၂၅ - ‘စာတန်’ မာရ်ႏနတ် သွေကုဲင် ကိုယ်ႏတောႏ ‘ယေရှု’

‘ကိုယ်ႏတောႏယေရှု’ ခံႏထူႏထွူ ထီမျွုတ်ꩻမင်္ဂလာႏတဲင် တလဲင်ႏချင်ꩻစွဉ်ႏဒျာႏ ဘုရာꩻသျင်ꩻဉာဏ်ႏအရောင်ႏ တောႏနဝ်ꩻနဝ်ꩻ ဟဲ့ꩻလွေꩻခန်း ထာꩻခြာကန္တာရကိုနဝ်ꩻသွူ။ ‘ကိုယ်ႏတောႏ ယေရှု’ နဝ်ꩻ အုံခန်းခင်ႏလမ်းနဝ်ꩻကို ညစွဉ်ႏနီꩻပေါင်ꩻ လစ်ဆီနဝ်ꩻသွူ။ အချိန်ႏ နဝ်ꩻတွော့ꩻ ဝွေꩻနဝ်ꩻအုံရှောင်ႏထာꩻအံႏတွင်ꩻ ‘စာတန်’ မာရ်ႏနတ်နဝ်ꩻ ‘ကိုယ်ႏ တောႏ ယေရှု’ ဖေႏကမာꩻမာႏ အပဲစ်တဲင် လွဉ်သွေကုဲင်အီႏတာႏ ဖျော်လွဉ်ခန်းဒျာႏနဝ်ꩻသွူ။

အရီးသွတ်ꩻ ‘စာတန်’ မာရ်ႏနတ်နဝ်ꩻ ‘ကိုယ်ႏတောႏ ယေရှု’ ယို “နာꩻနဝ်ꩻ မိဉ်ထွာဘုရာꩻပိုခိုတဲင် လုံးတူႏဖုံႏယို ပြောင်ꩻလုဲင်ႏသွူ တခိုးတွော့ꩻ အံႏဟုဲင်း” ဒေါ့ꩻဟွိုန်ခန်းနုဲင်းနဝ်ꩻသွူ။

ကွဲတွော့ꩻ ‘ကိုယ်ႏတောႏ ယေရှု’ နဝ်ꩻ ‘စာတန်’ မာရ်ႏနတ်ယို “လိုꩻဖုံႏနဝ်ꩻ သက်ဖေႏကမွန်အီတွက်တာႏ လွိုႏအပ်တဝ်း ပေါင်မုန့်တဲင် လွိုႏအပ်ဒျာႏ ဘုရာꩻသျင်ꩻအမိန်းတရာꩻတောꩻဖုံႏတဲင် ဘုရာꩻသျင်ꩻတရာꩻတောႏ ပိဋ ကတ်ကို တဲမ်းထန်ႏ” ဗွောင်ပျꩻနယ်ꩻခန်းနုဲင်းနဝ်ꩻသွူ။

နဝ်ꩻဆချာ ‘စာတန်မာရ်ႏနတ်’ နဝ်ꩻ ဟဲ့ꩻလွေꩻသွူ ‘ကိုယ်ႏတောႏ ယေရှု’ ဘုရာꩻကျောင်ꩻတောႏအထိုꩻသွတ်ꩻ ထျꩻတဲင် “နာꩻနဝ်ꩻ မဉ်ႏထွာဘုရာꩻသျင်ꩻပိုခိုꩻလဲ့ꩻ ပကျောက်ꩻလင်ꩻဟံႏလောင်းဟုဲင်း။ ပွိုးတမုဲင်ꩻနဲတဲင် ဘုရာꩻသျင်ꩻ တနံဗျဟ္မာႏဖုံႏနဝ်ꩻ ခလားနာꩻခင်ႏကတွိုက်လုံးတူႏယို မဲ့ꩻအီႏလွဉ်ယွော့ꩻဆွုမ်ꩻနာꩻ ထွာတဲမ်းသေꩻခါႏနုဲင်းနဝ်ꩻ” ဒေါ့ꩻ ရိုꩻခန်းနုဲင်းနဝ်ꩻသွူ။

ကွဲတွော့ꩻ ‘ကိုယ်ႏတောႏ ယေရှု’ နဝ်ꩻ ‘စာတန်မာရ်ႏနတ်’ ထွဉ်ႏအတွိုင်ꩻတမာꩻတဝ်းတဲင် “သီဖုံႏအသျင်ꩻကထွာဒါႏ ဘုရာꩻသျင်ꩻယို ဖေႏကစံႏသပ်မွိုန်း ဒေါ့ꩻဟွိုန်ခါꩻလဲဉ်းလိုꩻတွိုင်ꩻဖုံႏ” ဒေါ့ꩻဟွိုန်ခန်း နုဲင်းနဝ်ꩻသွူ။

နဝ်ꩻဆချာ ‘စာတန်မာရ်ႏနတ်’ နဝ်ꩻ ကမ္ဘာႏလောင်းကအဝ်ႏဒါႏ ခမ်းနုဲင်ႏငံႏကားကအဝ်ႏယို အွဉ်ႏနယ်ꩻခန်း ‘ကိုယ်ႏတောႏ ယေရှု’ နဝ်ꩻသွူ။ ‘စာတန်မာရ်ႏနတ်’ နောဝ်ꩻ နုဲင်ႏငံႏဖုံႏယို အာႏရဲင်ꩻတန်တခွိုင်းမုဲင်ꩻ၊ ချံႏသာႏတခွိုင်းမုဲင်ꩻနောဝ်ꩻလဲ့ꩻအွဉ်ႏနယ်ပါခန်း ‘ကိုယ်ႏတောႏ ယေရှု’ နဝ်ꩻသွူ။ ‘စာတန်မာရ်ႏနတ်’ နဝ်ꩻ “နာꩻမဉ်ႏခေါက်ꩻ ဝုဲင်ႏကိုႏကွယ်ႏ ခွေနဝ်ꩻ ထာꩻကားကအဝ်ႏယို ခွေဖေႏနာꩻ” ဒေါ့ꩻခန်း ‘ကိုယ်ႏတောႏယေရှု’ နုဲင်းနဝ်ꩻသွူ။

‘ကိုယ်ႏတောႏယေရှု’ ရိုꩻ “စာတန်မာရ်ႏနတ် ထန်ႏညာꩻထိုꩻ ကညာꩻရာꩻ ခွေဟုဲင်း။ ဘုရာꩻသျင်ꩻတရာꩻတောႏကို ဘုရာꩻသျင်ꩻနဝ်ꩻ ဝွေꩻလိုꩻဖုံႏယို သီဖုံႏကိုႏကွယ်ႏသျင်ꩻကထွာဒါႏ ကိုႏကွယ်ႏသွော့ꩻငါ ဘုရာꩻသျင်ꩻငါတွော့ꩻ ထူႏဂွုဏ်ႏအံႏရောႏသွော့ꩻငါ ဘုရာꩻသျင်ꩻငါ ဟုဲင်း မိန်းခါꩻနုဲင်းနဝ်ꩻသွူ” ဖြေႏပြန်ႏဟွိုန်ချာခန်းနုဲင်းနဝ်ꩻသွူ။

‘စာတန်မာရ်ႏနတ်’ နဝ်ꩻ အွဉ်ႏကုဲင်ခါꩻသွူ ဝွေꩻသွေကုဲင်မုꩻဆလꩻတပါလွဉ်နွောင်ꩻတဝ်း ‘ကိုယ်ႏတောႏယေရှု’ တွော့ꩻ ထန်ႏထိုꩻခန်းဒျာႏ နဝ်ꩻသွူ။ နဝ်ꩻဆချာ တနံဗျဟ္မာႏဖုံႏနောဝ်ꩻ လွဉ်သွူတွော့ꩻ ပျုꩻစုꩻထိန်ꩻထွားခန်း ‘ကိုယ်ႏတောႏယေရှု’ နဝ်ꩻသွူ။

သျင်ႏမဿဲခရစ်နွို့ꩻ ၄:၁-၁၁; မာကုခရစ်နွို့ꩻ ၁:၁၂-၁၃; သျင်ႏလုကာခရစ်နွို့ꩻ ၄:၁-၁၃ မꩻ သမ္မာႏလိတ်ကျမ်ꩻ ငဝ်းခြုဲင်း