၄၉ - ဘုရာꩻသျင်ꩻပဋိညာဉ်ႏအတသာ

တနံဗျဟ္မာႏတပါꩻနဝ်ꩻ လိုꩻမူႏတဖြာꩻကထွာဒါႏ ‘မာရိ’ ယိုဝွေꩻမူႏ နဝ်ꩻအီႏလွူးပိုခိုတောႏဘုရာꩻသျင်ꩻဒေါ့ꩻ ခန်းနုဲင်းနဝ်ꩻသွူ။ ဝွေꩻမူႏ နဝ်ꩻထွာမူႏနံꩻစင်ႏစဲစ်တဖြာꩻရိုꩻကီလဲ့ꩻကကြောင်းစင်ဒါႏဘုရာꩻထာꩻသေဉာဏ်ႏအရောင်ႏ နဝ်ꩻလင်ꩻလွဉ်သွူဝွေꩻမူႏထျꩻတဲင်အွဉ်ႏအဝ်ႏနမ်းလောင်းခန်းဝွေꩻမူႏနဝ်ꩻသွူ။ ဝွေꩻမူႏနဝ်ꩻလွူးဖွာꩻသွူပိုခိုတောႏ တဖြာꩻတဲင်ပိုခိုတောႏယိုထွဉ်ႏဟဲ့ꩻဖန်ခန်းအမဉ်ꩻ ‘ယေရှု’ နဝ်ꩻသွူ။ နဝ်ꩻတွော့ꩻ ကိုယ်ႏတောႏ ‘ယေရှု’ နဝ်ꩻဘုရာꩻ သျင်ꩻလဲ့ꩻထွာ၊ လိုꩻလဲ့ꩻထွာနဝ်ꩻသွူ။

ကိုယ်ႏတောႏ ‘ယေရှု’ နဝ်ꩻနမ်းတွမ်ႏနမ်းထွာဘုရာꩻအကျောင်ꩻနဝ်ꩻဖေႏကပျꩻနွောင်ꩻယိုမာꩻခန်းအံႏယောႏ ခရာႏဖုံႏနဝ်ꩻသွူ။ လွေꩻသွူထာꩻထီလောင်းတဲင်အွဉ်ႏနွိုင်းထိုꩻခန်းတလီꩻသန်ဖုံႏနဝ်ꩻသွူ။ ဝွေꩻ နဝ်ꩻအွဉ်ႏငိမ်ꩻချံꩻခွꩻ ရောင်းသွူလိုꩻဖုံႏထာꩻဆာရောႏဂါႏတဲင် တနံꩻကျံꩻဖုံႏယိုလဲ့ꩻဝါးထန်ႏထိုꩻဖေႏနဝ်ꩻသွူ။ ဝွေꩻနဝ်ꩻကသီထိုꩻလဲဉ်းဒါႏ လိုꩻဖုံႏယိုအွဉ်ႏမွန်ချာသွူတဲင် တခိုးပေါင်မုန့်ငတ်ꩻဖြုံႏတွမ်ႏထပေႏနီဗာႏယိုအီႏလွူးလိုꩻပေါင်ꩻငတ်ꩻရေင်လွိုအ တွက်ထာꩻအံႏဖေႏကလွံးနဝ်ꩻဖန်ꩻဆင်ꩻဖေႏခန်းနဝ်ꩻသွူ။

ကိုယ်ႏတောႏ ‘ယေရှု’ နဝ်ꩻထွာသွူဆရာႏဟဝ်တဖြာꩻတဲင်ဝွေꩻကသွဉ်သင်ꩻဒါႏအခရာႏယိုလဲ့ꩻမဲဉ်ႏဟဝ်ယံ မွေးငါႏယိုဖုံႏတဲ့ သွဉ် သင်ꩻဖေႏနဝ်ꩻသွူ။ ဝွေꩻနဝ်ꩻထွာဘုရာꩻသျင်ꩻပိုခိုတောႏတဲင်ဝွေꩻ မိန်းသေꩻအတွိုင်ꩻလိုꩻတွိုင်ꩻနဝ်ꩻ လွိုက်ꩻနာႏလွေꩻဒျာႏနဝ်ꩻသွူ။ ဥပမာႏအနေႏလိုꩻတွိုင်ꩻယို နမ်းတွမ်ႏနမ်းကရက်အတွိုင်ꩻဝွေꩻတပါꩻအလောင်းယိုလဲ့ꩻ ရက်ဗွိုန်နုဲင်းဗာႏသွဉ်သင်ꩻဖေႏခန်းနုဲင်းနဝ်ꩻသွူ။

ဝွေꩻနဝ်ꩻ ဘုရာꩻသျင်ꩻယို သီဖုံႏပဲင်ႏဆဲင်ႏမုꩻဖုံႏအပါကားကအဝ်ႏ နဝ်ꩻ လွိုႏရက်ကယ်ႏထဲင်းဒျာႏယိုလဲ့ꩻသွဉ်သင်ꩻဖေႏ ခါꩻလဲဉ်းသီဖုံႏ နဝ်ꩻသွူ။

ကိုယ်ႏတောႏ ‘ယေရှု’ နဝ်ꩻလွိုကယ်ꩻထဲင်းပဲင်ႏဆဲင်ႏဗာႏ ကမ္ဘာႏလောင်းကအဝ်ႏဒါႏမန်ႏသမျှယို ကအုံအဝ်ႏ ဗာႏဘုရာꩻသျင်ꩻ နိဗ္ဗာန်ႏခံꩻဝေင်ꩻနဝ်ꩻယိင်းယံလွိုထဲင်း မိန်းခန်းနုဲင်းနဝ်ꩻသွူ။

လိုꩻယဟန်ႏဖုံႏနဝ်ꩻထွာလက်ခံႏကိုယ်ႏတောႏ ‘ယေရှု’ တဲင်လိုꩻ နဝ်ꩻဖုံႏနဝ်ꩻမဲ့ꩻအီႏခံႏဗာႏဘုရာꩻသျင်ꩻကယ်ႏဒင်ႏနဝ်ꩻသွူ။ ကွဲတွော့ꩻလိုꩻယဟန်ႏဖုံႏနဝ်ꩻတလက်ခံႏတဝ်းဝွေꩻနဝ်ꩻသွူ။ လိုꩻယဟန်ႏဖုံႏ နဝ်ꩻ ဗွိုန်ဟံႏဗဲ့ဟဝ်တဗာႏ ဝွေꩻနဝ်ꩻမိန်းဟွိုန်ခါꩻ နုဲင်းနဝ်ꩻသွူ။ ပွိုးတ မုဲင်ꩻနဲတဲင်ဝွေꩻသီးဖုံႏနဝ်ꩻ ကွပ်လက်ခံႏကိုယ်ႏတောႏ ‘ယေရှု’ သ တင်ꩻဟဝ်ဖုံႏတဲင်ဘုရာꩻသျင်ꩻနဝ်ꩻ ထွာကယ်ႏဒင်ႏဖေႏဝွေꩻသီးဖုံႏ နဝ်ꩻသွူ။ ကွဲတွော့ꩻ လိုꩻယဟန်ႏနဝ်ꩻ ဗွိုန်နုဲင်းဟံႏတဖူꩻကိုဆွို့ကတဲ့ꩻကတတဲင် ဘုရာꩻသျင်ꩻ ငဝ်းဖြုံႏပေါင်ꩻနဝ်ꩻထွာထိုꩻဗွိုန်နုဲင်း ခြွီခူꩻဖုံႏကထဲ့ꩻလင်ꩻထိုꩻတဖူꩻလောင်း တမုဲင်ꩻမွူးမꩻ တဒေါ့ꩻဖွဉ်လွဉ်တဝ်း နဝ်ꩻသွူ။ လိုꩻ နဝ်ꩻဖုံႏနဝ်ꩻ လွိုဆန်ꩻလွꩻသွူ ကိုယ်ႏတောႏ ‘ယေရှု’ ငဝ်းသတင်ꩻဖုံႏတဲင်ထွာလွိုဆန်ꩻထိုꩻလွခန်း လိုꩻကအီႏနွို့ꩻသော့ꩻ ဘုရာꩻသျင်ꩻသီး နိဗ္ဗာန်ႏခံꩻဝေင်ꩻတောႏအကိုလဲ့ꩻ ထွာနဝ်ꩻသွူ။

ဘုရာꩻသျင်ꩻနဝ်ꩻ ဒုစရိုက်သားဖုံႏယိုရက်လွိုမွေးငါႏ ကိုယ်ႏတောႏ ‘ယေရှု’ မိန်းခန်းနုဲင်းနဝ်ꩻသွူ။ ဝွေꩻနဝ်ꩻ ခွင်ꩻလွစ်ဖေႏသွူဝွေꩻသီးဖုံႏအပဲစ်တဲင် လိုꩻနဝ်ꩻဖုံႏနဝ်ꩻမိဉ်ႏအွဉ်ႏထွာခန်းဝွေꩻ ပိုခိုပိုမူႏဖုံႏနဝ်ꩻသွူ။

ကိုယ်ႏတောႏ ‘ယေရှု’ နဝ်ꩻဘုရာꩻသျင်ꩻလွꩻထီႏငါႏအပဲစ်ဖုံႏယိုလဲ့ꩻသွဉ်သင်မိန်းဟွိုန်ခန်းဒျာႏနဝ်ꩻသွူ။ ကွပ် ‘အာဒမ်’ တွမ်ႏ ‘ဧဝ’ သီးဖုံႏမာꩻခါꩻအပဲစ်တဲင်ဝွေꩻဆုဲင်ꩻချာသားဖုံႏနဝ်ꩻလဲ့ꩻ မာꩻလွခန်းအပဲစ်ဖုံႏနဝ်ꩻသွူ။ ကမ္ဘာႏလောင်း ကအဝ်ႏဒါႏလိုꩻတွိုင်ꩻလိုꩻတွိုင်ꩻနဝ်ꩻ မာꩻလွသွူအပဲစ်တဲင် တွမ်ႏဘုရာꩻသျင်ꩻကွာႏညာꩻထိုꩻခန်းဝင်ꩻနဝ်ꩻသွူ။ လိုꩻတွိုင်ꩻနဝ်ꩻ ထွာလွခန်းဘုရာꩻသျင်ꩻသီးရန်ႏသူႏနဝ်ꩻသွူ။

ကွဲတွော့ꩻဘုရာꩻသျင်ꩻနဝ်ꩻ လိုꩻကယွုမ်းဒါႏဝွေꩻပိုခိုယိုဖေႏကဖေႏ မွိုန်းအပဲစ်ဖုံႏအတွက် တဖြာꩻဝွေꩻကထွာဒါႏ ဝွေꩻပိုခိုယိုနီဖုံႏအတွက်ကဖေႏဆပ်ဒါႏအနယ်ꩻနဝ်ꩻလဲ့ꩻရက်နိက်သက်မွေးငါႏ နဝ်ꩻသွူ။ နဝ်ꩻလွုမ်ꩻမကာႏ ကယွုမ်းဒါႏ ကိုယ်ႏတောႏ ‘ယေရှု’ လိုꩻတွိုင်ꩻယိုတွမ်ႏထာꩻဝရအသက်မွန်ဗန်ခွင်အုံအဝ်ႏလွေꩻဗာႏနဝ်ꩻသွူ။

သီဖုံႏနဝ်ꩻ အဝ်ႏမာꩻတသေႏထာꩻတဟဝ်တဝ်းတဲင်သီတာႏထွိုက် တန်ႏဒျာႏနဝ်ꩻသွူ။ ဘုရာꩻသျင်ꩻနဝ်ꩻသီဖုံႏယိုထွိုက် တန်ႏဒျာႏဖေႏအ ပဲစ်ထာꩻသီလဲ့ꩻ ဘုရာꩻသျင်ꩻနဝ်ꩻ ကိုယ်ႏတောႏ ‘ယေရှု’ ယိုထွဉ်ႏသီသွူစူယာꩻကပ်ထွန်ႏလောင်းတွော့ꩻနီဖုံႏ အပဲစ်ကိုယ်ႏစာꩻဖေႏခါꩻ စွဉ်ႏအပဲစ်ဖုံႏနဝ်ꩻသွူ။

ကိုယ်ႏတောႏ ‘ယေရှု’ နဝ်ꩻအခိန်ႏမုဲင်ꩻခါတယဝ်းမာꩻအပဲစ်ဖုံႏတ အဝ်ႏတဝ်းသွူ။ ကွဲတွော့ꩻဝွေꩻနဝ်ꩻအဟုဲင်း သွတ်ꩻထာꩻသီဖုံႏအပါအပဲစ်ကားကအဝ်ႏအတွက်လက်ခံႏခန်းထာꩻသီနဝ်ꩻသွူ။ ဝွေꩻနဝ်ꩻ နာꩻတွမ်ႏကမ္ဘာႏလောင်းက အဝ်ႏဒါႏလိုꩻသီးဖုံႏအပဲစ်ကားကအဝ်ႏယို အီႏထူႏလွေꩻအွိုးအညာꩻအတွက်တွမ်ႏအနယ်ꩻယိုတဲင် ထွာခန်းအယံသွတ်ꩻ စွဉ်ꩻလွစ်ဖေႏဆပ်လိုꩻတဖြာꩻနဝ်ꩻသွူ။ ဘုရာꩻ သျင်ꩻနဝ်ꩻကိုယ်ႏတောႏ ‘ယေရှု’ အလောင်းကယွုမ်းအံႏဒါႏလိုꩻဖုံႏယို အဟုဲင်းသွတ်ꩻအပဲစ်ဖုံႏအပါအပဲစ်ကားကအဝ်ႏယို ခွင်ꩻလွစ်ဖေႏနွောင်ꩻအတာႏကိုယ်ႏတောႏ ‘ယေရှု’ နဝ်ꩻ ဝွေꩻတွမ်ႏ ဝွေꩻပူႏဇောႏတဗာႏအနေႏတဲင် ထွာဖေႏဆပ်ခါꩻဒျာႏနဝ်ꩻသွူ။

သီဖုံႏနဝ်ꩻထာꩻဟဝ်ဖုံႏယိုမာꩻစွဉ်ႏရိုꩻကီလဲ့ꩻဘုရာꩻသျင်ꩻနဝ်ꩻအီႏ ကယ်ႏဒင်ႏဖေႏသီဖုံႏတမွေးတဝ်း။ တွမ်ႏဝွေꩻ ဖေႏကထွာသွꩻဖဝ်ႏနာꩻကိုယ်ႏတိုင်ႏကမာꩻနွောင်ꩻနဝ်ꩻ တမုဲင်းမꩻတအဝ်ႏတဝ်းသွူ။ နဝ်ꩻကိုယ်ႏစာꩻသီဖုံႏအတွက် ဖေႏလွေꩻထိုꩻသွူအသက် စူယာꩻကပ်ထွန်ႏလောင်းတဲင် ဘုရာꩻသျင်ꩻနဝ်ꩻအဝ်ႏထာꩻသီမꩻကမွန်တချာဒါႏဘုရာꩻသျင်ꩻ ပိုခိုတောႏကထွာကိုယ်ႏတောႏ ‘ယေရှု’ ယို မဉ်ႏယွုမ်းမꩻလꩻသွူ။ သီဖုံႏမဉ်ႏယွုမ်းအံႏဝွေꩻယို ဘုရာꩻသျင်ꩻနဝ်ꩻ မဲ့ꩻအီႏ ခွင်ꩻလွစ်ဖေႏသီဖုံႏအပဲစ်ကားကအဝ်ႏနဝ်ꩻသွူ။

လက်ခံႏသွူကိုယ်ႏတောႏ ‘ယေရှု’ တဲင်ဝွေꩻယိုဆရာႏအထွာက လက်ခံႏဒါႏလိုꩻတွိုင်ႏယို ထွာဘုရာꩻသျင်ꩻ အီႏကယ်ႏဒင်ႏနဝ်ꩻသွူ။ ကွဲတွော့ꩻယွုမ်းအံႏမုꩻတအဝ်ႏတဝ်းကိုယ်ႏတောႏ ‘ယေရှု’ လိုꩻဖုံႏယို ဘုရာꩻသျင်ꩻနဝ်ꩻ တကယ်ႏ ဒင်ႏဖေႏတဝ်းနဝ်ꩻသွူ။ နာꩻနဝ်ꩻ ချံꩻသာႏငါႏ၊ ဆင်ꩻရယ်ꩻငါႏ၊ ထွာလိုꩻခို၊ ထွာလိုꩻမူႏ၊ အသက်တန်၊ အသက်ပေႏ၊ နာꩻနဝ်ꩻ အုံခင်ႏလမ်းမုဲင်ꩻကိုစစွဉ်ႏနုဲင်းနဝ်ꩻစားဖုံႏယိုအရေꩻတပါတဝ်းနဝ်ꩻသွူ။ ဘုရာꩻသျင်ꩻနဝ်ꩻရက်နိက်သက်သွူ နာꩻတဲင်တွမ်ႏနာꩻဖေႏကထွာနွောင်ꩻသွꩻဖဝ်ႏအတွက်မဲဉ်အွဉ်ႏယွုမ်းအံႏငါႏကိုယ်ႏတောႏ ‘ယေရှု’ နဝ်ꩻသွူ။

ကိုယ်ႏတောႏ ‘ယေရှု’ ကဟဲ့ꩻဗာႏဒါႏနာꩻယိုဖေႏကယွုမ်းဝွေꩻတွမ်ႏ ဖေႏကမာꩻထီမျွုတ်ꩻမင်္လာႏအတွက် ထွာဟဲ့ꩻဗာႏနာꩻဒျာႏမိန်းခန်း နုဲင်းနဝ်ꩻသွူ။ ကိုယ်ႏတောႏ ‘ယေရှု’ နဝ်ꩻထွာ ‘မေရှိယ’ တဲင်ထွာဘုရာꩻသျင်ꩻ ပိုခိုတောႏ တဖြာꩻယို သီဖုံႏယွုမ်းနေဟောင်း။ နာꩻတွမ်ႏနာꩻခံႏထူႏသွူအပဲစ်အဝ်ႏသားတဖြာꩻတဲင်နာꩻအပဲစ်ဖုံႏအတွက်ဘုရာꩻ သျင်ꩻအထျꩻကဆိမ်ꩻလျောႏဒါႏအပြစ်ဖုံႏယိုခံႏထူႏသင်ꩻငါႏ ထင်းနေနုဲင်းနဝ်ꩻဟောင်း။ နာꩻအပဲစ်ဖုံႏယိုအီႏထူႏလွေꩻအီ အွိုးအညာꩻအတာႏ ကိုယ်ႏတောႏ ‘ယေရှု’ နဝ်ꩻစူယာꩻကပ်ထွန်ႏလောင်းယိုဖေႏခါꩻအပဲစ်ကရိုꩻယို ယွုမ်းနေဟောင်း။

နာꩻနဝ်ꩻယွုမ်းသွူကိုယ်ႏတောႏ ‘ယေရှု’ တဲင်နာꩻအတွက်ကိုယ်ႏတောႏ ‘ယေရှု’ ကဆောင်ႏရွက်ဖေႏဒါႏစစရာႏ ရာႏဖုံႏယို မိဉ်ႏဝွန်ႏခံႏနဝ်ꩻ ‘စာတန်’ ယိုကခေ့ꩻကရစ်ဒါႏဝွေꩻနန်ꩻတောႏအကိုသူႏ အီႏအုပ်ချွုတ်ဆွိုက်နာꩻတမာꩻနွောင်ꩻ တဝ်းနဝ်ꩻသွူ။ ယိုခါအတွင်ꩻဘုရာꩻသျင်ꩻနဝ်ꩻနာꩻအလောင်းယိုဗွိုန်နုဲင်းထာꩻလေထွာအုပ်စိုꩻလိုꩻနဝ်ꩻသွူ။ ထာꩻလေအ ရောင်ႏနုဲင်ႏငံႏတောႏဘုရာꩻသျင်ꩻနဝ်ꩻနာꩻကမာꩻတသေႏဒါႏအပဲစ်ဖုံႏယိုဖေႏကမာꩻမွိုန်းရဲးပေ့ꩻဖေႏသွူနာꩻတဲင် ကဆိမ်ꩻ လျောႏဒါႏနာꩻအမဲဉ်ႏအသက်မွန်အုံအဝ်ႏနယ်ꩻယိုမဲ့ꩻအီႏဖေႏအပ်ဒျာႏနဝ်ꩻသွူ။

နာꩻနဝ်ꩻမိဉ်ႏထွာသွူကိုယ်ႏတောႏ ‘ယေရှု’ ဖဲ့ꩻချာသားတဖြာꩻနဝ်ꩻ ကိုယ်ႏတောႏ ‘ယေရှု’ ကမာꩻခါꩻဒါႏအခရာႏဖုံႏ တဲင် ဘုရာꩻသျင်ꩻ ခွင်ꩻလွစ်ခါꩻဖေႏထွူလဲဉ်းဒျာႏနဝ်ꩻသွူ။ ယိုခါꩻချိန်ႏတွင်ꩻဘုရာꩻ သျင်ꩻနဝ်ꩻနာꩻယို ရန်ႏသူႏတဖြာꩻကိုယ်ႏစာꩻ ဖေႏကထွာအဗော့ꩻသွတ်ꩻသွꩻဖဝ်ႏတဖြာꩻ သတ်မှတ်ထိုꩻလဲဉ်းနဝ်ꩻသွူ။

နာꩻနဝ်ꩻထွာလဲဉ်းဘုရာꩻသျင်ꩻသွꩻဖဝ်ႏတဲင်မဉ်ႏထွာထိုꩻဆရာႏ ‘ယေရှု’ အသွဉ်းအသယ်ႏတဖြာꩻတဲင် ကိုယ်ႏ တောႏ ‘ယေရှု’ က သွဉ်သင်ဖေႏဒါႏနာꩻအခရာႏဖုံႏယို မဲ့ꩻသီဖုံႏမဲဉ်လွောက်နာႏလွဉ်ꩻဒျာႏနဝ်ꩻသွူ။ နာꩻနဝ်ꩻထွာကိုယ်ႏတောႏ ‘ယေရှု’ လွိုက်ဖဲ့ꩻချာသားတဖြာꩻရိုꩻကီလဲ့ꩻ ‘စာတန်’ မာရ်ႏနတ်နဝ်ꩻ နာꩻဖေႏကမာꩻအပဲစ်ဖုံႏယို မဲ့ꩻအီႏကဝ်ꩻယောင်ႏစွေꩻကုဲင် နာꩻနဝ်ꩻသွူ။ ကွဲတွော့ꩻဘုရာꩻသျင်ꩻ နဝ်ꩻဝွေꩻအီႏမာꩻကဒေါ့ꩻဒါႏဖုံႏယို အဝ်ႏမာꩻတသေႏနဝ်ꩻသွူ။ နာꩻနဝ်ꩻနာꩻအပဲစ်ဖုံႏယို မိဉ်ႏ ဝွန်ႏခံႏဝွေꩻအထျꩻနဝ်ꩻ အီႏခွင်ꩻလွစ်ဖေႏနာꩻအပဲစ်ဖုံႏ ဒေါ့ꩻဟွိုန်ခန်းနုဲင်းနဝ်ꩻသွူ။ ဝွေꩻနဝ်ꩻ နာꩻယိုအပြစ်ဒုစရိုက်ဖုံႏတွမ်ႏ ဖေႏ ကနွို့နွောင်ꩻတွိုက်ꩻပွယ်ꩻအတွက် မဲ့ꩻအီႏဖေႏနာꩻရဲင်ꩻအာႏနဝ်ꩻသွူ။

ဘုရာꩻသျင်ꩻနဝ်ꩻသီဖုံႏယို ဆုတောင်ꩻအတာႏတွမ်ႏဝွေꩻနှုတ်ကပါတ်တရာꩻတောႏဖုံႏယိုဖေႏကလွူꩻထွားအတာႏ ဒေါ့ꩻဟွိုန်ခန်းနုဲင်းနဝ်ꩻသွူ။ ဝွေꩻနဝ်ꩻနာꩻယိုတွမ်ႏကိုယ်ႏတောႏ ‘ယေရှု’ တပဲ့ꩻတောႏလင်ဖုံႏဖေႏကဝတ်ပျုꩻဆုတောင်ꩻငီꩻဝင်ꩻ ဒေါ့ꩻဟွိုန်ခန်းနုဲင်းနဝ်ꩻသွူ။ နာꩻ နဝ်ꩻလဲ့ꩻနာꩻအတွက်ဘုရာꩻသျင်ꩻကမာꩻခါꩻဒါႏသမ္မာႏတရာꩻဖုံႏယိုအဝ်ႏလွိုႏဒေါ့ꩻနယ်သင်ငါႏ လိုꩻအလင်ꩻဖုံႏနဝ်ꩻသွူ။ နာꩻမဉ်ႏမာꩻကားကအဝ်ႏဖုံႏယိုနဝ်ꩻမဲ့ꩻအီႏထွာလွဉ်ဒျာႏဝွေꩻသွꩻဖဝ်ႏမြယ်ꩻတဖြာꩻနဝ်ꩻသွူ။

ရောမ ၃:၂၁-၂၆, ၅:၁-၁၁; သျင်ႏယောဟန်ခရစ်နွို့ꩻ ၃:၁၆; မာကု ခရစ်နွို့ꩻ ၁၆:၁၆; ကောလောပဲ ၁:၁၃-၁၄; ၂ ကောရိန္သု ၅:၁၇-၂၁; ၁ သျင်ႏယောဟန်ခရစ်နွို့ꩻ ၁:၅-၁၀ မꩻ သမ္မာႏလိတ်ကျမ်ꩻ ငဝ်းခြုဲင်း