၄၇ - ‘ပေါလု’ တွမ်ႏ ‘သိလ’ သီတွိုႏလွဉ် ‘ဖိလိပ္ပိ’

‘ရှောလု’ တွိုႏလွဉ် ‘ရောမ’ အင်ပါယာအတွင်ꩻခွေမဉ်ꩻယို ‘ရောမ’ မဉ်ꩻကထွာဒါႏပြောင်ꩻလုဲင်ႏခန်း ‘ပေါလု’ နဝ်ꩻသွူ။ တွိုႏတနီꩻတွော့ꩻ ‘ပေါလု’ တွမ်ႏ ဝွေꩻသွꩻတဖြာꩻကထွာဒါႏ ‘သိလ’ သီးဖုံႏနဝ်ꩻနွို့ꩻသွူ ‘ဖိလိပ္ပိ’ ဝေင်ꩻကိုတဲင်အီႏသွဉ်သင်ကိုယ်ႏတောႏ ‘ယေရှု’ အ ကျောင်ꩻအတွက်တွိုႏလွေꩻခန်းဒျာႏနဝ်ꩻသွူ။ ဝွေꩻသီးဖုံႏနဝ်ꩻလိုꩻဖုံႏစုဗူႏသွူတဲင်ဆုတောင်ꩻဝွတ်ပြုခန်းဘုရာꩻဝေင်ႏအ သောင်လွေꩻသွူထီခြောင်ထျꩻတဲင် ခင်ႏလမ်းနဝ်ꩻကိုလွေꩻခွဲတွမ်ႏ ‘လုဒိ’ ကဟဲ့ꩻဒါႏကုန်ႏသယ်ႏမူႏတဖြာꩻနဝ်ꩻသွူ။ ဝွေꩻမူႏနဝ်ꩻဘုရာꩻ သျင်ꩻယိုထွာကိုယ်ကွယ်လိုꩻတဖြာꩻနဝ်ꩻသွူ။

ဘုရာꩻသျင်ꩻနဝ်ꩻ ‘လုဒိ’ ယိုဖေႏကလက်ခံႏကိုယ်ႏတောႏ ‘ယေရှု’ ငဝ်းသတင်ꩻဖုံႏယိုမာꩻဖေႏခန်းဒျာႏနဝ်ꩻသွူ။ ‘ပေါလု’ တွမ်ႏ ‘သိလ’ နဝ်ꩻဝွေꩻမူႏတွမ်ႏ ဝွေꩻမူႏမိသားစုဖုံႏယိုမာꩻဖေႏခန်းထီမျွုတ်ꩻမင်္ဂလာႏနဝ်ꩻသွူ။ ဝွေꩻမူႏနဝ်ꩻ ‘ပေါလု’ တွမ်ႏ ‘သိလ’ ယိုဖေႏကအုံႏဝွေꩻမူႏလမ်းနဝ်ꩻကွပ်ဖစ်ဟဲ့ꩻတဲင်အုံႏခန်းဝွေꩻမူႏလမ်းနဝ်ꩻသွူ။

‘ယုဒ’ လိုꩻမျိုꩻဖုံႏဝတ်ပျုꩻဘုရာꩻခင်ႏလမ်းနဝ်ꩻကိုနဝ်ꩻ ‘ပေါလု’ တွမ်ႏ ‘သိလ’ သီးဖုံႏနဝ်ꩻတွမ်ႏလိုꩻအမျာꩻဖုံႏ ခွဲတသေႏစွုမ်ႏနီꩻနီꩻသွူ။ ဝွေꩻသီးဖုံႏနဝ်ꩻ အနီꩻတွိုင်ꩻထောင်တဖူꩻခင်ႏလမ်းနဝ်ꩻကိုတဲင်ထာꩻတဟဝ်တဝ်းကပူႏ ကပ်ဒါႏအသွဉ်းအသယ်ႏမူႏတဖြာꩻ နဝ်ꩻပါလွဉ်သေႏသေႏဝွေꩻသီးဖဲ့ꩻချာနဝ်ꩻသွူ။ လိုꩻမူႏနဝ်ꩻနဝ်ꩻတနံကျံꩻကပူႏကပ် ဒါႏတွမ်ႏအစွန်ꩻယိုလိုꩻဖုံႏအနာဂါတ်နိမိတ်ထွားဟော်ꩻဒေါ့ꩻသေႏသေႏတဲင်ဝွေꩻဗွေႏအတွက်ထွုံႏဖေႏရွဉ်ဖုံႏနဝ်ꩻသွူ။

သွဉ်းသယ်ႏမူႏနဝ်ꩻနဝ်ꩻ ဝွေꩻသီးဖုံႏလွေꩻထာꩻချိန်ႏတွင်ꩻမပျက်မဆွိုးခြဝ်သွူငဝ်းတဲင် “လိုꩻယိုဖုံႏနဝ်ꩻအမျတ် တန်သွတ်ꩻဘုရာꩻသျင်ꩻ သွဉ်းသယ်ႏဖုံႏနဝ်ꩻသွူ။ ဝွေꩻသီးဖုံႏနဝ်ꩻသီဖုံႏဖေႏကကယ်ႏဒင်ႏခံႏဗာႏအနယ်ꩻဖုံႏယိုမဲ့ꩻဒေါ့ꩻနယ်” ဝွေꩻမူႏနဝ်ꩻဆင်ႏဆင်ႏဒေါ့ꩻခြဝ်တဲင်ထွာ ‘ပေါလု’ သꩻအနှောက်သျှက်နဝ်ꩻသွူ။

အဆုဲင်ꩻသွတ်ꩻအနီꩻနဝ်ꩻအသွဉ်းအသယ်ႏမူႏခြဝ်ငဝ်းချိန်ႏတွင်ꩻ ‘ပေါလု’ နဝ်ꩻလဲ့ꩻထွားသွူဝွေꩻမူႏထျꩻတဲင် ထာတဟဝ်တဝ်းကအဝ်ႏဒါႏဝွေꩻမူႏနမ်းခန္ဓာႏကိုယို “တွမ်ႏကိုယ်ႏတောႏ ယေရှု နာႏမတောႏ တဲင်ထန်ႏလွဉ်ဝွေꩻမူႏ နမ်းခန္ဓာႏကိုဟုဲင်း” ကထွိုင်ႏဒေါ့ꩻနုဲင်းနဝ်ꩻ တဲင်တလဲင်ႏချင်ႏစွဉ်ႏဒျာႏထာꩻတဟဝ်တဝ်းနဝ်ꩻအဝ်ႏဝွေꩻမူႏအကိုထန်ႏ ထိုꩻခန်းဒျာႏနဝ်ꩻသွူ။

တနံကုဲင်နဝ်ꩻတအဝ်ႏတဝ်းအခါတွင်ꩻ အသွဉ်းအသယ်ႏပါꩻမူႏပေႏ နဝ်ꩻအနာႏဂါတ်ဖုံႏယို တသေထီႏရီးနွောင်ꩻတဝ်း ဒွုမ်နဝ်ꩻဝွေꩻသီးဖုံႏအွဉ်ႏသတိလွꩻဝင်ꩻတဲင် ကပဲင်ႏဆဲင်ႏဒါႏအသွဉ်းအသယ်ႏပါꩻမူႏပေႏယို အဝါꩻနဝ်ꩻဒေါသထန်ႏမွေးမုဲင်းစွဉ်ႏ နဝ်ꩻသွူ။ ပွိုးတမုဲင်ꩻနဲတဲင် အနာႏဂါတ်ယိုဝွေꩻတသေထီႏရီးနွောင်ꩻတဝ်းဒွုမ်တဲင် ကွပ်ဝွေꩻတထုမ်ႏဖေႏနွောင်ꩻတဝ်းဒွုမ် ဝွေꩻ အဗွေႏရွဉ်ခံꩻဥစ္စာႏအကျောင်ꩻနဝ်ꩻသွူ။

နောဝ်ꩻတွော့ꩻအသွဉ်းသယ်ႏမူႏပေႏလမ်းဗွေႏသားနဝ်ꩻဟဲ့ꩻလွေꩻသွူ ‘ပေါလု’ တွမ်ႏ ‘သိလ’ သီးဖုံႏ ‘ရောမ’ အားဏာႏ ပဲင်ႏဖုံႏထျꩻတဲင်တွဲႏနက်သွူတွော့ꩻသော့ꩻခန်းထောင်ႏကိုနဝ်ꩻသွူ။

ဝွေꩻသီးဖုံႏနဝ်ꩻ ‘ပေါလု’ တွမ်ႏ ‘သိလ’ ယိုအွဉ်ႏသေꩻခန်းလုံႏချွုံႏရေꩻအအာသွတ်ꩻကအဝ်ႏဒါႏ အချွုတ်ထောင်ႏဖဲ့ꩻနဝ်ꩻ သွူ။ ဝွေꩻသီးဖုံႏ နဝ်ꩻ ဝွေꩻသီးခင်ႏဖုံႏယိုစွိုင်သေခန်း တွမ်ႏချွုတ်တွုံးနဝ်ꩻသွူ။ ကွဲႏတွော့ꩻထာꩻလွိုက်ꩻမွူႏကွို့ꩻနာꩻချိန်ႏတွင်ꩻ ‘ပေါလု’ တွမ်ႏ ‘သိလ’ သီးဖုံႏနဝ်ꩻတွမ်ႏငဝ်းသချင်ꩻချီးမွမ်းခန်းဘုရာꩻသျင်ꩻနဝ်ꩻသွူ။

တလဲင်ႏချင်ႏစွဉ်ႏဒျာႏ ဟံႏတသွိုးသန်ထာꩻတဗာႏထွာလွဉ်သွူတဲင် ထောင်ႏတခါꩻဖုံႏယိုဗွောင်ထိုꩻခန်းဒျာႏ နဝ်ꩻသွူ။ ထောင်ꩻသားဖုံႏကစွိုင်ခါꩻဒါႏပသီႏဖြွီꩻဖုံႏလဲ့ꩻလွစ်ထန်ႏထိုꩻခန်းဒျာႏနဝ်ꩻသွူ။

နဝ်ꩻဆချာထောင်ႏဗိုလ်ဗေင်ႏထာꩻထွိုင်ႏထွိုင်ႏချိန်ႏတွင်ꩻ ထီႏခန်းထောင်ႏတခါꩻဖုံႏဗွောင်တဲင် ထင်းခန်းထောင်ႏ သားဖုံႏလွင်းထန်ႏလို့လဲဉ်းနဝ်ꩻသွူ။ ဝွေꩻနဝ်ꩻ ထောင်ႏသားဖုံႏလွင်းထန်ႏလွစ်ထန်ႏထိုꩻတွော့ꩻ ‘ရောမ’ အာဏာပဲင်ႏဖုံႏ မာꩻ ဗဉ်ႏထိုꩻလဲဉ်းထင်းနေးနဝ်ꩻတဲင် နမ်းတွမ်ႏနမ်းမာꩻသီချာခန်းဒျာႏနဝ်ꩻသွူ။ နဝ်ꩻဆချာ ‘ပေါလု’ နဝ်ꩻ ထီႏထိုꩻခန်းလိုꩻနဝ်ꩻ တွော့ꩻ “အွဉ်ႏနွိုင်းဟုဲင်း။ နမ်းတွမ်ႏနမ်းဖေႏကဆာ တွမ်ႏမာꩻချာမွုန်း။ နီဖုံႏအလို့အဝ်ႏလွိုႏဒျာႏခင်ႏလမ်းယို” ခြဝ် ငဝ်းဒေါ့ꩻ ဟွိုန်ခန်းနုဲင်းနဝ်ꩻသွူ။

ထောင်ႏဗိုလ်နဝ်ꩻနဝ်ꩻ တနီႏတနွော့ꩻလွဉ်သွူ ‘ပေါလု’ တွမ်ႏ ‘သိလ’ ထျꩻတဲင် “ခွေဖေႏကခံႏဗာႏ ကယ်ႏ ဒင်ႏနဝ်ꩻ အီႏမာꩻဗာႏ နုဲင်းနဝ်ꩻ” ကထွိုင်ႏရီလွဉ်နုဲင်းနဝ်ꩻချိန်ႏ ‘ပေါလု’ နဝ်ꩻ “ယွုမ်းအံႏသွော့ꩻအသျင်ႏသချင်ႏကထွာ ဒါႏ ယေရှု ယို မဲ့ꩻနာꩻတွမ်ႏနာꩻမိသားစုꩻအီႏခံႏဗာႏဒျာႏကယ်ႏဒင်ႏ” ဖြေႏပြန်ႏဟွိုန်ချာခန်းနုဲင်းနဝ်ꩻသွူ။ နဝ်ꩻဆချာ ထောင်ႏဗိုလ်နဝ်ꩻ ‘ပေါလု’ တွမ်ႏ ‘သိလ’ သီးယိုဟဲ့ꩻလွေꩻသွူဝွေꩻလမ်းတွော့ꩻဝွေꩻသီးထာꩻဆာဖုံႏယိုပသေဖေႏခန်း ဒျာႏနဝ်ꩻသွူ။ ‘ပေါလု’ နဝ်ꩻဝွေꩻလမ်းကိုကအဝ်ႏဒါႏလိုꩻတွိုင်ꩻယိုဒေါ့ꩻဟော်ꩻနယ်ခန်း ကိုယ်ႏတောႏ ‘ယေရှု’ သတင်ꩻ ဟဝ်ဖုံႏနဝ်ꩻသွူ။

ထောင်ႏဗိုလ်တွမ်ႏဝွေꩻမိသားစုꩻနဝ်ꩻယွုမ်းလွကိုယ်ႏတောႏ ‘ယေရှု’ တဲင် ‘ပေါလု’ တွမ်ႏ ‘သိလ’ သီးဖုံႏနဝ်ꩻ မာꩻဖေႏခန်းဝွေꩻသီးဖုံႏထီမျွုတ်ꩻမင်္ဂလာႏနဝ်ꩻသွူ။ နဝ်ꩻဆချာထောင်ႏဗိုလ်နဝ်ꩻလွူးသွူ ‘ပေါလု’ တွမ်ႏ ‘သိလ’ အအံႏ အအွတဲင်ပျောႏသွင်ႏငီꩻခန်းဝင်ꩻနဝ်ꩻသွူ။

တွိုႏတနီꩻတွော့ꩻဝေင်ꩻအွဉ်ငါသားဖုံႏနဝ်ꩻအွဉ်ႏလွစ်သွူ ‘ပေါလု’ တွမ်ႏ ‘သိလ’ ထောင်ႏတဲင်ထန်ႏခွါႏလွေꩻခန်း ‘ဖိလိပ္ပု’ နဝ်ꩻသွူ။ ‘ပေါလု’ တွမ်ႏ ‘သိလ’ နဝ်ꩻလွေꩻနှုတ်ဆက်သွူ ‘လုဒိ’ တွမ်ႏသွꩻ ပေႏအလင်တဲင်ထန်ႏထိုꩻခန်းဝေင်ꩻ နဝ်ꩻသွူ။ ‘ယေရှု’ သတင်ꩻဟဝ်ယိုဖေႏကပွာꩻတိုးထွူတဲင်ယွုမ်းကိုယ်ႏတောႏသားတိုꩻပွာꩻအာလွဉ် ခန်းဒျာႏနဝ်ꩻသွူ။

‘ပေါလု’ တွမ်ႏကယွုမ်းဒါႏအွဉ်ငါသားဖုံႏနဝ်ꩻလွေꩻဆွိုက်ခန်းတဖူꩻအွိုးဝေင်ꩻဖုံႏနဝ်ꩻသွူ။ ဝွေꩻသီးဖုံႏနဝ်ꩻလိုꩻတွိုင်ꩻ ယိုဖန်းဖြယ်ဖေႏသွူ ကိုယ်ႏတောႏ ‘ယေရှု’ သတင်ꩻဟဝ်ဖုံႏတဲင်သွဉ်သင်ဖေႏခန်းဒျာႏနဝ်ꩻသွူ။ ဝွေꩻသီးဖုံႏနဝ်ꩻဘုရာꩻ ကျောင်ꩻကိုကအဝ်ႏဒါႏဖေႏကသွဉ်ဆွိုက်ယင်းယိုနှိုꩻဆောႏတမာꩻသွူ လိတ်ယဟန်ႏဖုံႏနဝ်ꩻထွာ လွဉ်ခန်း ခရစ်တော်ပိဋ ကတ် လိတ်အုပ်ဖုံႏနဝ်ꩻသွူ။

တမန်တောႏ ၁၆:၁၁-၄၀ မꩻ သမ္မာႏလိတ်ကျမ်ꩻ ငဝ်းခြုဲင်း