၃ -ထီသန်

အချိန်ႏခါꩻထွိုင်ႏညလွဉ်နဝ်ꩻ ကမ္ဘာႏလောင်းလိုꩻအာ လွဉ်ခန်းဒျာႏနဝ်ꩻသွူ။ ဝွေꩻသီးဖုံႏနဝ်ꩻ သꩻတကျင်ꩻထွူတကာႏတဝ်း ကျံꩻမွေး စွဉ်ႏနဝ်ꩻသွူ။ လိုꩻဖုံႏထွိုင်ႏရွိုင်ꩻအာတဲင် ဘုရာꩻသျင်ꩻနဝ်ꩻ ကမ္ဘာႏတဖြုံႏလွုမ်းယို ထီဖေႏနေးကဗဉ်ႏကုဲင်ထိုꩻ ဆွုံꩻဖျက်ခန်း နုဲင်းနဝ်ꩻသွူ။

ကွဲတွော့ꩻ ဘုရာꩻသျင်ꩻနဝ်ꩻ နိက်သက်မွေးငါႏ ‘နောဧ’ နဝ်ꩻသွူ။ ဝွေꩻနဝ်ꩻ လိုꩻရွိုင်ꩻလိုꩻကျံꩻဖုံႏအခါႏ ထွာဒျာႏသူႏတောႏကောင်ꩻတဖြာꩻ နဝ်ꩻသွူ။ ဘုရာꩻသျင်ꩻနဝ်ꩻ အီႏမာꩻသန်ထီ ဒေါ့ꩻခန်း ‘နောဧ’ နဝ်ꩻသွူ။ နဝ်ꩻတွော့ꩻ ဘုရာꩻသျင်ꩻနဝ်ꩻ ‘နောဧ’ ယို ဖေႏကမာꩻလွေꩻခန်း သင်္ဘောႏတန်တဆွိုင်ꩻနဝ်ꩻမိန်းခန်းဒျာႏနဝ်ꩻသွူ။

ဘုရာꩻသျင်ꩻနဝ်ꩻ ‘နောဧ’ သင်္ဘောႏယို အဆွာꩻ မီတာတရျာꩻလစ်ဆီ၊ အဒွေါင်ႏ မီတာနီဆီသွံတွမ်ႏ အထို တဆီသွံဒဿမငတ်ꩻမီတာ ထွဉ်ႏမာꩻထိုခန်း ခွုင်းနဝ်ꩻသွူ။ ‘နောဧ’ နဝ်ꩻ သင်္ဘောႏယို မာꩻခန်းတွမ်ႏသေင်ႏ၊ အ ထပ်သွံထပ်တွမ်ႏအခန်ꩻအာဖုံႏ၊ အဒို့ꩻတဗာႏတွမ်ႏသော့ꩻပါ တခါꩻပေါက်ꩻတပေါက်ꩻသွူ။ သင်္ဘောႏနဝ်ꩻ ‘နောဧ’ တွမ်ႏဝွေꩻသီးလမ်းသားတကာႏတဝ်း ကောင်လောင်းသတ္တဝါႏ တွိုင်ႏယို ထီမဉ်ႏသန်ချိန်ႏ သꩻဆွော့ꩻလꩻနဝ်ꩻသွူ။

‘နောဧ’ နဝ်ꩻ လွိုက်ꩻနာႏဘုရာꩻသျင်ꩻငဝ်းနဝ်ꩻသွူ။ ဝွေꩻတွမ်ႏ ဝွေꩻပိုခိုသွံဖြာꩻနဝ်ꩻ ဘုရာꩻသျင်ꩻ ဒေါ့ꩻအတွိုင်ႏမာꩻလွေꩻခန်း သင်္ဘောႏ နဝ်ꩻသွူ။ သင်္ဘောႏနဝ်ꩻ တန်ငါႏတဲင် မာꩻလွေꩻညခန်း နေင်ႏပေါင်ꩻညဆွာꩻနဝ်ꩻသွူ။ ‘နောဧ’နဝ်ꩻ ထီကအီသန်လွဉ်အကျောင်ꩻ ဖေႏသတိလွေꩻခန်း လိုꩻလောင်ꩻလင်ဖုံႏ နာႏခံႏသွော့ꩻဘုရာꩻသျင်ꩻငဝ်း ‘နောဧ’ဒေါ့ꩻနုဲင်းနဝ်ꩻတဲ့ တယွုမ်းလွတဝ်းသွူ။

ဘုရာꩻသျင်ꩻနောဝ်ꩻ ‘နောဧ’ သီးလမ်းသားတွမ်ႏ တိရိစ္ဆာန်ႏဖုံႏအတာႏ အဆာႏဖေႏကလွုံးစုသေခန်းဒျာႏနဝ်ꩻသွူ။ အချိန်ႏ ကထွိုင်ႏတွိုႏ ဘုရာꩻသျင်ꩻနဝ်ꩻ လိုꩻသွစ်ဖြာꩻကထွာဒါႏ ‘နောဧ’၊ ‘နောဧ’ မာ အပိုသွံဖြာꩻတွမ်ႏ ဝွေꩻသီးမာဖုံႏထင်ႏခန်းသင်္ဘောႏလောင်းနဝ်ꩻသွူ။

ဘုရာꩻသျင်ꩻနဝ်ꩻ တိရိစ္ဆာန်ႏအကို အထီးတဗာႏအမွူးတဗာႏ ထီမဉ်သန်လွဉ် ဖေႏကလꩻလုံႏခြုံႏရေꩻသော့ꩻပါခန်း ‘နောဧ’ သင်္ဘောႏကိုသွူ။ ဘုရာꩻသျင်ꩻနောဝ်ꩻ တိရိစ္ဆာန်ႏမျိုꩻစွုမ်ႏအကို အထီးနွတ်ဗာႏ အမွူးနွတ်ဗာႏ ပူႏဇောႏနွောင်ꩻအီ စွန်ꩻကျဲꩻသက်တာႏ သော့ꩻဖေႏပါသွူ။ ဝွေꩻသီးကားကအဝ်ႏ ထွိုင်ႏတွိုႏသော့ꩻလို့ သင်္ဘောႏကိုနဝ်ꩻ ဘုရာꩻသျင်ꩻနမ်းကိုယ်ꩻတိုင်ႏ ပေ့ꩻခန်းတခါꩻနဝ်ꩻသွူ။

တွိုႏနဝ်ꩻတွော့ꩻ ခမ်းနဝ်ꩻ လော့လင်ခန်းဒျာႏ မွူးယာတဲ့နဝ်ꩻ မွူးဟာတဲ့နဝ်ꩻ လော့လင်ခန်း အနီꩻလစ်ဆီနဝ်ꩻသွူ။ ကမ္ဘာႏဟံႏအကို ထီဖုံႏဖဲက်ꩻထန်ႏလွဉ်ခန်းဒျာႏနဝ်ꩻသွူ။ အထိုꩻသွတ်ꩻကောင်ဖုံႏအပါ ကမ္ဘာႏလောင်းကအဝ်ႏဒါႏမှန်ႏသမှျယို ထီသဲးဗဉ်ႏထိုꩻခန်းဒျာႏနဝ်ꩻသွူ။

သင်္ဘောႏအကိုတပါတဝ်း လိုꩻတွမ်ႏတိရိစ္ဆာန်ႏအလောင်ႏလင်ဖုံႏနဝ်ꩻ သီထိုꩻခန်းဒျာႏနဝ်ꩻသွူ။ သင်္ဘောႏနဝ်ꩻ အဝ်ႏပေါ်သွူထီလောင်းတဲင် ကာႏကွယ်ႏဖေႏသင်္ဘောႏကို ကပါဒါႏ လိုꩻတွမ်ႏ တိရိစ္ဆာန်ႏဖုံႏနဝ်ꩻသွူ။

ခမ်းလော့ꩻ ထွိုင်ႏဆွိုး သင်္ဘောႏနဝ်ꩻ ထီအလောင်း ပါလွဉ်ခန်းထီ ငတ်ꩻလာရပ်နဝ်ꩻသွူ။ နဝ်ꩻအချိန်ႏတွင်ꩻ ထီစလင်ꩻချာနဝ်ꩻသွူ။ တွိုႏတနီꩻတွော့ꩻ သင်္ဘောꩻနဝ်ꩻ အဝ်ႏနွိုင်းခန်း ကောင်တဖြုံႏနာ နဝ်ꩻသွူ။ ကွဲတွော့ꩻ ကမ္ဘာႏတန်ယို ထီအဝ်ႏစဲးနေကနဝ်ꩻသွူ။ ထွိုင်ႏညသွံလာဆချာနောဝ်ꩻ ထီႏစခန်း ကောင်နာဖုံႏနဝ်ꩻသွူ။

ကထွိုင်ႏတွိုႏမွူးနီꩻလစ်ဆီနီꩻနောဝ်ꩻ ‘နောဧ’ အွဉ်ႏလွစ်ခန်း ‘ဝါး စောက်အာႏ’ တဗာႏနဝ်ꩻတွော့ꩻ ဖေႏကထွုမ်ႏအံႏအဆာႏ ထာꩻသဲင်အရပ်နဝ်ꩻသွူ။ ဝါးနောဝ်ꩻ ထွဉ်ႏအံႏအဆာႏ ထာꩻသဲင်အရပ်အခေါက်ခေါက်အပြန်ႏပြန်ႏတဲ့ တမော့ꩻတဝ်းနဝ်ꩻသွူ။

နဝ်ꩻဆချာတွော့ꩻ ‘နောဧ’ နဝ်ꩻဟဲ့ꩻခန်း ‘ဝါးတောက်တူး’ နဝ်ꩻသွူ၊ ဝါးနောဝ်ꩻတဗာႏ ဖေႏကထွုမ်ႏအံႏယင်း အဆာႏထာꩻသဲင်အရပ် နဝ်ꩻအွဉ်ႏလွစ်ထဲင်းစွဉ်ႏလဲ့ ထွုမ်ႏတမော့ꩻတဝ်းတဲင် သဲင်ꩻထေ့ယင်း ‘နောဧ’ ထျꩻနဝ်ꩻသွူ။ ညလွဉ်ယင်းတပတ်အတွင်ꩻ အွဉ်ႏလွစ်ယင်း ‘ဝါးတောက်တူး’ တလဲင်ႏတဲင် ဖြောင်းလောင်း အဲင်ႏသဲင်ꩻ ပါတွမ်ႏအဆာႏသေင်ႏပင်နဝ်ꩻသွူ။ ထီဖုံႏလင်ꩻထိုꩻသွူတဲင် သေင်ႏမွူးဖုံႏနောဝ်ꩻ ယိုခါꩻနောဝ်ꩻတန်လွဉ်ထဲင်းယင်းလဲဉ်းနဝ်ꩻသွူ။

‘နောဧ’ နောဝ်ꩻ ပွိုးယင်းတပတ်တွော့ꩻ အွဉ်ႏလွစ်ယင်း ‘ဝါးတောက်တူႏ’ သွံလဲင်ႏမျောက်နဝ်ꩻသွူ၊ ယိုခါꩻချိန်ႏနဝ်ꩻ ထီတဲ့ꩻထွိုင်ႏသဲင် အုံပဆားခရာႏထွိုင်ႏအဝ်ႏတဲင် သဲင်ꩻလွဉ်တဝ်းဒွုမ်နဝ်ꩻသွူ။

ထွိုင်ႏညနီလာတွော့ꩻ ဘုရာꩻသျင်ꩻနဝ်ꩻ မိန်းခန်း ‘နောဧ’ “နောဧ သီးလမ်းသားတွမ်ႏ တိရိစ္ဆာန်ႏဖုံႏယို ထန်ႏသင်္ဘောႏလꩻသွူ။ လွူးပို လွူးလီꩻ လွူးအာအာထွူတဲင် ကမ္ဘာႏတန်အကို အွဉ်ႏတိုꩻပွာꩻအာအာသွော့ꩻလိုꩻနဝ်ꩻဟုဲင်း” မိန်းခန်းနုဲင်းနဝ်ꩻသွူ။ နဝ်ꩻတွော့ꩻ ‘နောဧ’ တွမ်ႏဝွေꩻသီးလမ်းသားဖုံႏနဝ်ꩻ အဝ်ႏသင်္ဘောႏကို ထန်ႏလွဉ်ခန်းဒျာႏနဝ်ꩻသွူ။

‘နောဧ’ နဝ်ꩻ လင်သွူသင်္ဘောႏတဲင် ပူႏဇောႏအီဘုရာꩻတာႏ တယ်ႏသေꩻခန်း ပလ္လင်ႏတဗာႏတွော့ꩻ လူႏသက်ပူႏဇောႏကလꩻဒါႏ တိရိစ္ဆာန်ႏလောင်းလင်နဝ်ꩻတဲ့ လူႏသက်ပူႏဇောႏခန်းဒျာႏနဝ်ꩻသွူ။ ဘုရာꩻသျင်ꩻ ထွိုင်ႏထီႏ ‘နောဧ’ ကပူႏဇောႏလူႏဒါႏသက်နုဲင်းယိုနဝ်ꩻ ကေꩻနပ်ထွူတဲင် ဝွေꩻတွမ်ႏဝွေꩻလမ်းသားယို ဖေႏခန်းထာꩻ ဟဝ်နဝ်ꩻသွူ။

ဘုရာꩻသျင်ꩻနောဝ်ꩻ “ခွေနဝ်ꩻ ပွိုးလိုꩻဖုံႏထာꩻတဟဝ်တဝ်းအတာႏ ကမ္ဘာႏဟံႏယို ခွေတတွိုက်ꩻတဝ်းဒွုမ် ကျိန်ႏစာႏ။ နေးတွမ်ႏထီသန်တဲ့ တဖျက်ယားကုဲင်ဒွုမ် ကမ္ဘာႏဟံႏတန်။ ပွိုးနေးမုဲင်ꩻနဲတဲင် လိုꩻဖုံႏနဝ်ꩻ ထွာမာꩻအပဲစ်အွိုးပေႏပေႏခါကာႏ” မိန်းရိုꩻခန်းနုဲင်းနဝ်ꩻသွူ။

နဝ်ꩻတွော့ꩻ ဘုရာꩻသျင်ꩻနဝ်ꩻ ဝွေꩻကတိသက်သေႏပထမသွတ်ꩻတဗာႏအထွာ ဖန်ဆင်ꩻခါꩻစွဉ်ႏ တလင်ꩻသင်ႏ တဗာႏသွူ။ မို့ꩻလောင်း တလင်ꩻသင်ႏပေါႏလွဉ်တွိုင်ႏ ဘုရာꩻသျင်ꩻတွမ်ႏလိုꩻဖုံႏနဝ်ꩻ ထွာယူႏလꩻချာအီဘုရာꩻသျင်ꩻကတိငဝ်းဖုံႏနဝ်ꩻသွူ။

ကမ္ဘာႏဦꩻကျမ်ꩻ ၆-၈ မꩻ သမ္မာႏလိတ်ကျမ်ꩻ ငဝ်းခြုဲင်းအာ