောႏယေရှု’ တွမ်ႏဝွေꩻတပဲ့ꩻဖုံႏနဝ်ꩻ ဝွေꩻသီးဖုံႏထင်ႏသွူ ဖြီလောင်းတွော့ꩻ လွေꩻခန်း ‘ဂါဒရ’ လိုꩻမျိုꩻ ကအုံဒါႏ ခင်ႏလမ်းဒေႏသနဝ်ꩻသွူ။ ဝွေꩻသီးဖုံႏ ကထွိုင်ႏတွိုႏ ခြောင်သောင်နဝ်ꩻ လင်ꩻလွခန်းဖြီဖုံႏနဝ်ꩻသွူ။

ခင်ႏလမ်းနဝ်ꩻနဝ်ꩻ တနံကုဲင်ကအဝ်ႏကပ်ဗွို့ꩻဒါႏ လိုꩻခိုအဝ်ႏတဖြာꩻ နဝ်ꩻသွူ။

လိုꩻနဝ်ꩻနောဝ်ꩻ ဆွော့ꩻငါႏတဲင် တမုဲင်ꩻခန်းတယဝ်း ထိန်ꩻချွုတ်တလꩻတဝ်းသွူ။ လိုꩻအမျာꩻဖုံႏနဝ်ꩻ ယလဲင်ႏ လဲင်ႏ ဝွေꩻစူတွမ်ႏခင်ႏဖုံႏယို စွိုင်ခါꩻသွူတွမ်ႏပသီႏဖွီꩻလဲ့ꩻ လိုꩻနဝ်ꩻနောဝ်ꩻဖျက်သွူထာꩻဖွီꩻ တဲင် လွတ်ထိုꩻယင်းဒျာႏနဝ်ꩻ သွူ။

လိုꩻနဝ်ꩻနဝ်ꩻ အဗော့ꩻကအဝ်ႏဒါႏ အွတ်ဂူႏဖုံႏခြာ လွေꩻသဲင်ꩻအုံအဝ်ႏသွူတဲင် မွူးဟာမွူးယာ မဆွိုး ခြဝ်ဒါႏ အငဝ်းနဝ်ꩻသွူ။ လိုꩻနဝ်ꩻနောဝ်ꩻ ခွမ်ꩻလာꩻတဲ့ꩻတကꩻတဝ်း နဝ်ꩻမဉ်ႏထွူ ဝွေꩻနမ်းတွမ်ႏဝွေꩻ တွမ်ႏလုံးတဆင်ႏဆင်ႏ စွယ်ꩻချာဒါႏအနမ်းနဝ်ꩻသွူ။

လိုꩻနဝ်ꩻနဝ်ꩻ ဖင်းလွေꩻသွူ ‘ကိုယ်ႏတောႏယေရှု’ ထျꩻတဲင် ထောက်လင်ꩻခန်းခင်ႏလေင်း ‘ကိုယ်ႏတောႏယေရှု’ ဖဲ့ꩻငါနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ လိုꩻအကိုကအဝ်ႏဒါႏ ထာꩻတဟဝ် တဝ်းဖုံႏယို “ထန်ႏလွဉ်ခန်းလိုꩻအကိုဟုဲင်း” မိန်းခန်းနုဲင်းနဝ်ꩻသွူ။

ထာꩻတဟဝ်တဝ်းနဝ်ꩻနောဝ်ꩻ တွမ်ႏအငဝ်းသန်သန်တဲင် “အမျတ်ꩻတန်သွတ်ꩻ ဘုရာꩻပိုခိုꩻတောႏ ‘ကိုယ်ႏ တောႏယေရှု’ ခွေသွဉ်းမျိုꩻအထျꩻ အလွိုအဝ်ႏတမုဲင်ꩻဟောင်း။ တွမ်ႏမာꩻနိစ္စက်မွိုန်း ခွေသွဉ်းမျိုꩻ” ရီလဝ်းခန်းနုဲင်း နဝ်ꩻသွူ။ နဝ်ꩻတွော့ꩻ ‘ကိုယ်ႏတောႏယေရှု’ နောဝ်ꩻ တနံကုဲင်ယို “နာꩻမဉ်ꩻပါꩻမုဲင်ꩻ” ရီခန်းနုဲင်းနဝ်ꩻသွူ။ “ခွေသွဉ်းမျိုꩻ အမဉ်ꩻနဝ်ꩻ ထွာ ‘လေဂေါင်’ နဝ်ꩻသွူ။ ပွိုးနုဲင်းမုဲင်ꩻနဲးတဲင်ꩻ ခွေသွဉ်းသီးနဝ်ꩻ ထွာဒျာႏထာꩻတဟဝ်တဝ်းဖုံႏနဝ်ꩻသွူ။ (‘လေဂေါင်’ အစွိုꩻတစွိုꩻကို ကပါဒါႏ ထာꩻတဟဝ်တဝ်းနောဝ်ꩻ မဉ်ꩻတွက်ယို ဗွိုန်ပီစွဉ်ႏ ‘ရောမ’ စဲ့ꩻတပ်ကိုစဲ့ꩻအာႏရဲင်ꩻရေင်ပေါင်ꩻအာဖုံႏနဝ်ꩻသွူ။”) သျောက်လဝ်းပြန်ႏခါꩻခန်းနုဲင်းနဝ်ꩻသွူ။

ထာꩻတဟဝ်တဝ်းဖုံႏနဝ်ꩻ တောင်ꩻပြန်ႏခန်း ‘ကိုယ်ႏတောႏယေရှု’ “နီသွဉ်းသီးမျိုꩻဖုံႏယို တွမ်ႏဝါးထန်ႏမွိုန်း အရပ်ဒေႏသယို” နုဲင်း နဝ်ꩻသွူ။ နဝ်ꩻအဗော့ꩻတဝိုက်ကအဝ်ႏ ကောင်တပူႏအလောင်းကအံႏလွဒါႏအဆာႏ ထော့ꩻ ဖွုံႏတဖုံႏအဝ်ႏသွူ။ နဝ်ꩻအချိန်ႏတွင်ꩻ ထာꩻတဟဝ်တဝ်းဖုံႏနဝ်ꩻ တောင်ႏပြန်ႏသျောက်ခါꩻခန်း ‘ကိုယ်ႏတောႏယေရှု’ “သꩻသညင်ꩻသွူ နီသွဉ်းသီးဖုံႏတဲင် အွဉ်ႏလွစ်လွေꩻဖေႏသွော့ꩻ ထော့ꩻဖုံႏထျꩻ” နုဲင်းနဝ်ꩻတဲင် ‘ကိုယ်ႏတောႏယေရှု’ နဝ်ꩻ “ဟဝ်သွူ လွေꩻလွꩻခန်း ဝွေꩻသီးကိုဟုဲင်း” မိန်းခန်းနုဲင်းနဝ်ꩻသွူ။

နဝ်ꩻအချိန်ႏတွင်ꩻ ထာꩻတဟဝ်တဝ်းဖုံႏနဝ်ꩻ ထန်ႏသွူလိုꩻအကိုတွော့ꩻ နွို့ꩻသော့ꩻသွူထော့ꩻကိုတဲင် ထော့ꩻဖုံႏနဝ်ꩻ ကတနွိုင်းထိုဒါႏ ခြောင်စောက်အတွိုင်ꩻ ဖင်းလင်ꩻသော့ꩻခန်းထီကိုတွော့ꩻ မျွုတ်ꩻသီထိုꩻလို့ခန်း ထီကိုနောဝ်ꩻသွူ။ ထော့ꩻအဖုံႏနဝ်ꩻနဝ်ꩻ ထော့ꩻအဗာႏပေါင်ꩻ ပါသော့ꩻ နီရေင်ရပ်နဝ်ꩻသွူ။

လိုꩻကထိန်ꩻတီဒါႏ ထော့ꩻနောဝ်ꩻသားဖုံႏနဝ်ꩻ ကထွိုင်ႏထီ အထွာအကုဲင်နုဲင်းယိုတဲင် ဖင်းနွို့သွူဒုံကိုတွော့ꩻ ‘ကိုယ်ႏတောႏယေရှု’ ကမာꩻဒါႏအခရာႏဖုံႏယို ဒေါ့ꩻနယ်လွခန်းလိုꩻတွိုင်ꩻနောဝ်ꩻသွူ။ လိုꩻက အဝ်ႏဒုံကိုသား ကထွိုင်ႏ တွိုႏအချိန်ႏတွင်ꩻ ထာꩻတဟဝ်တဝ်းဖုံႏ ကနွို့ꩻပူꩻခံႏဗာႏဒါႏ လိုꩻနဝ်ꩻ အုံစွူသွူထာꩻတဲင် ကꩻသွူခွမ်ꩻလာꩻဖုံႏတွော့ꩻ ဗွိုန် နုဲင်းသာႏမန်ႏလိုꩻတဖြာꩻ အုံအဝ်ႏထာꩻယို ထီႏမော့ꩻလွခန်းဝင်ꩻနဝ်ꩻသွူ။

လိုꩻဖုံႏနဝ်ꩻ ငမ်းထိုꩻလွꩻခန်းဝင်ꩻတဲင် ‘ကိုယ်ႏတောႏယေရှု’ ဖေႏကထန်ႏထိုꩻခင်ႏလမ်းယို ကွီလွꩻခန်းဝင်ꩻနဝ်ꩻသွူ။ ပွိုးနဝ်ꩻတွော့ꩻ ‘ကိုယ်ႏတောႏယေရှု’ ထင်ႏထိုꩻသွူဖြီလောင်းတဲင် ထာꩻတဟဝ်တဝ်းဖုံႏ နွို့ပူꩻခံႏဗာႏ က လွစ်ဒါႏလိုꩻနဝ်ꩻ သျောက်ကွီခန်းလွေꩻလွဉ်ခွင်ꩻ ‘ကိုယ်ႏတောႏယေရှု’ ဖဲ့ꩻချာနဝ်ꩻသွူ။

ကွဲတွော့ꩻ ‘ကိုယ်ႏတောႏယေရှု’ နဝ်ꩻ လိုꩻယို “လွေꩻခွင်ꩻတဖေႏနွိုင်ꩻတဝ်း၊ ဘုရာꩻသျင်ꩻ ကမာꩻခါꩻဖေႏဒါႏ ဝွေꩻ အကျောင်ꩻခရာႏဖုံႏယို လွေꩻဒေါ့ꩻနယ်သွော့ꩻ လိုꩻတွိုင်ꩻစွုမ်ႏဖြာꩻဟုဲင်း၊ ဘုရာꩻသျင်ꩻနဝ်ꩻ နာꩻအလောင်းမာꩻဖေႏ ကေꩻဇူꩻနုဲင်းမုဲင်ꩻလဲ့ꩻ ဒေါ့ꩻနယ်သွော့ꩻဟုဲင်း” မိန်းခန်းလိုꩻနဝ်ꩻနုဲင်းနဝ်ꩻသွူ။

နဝ်ꩻတွော့ꩻပါꩻနဝ်ꩻနဝ်ꩻ ထန်ႏထိုꩻညာꩻသွူဆချာ ‘ကိုယ်ႏတောႏယေရှု’ ကမာꩻဖေႏဝွေꩻ အကျောင်ꩻဖုံႏယိုလဲ့ꩻ လယ်ႏဒေါ့ꩻနယ်ခန်းလိုꩻတွိုင်ꩻဖုံႏနဝ်ꩻသွူ။ လိုꩻတွိုင်ꩻကထွိုင်ႏဟွိုန်ဝွေꩻအကျောင်ꩻယိုလဲ့ꩻ အံႏယောꩻလွꩻခန်းနဝ်ꩻသွူ။

‘ကိုယ်ႏတောႏယေရှု’ နောဝ်ꩻ ကျွꩻသဲင်ꩻချာခန်း ထီအွိုင်ႏအွိုးတဖဲ့ꩻ နဝ်ꩻသွူ။ ‘ကိုယ်ႏတောႏယေရှု’ ကထွိုင်ႏတွိုႏထီအွိုင်ႏအွိုးတဖဲ့ꩻအချိန်ႏတွင်ꩻ လိုꩻစွိုꩻအာတစွိုꩻနဝ်ꩻ အဝ်ႏဝဲင်ႏတွိုက်ခန်း ဝွေꩻအထျꩻ နဝ်ꩻသွူ။ လိုꩻစွိုꩻနဝ်ꩻကိုနဝ်ꩻ သွီႏလွဉ်ရောႏဂါႏ တဆီနီနေင်ႏရပ် ကခံႏစာꩻဗာႏဒါႏ ရောႏဂါႏသား လိုꩻမူႏတဖြာꩻပါလွဉ်သော့ꩻနဝ်ꩻသွူ။ ဖေႏကကုꩻဖေႏဝွေꩻမူႏတသီႏဖုံႏအတာႏ ဝွေꩻမူႏရွဉ်ခံႏကားက အောဝ်ႏယို ဖေႏလို့ခန်းတသီႏဆရာႏဖုံႏတဲ့ꩻ ဝွေꩻမူႏရောႏဂါႏဝေဒနာႏ နဝ်ꩻ ယိင်းဟုဲင်းဟုဲင်းလွဉ်ခန်းနဝ်ꩻသွူ။

ဝွေꩻမူႏနောဝ်ꩻ ကထွိုင်ႏဟွိုန် ‘ကိုယ်ႏတောႏယေရှု’ ကုꩻဖေႏနွောင်ꩻလိုꩻတခြိုင်ꩻသန်ꩻတဝ်းလိုꩻဖုံႏအာအချိန်ႏတွင်ꩻ “နီမဉ်ႏခွုင်းစံႏဗာႏ ‘ကိုယ်ႏတောႏယေရှု’ အရွုံႏအဗုဲင်ယို ခွေရောႏဂါႏ အီထိုꩻမားထိုꩻ” ယူႏခန်းနုဲင်းနောဝ်ꩻသွူ။ ပွိုးနဝ်ꩻတွော့ꩻ ဝွေꩻမူႏနောဝ်ꩻ လွေꩻလွဉ်သွူ ‘ကိုယ်ႏတောႏယေရှု’ ဖဲ့ꩻချာတဲင် ခွုင်းခန်း ‘ကိုယ်ႏတောႏယေရှု’ အရွုံႏ အဗုဲင်နဝ်ꩻသွူ။ တလဲင်ႏချင်ႏစွဉ်ႏဒျာႏ ဝွေꩻမူႏ သွီႏလွဉ်ꩻရောႏဂါႏယိုလဲ့ꩻ တလဲင်ႏချင်ႏအုံနွိုင်းထိုꩻမားခန်းဒျာႏနဝ်ꩻသွူ။

တလဲင်ႏချင်ႏစွဉ်ႏဒျာႏ ‘ကိုယ်ႏတောႏယေရှု’ နဝ်ꩻ ဝွေꩻတန်ႏခိုꩻတောႏ စွစ်ꩻလီလွေꩻထိုꩻယို အွဉ်ႏသတိချာသွူ တဲင် လဲ့ꩻထွားချာသွူတွော့ꩻ “ပါမုဲင်ꩻလွဉ်ခွုင်းခွေ” ရီခန်းနုဲင်းနဝ်ꩻသွူ။ တပဲ့ꩻတောႏဖုံႏနဝ်ꩻ ဘုရာꩻသျင်ꩻထျꩻ လိုꩻအာ ဖုံႏယို အဝ်ႏတနဲဉ်နွမ်ႏလွဝင်ꩻတဲင် “ပါမုဲင်ꩻလွဉ်ခွုင်းခွေ ပွိုးတမုဲင်ꩻဟောင်း” ရီပြန်ႏလဝ်းခန်းနုဲင်းနဝ်ꩻသွူ။

ပါꩻမူႏနဝ်ꩻနောဝ်ꩻ ထောက်လင်ꩻခင်ႏလေင်း ‘ကိုယ်ႏတောႏယေရှု’ ဖဲ့ငါတွော့ꩻ ငမ်းတနွို့ꩻခန်းဒျာႏနဝ်ꩻသွူ။ နဝ်ꩻဆချာ ဝွေꩻမူႏကမာꩻဗာႏ အကျောင်ꩻခရာႏဖုံႏယို ဒေါ့ꩻနယ်သျောက်ဒင်ႏခန်း ‘ကိုယ်ႏတောႏယေရှု’ တဲင် ဝွေꩻမူႏ ရောႏဂါႏ ကထိုꩻမားထိုꩻဒါႏ ပွုံႏယိုလဲ့ꩻ ဒေါ့ꩻနယ်ခန်းဒျာႏနဝ်ꩻသွူ။ ‘ကိုယ်ႏတောႏယေရှု’ နောဝ်ꩻ မိန်းခန်းဝွေꩻမူႏ “နာꩻ ထာꩻယွုမ်းအံႏနဝ်ꩻ ထွာကုꩻဖေႏချာနာꩻတဲင် လွေꩻချံႏချံႏသားသား ခန်းလုဲင်း” မိန်းခန်းနုဲင်းနဝ်ꩻသွူ။

သျင်ႏမဿဲခရစ်နွို့ꩻ ၈:၂၈-၃၄; ၉:၂၀-၂၂; မာကုခရစ်နွို့ꩻ ၅:၁-၂၀; ၅:၂၄b- ၃၄; သျင်ႏလုကာခရစ်နွို့ꩻ ၈:၂၆-၃၉; ၈:၄၂b-၄၈ မꩻ သမ္မာႏလိတ်ကျမ်ꩻ ငဝ်းခြုဲင်း