၈ - 'ယောသပ်’ တွမ်ႏ ၀ေꩻမိသားစုꩻဖုံႏ ဘုရာꩻသျင်ꩻကယ်ႏဒင်ႏပုံႏ

နေင်ႏပေါင်ꩻကထွိုင်ႏညဆွာꩻထိုꩻအချိန်ႏနဝ်ꩻ ယာကုပ်ယို အသက်အရွယ်ႏဖြားဖြီးထိုꩻထွူတဲင် ဝွေꩻအရက်သွတ်ꩻ ပိုခို ‘ယောသပ်’ ယိုအွဉ်ႏစွလွေꩻခန်း ဝွေꩻတိရိစ္ဆာန်ႏကအဝ်ႏထေင်းထမ်ႏ ဆောင်ႏ ရွက်ဖေႏဒါႏ အဝေးထျꩻတဲင် ယံကလွေꩻထွား စဲစ်ဆေꩻနဝ်ꩻသွူ။

‘ယောသပ်’ ဖူးဝေးဖုံႏနဝ်ꩻ ‘ယောသပ်’ ယို ထွာနီဖုံႏအဖာ အရက်သွတ်ꩻပိုတွော့ꩻ အီႏထွာအုပ်ချွုတ်နီသား ဗေင်ႏမင်းထာꩻ နုဲင်းနဝ်ꩻတွော့ꩻ လွꩻထီႏရောင် ‘ယောသပ်’ သွူ။ ‘ယောသပ်’ ကထွိုင်ႏလွဉ် အဝေးဖုံႏထျꩻတဲင် အဝေးဖုံႏဆွမ်ꩻထွူ စာထိုꩻခန်း လိုꩻကူꩻကားသားထျꩻသွူ။

‘ယောသပ်’ အဖူးအဝေးဖုံႏ ကထွိုင်ႏအီႏသဲင်ꩻလမ်းတဲင် ထူႏသွူ ခွမ်ꩻလာꩻတွော့ꩻ နျꩻသော့ꩻထွူ ဆိတ်ꩻသွီႏ တဲင် အွဉ်ႏနယ်ခန်း ဝွေꩻသီးအဖာ ဖေႏနေးကထင်း ထာꩻသားရွိုင်ꩻထာꩻခြာ မာꩻသီထိုꩻ ‘ယောသပ်’ နုဲင်းနဝ်ꩻသွူ။ ‘ယာကုပ်’ နဝ်ꩻ သꩻပေႏထိုꩻမွေးမုဲင်းစွဉ်ႏသွူ။

ကူႏလီႏကူꩻကားသားဖုံႏနဝ်ꩻ ဟဲ့လွေꩻခန်း ‘ယောသပ်’ အီဂျစ် သွူ။ အီဂျစ်ယို နိုင်းထီခြောင် တန်ထျꩻထွာအာႏရဲင်ꩻတန် နုဲင်ႏငံႏတန် တနုဲင်ႏငံႏသွူ။ ကူႏလီႏကူꩻကားသားဖုံႏ ‘ယောသပ်’ ယို စာဖေႏခန်း ကချံႏသာႏ အစိုးရအရာႏအဝ်ႏ တဖြာꩻထျꩻသွူ။ ‘ယောသပ်’ နဝ်ꩻ ခစားမာꩻဖေႏဟဝ်အဗွေႏတဲင် ဘုရာꩻသျင်ꩻဖေႏဝွေꩻထာꩻယံဖုံႏနဝ်ꩻသွူ။

‘ယောသပ်’ ဝွေꩻဗွေႏအမာနဝ်ꩻ ကျိုꩻစာꩻဗေင်ႏညီꩻခန်း ‘ယောသပ်’ သွူ။ ကွဲတွော့ꩻ ‘ယောသပ်’ ဆန်ꩻကျင် လွိုဆန်ꩻဘုရာꩻသျင်ꩻတဲင် မိဉ်မာꩻတဝ်းအပဲစ်တွော့ꩻဗေင်ႏညီꩻတဝ်းတဲင်ဝွေꩻမူႏဒေါ့ꩻသꩻထန်ႏမွေးထာꩻတွော့ꩻ‘ယောသပ်’ ဖေႏကတွိုႏထောင်ႏကိုဒင်ႏအပဲစ် စွတ်စွယ်ꩻခန်းနဝ်ꩻသွူ။ ထဲ့ခန်းထောင်ႏတယဝ်း သစ္စာႏအဝ်ႏ ဘုရာꩻသျင်ꩻတဲင် ဘုရာꩻသျင်ꩻဖေႏ ‘ယောသပ်’ ထာꩻမာꩻယံကောင်းချီးသွူ။

ကထွိုင်ႏညထိုꩻနီနေင်ႏ ‘ယောသပ်’ ယို အပဲစ်ကြောင်းစင်ဒျာႏလဲဉ်းလဲ့ အဝ်ႏသော့ꩻနေက ထောင်ကိုသွူ။ တွိုႏတဟာတွော့ꩻ ‘ဖာရို’ ကရိုꩻဒါႏ ‘အီဂျစ်’ ခွန်နဝ်ꩻ ဗေင်ႏမင်းခန်း သꩻအနှောက်ဆျုက်တန်ကဖေႏဒါႏထာꩻဗေင်ႏမင်းတန်နီဗာႏသွူ၊ ထာꩻဗေင်ႏမင်းဖုံႏယို ဝွေꩻခွန်ပညာꩻဒါႏသားတမုဲင်ꩻတဲ့ꩻ တဖောႏထန်ႏနွောင်ꩻတဝ်းသွူ။

ဘုရာꩻသျင်ꩻနဝ်ꩻဖေႏခန်း ‘ယောသပ်’ ဖောႏထန်ႏနွောင်ꩻ ထာꩻဗေင်ႏမင်း အဓိပ္ပါယ်ႏ စွန်ꩻထီသွူ။ ‘ခွန်ဖာရို’ ထွဉ်ႏဟဲ့ထန်ႏခန်း ‘ယောသပ်’ ထောင်ႏကိုတဲင် ထွဉ်ႏဖောႏထန်ႏဝွေꩻ ခွန်ထာဗေင်ႏမင်းတွော့ꩻ “ဘုရာꩻသျင်ꩻ ဒေါ့ꩻဟွိုန်ခန်း အဆာႏအဟာရ အီလွောင်ႏလွဉ် နွတ်နေင်ႏ၊ ကပ်ဘေႏ အီႏမော့ꩻဗာႏနွတ်နေင်ႏ” နုဲင်းနဝ်ꩻသွူ။

‘ဖာရိုခွန်’ နဝ်ꩻ နိက်သက်သဘောႏကျမွေး ‘ယောသပ်’ တဲင် ‘အီဂျစ်’ တခွင်ꩻယို ဒုတိယအာႏဏာႏအအဝ်ႏသွတ်ꩻလိုꩻ သတ်မတ်ခါꩻစွဉ်ႏနုဲင်းနဝ်ꩻသွူ။

‘ယောသပ်’ နဝ်ꩻ လိုꩻဖုံႏ အဆာႏအဟာႏရ ကလွိုင်ႏနေင်ႏယို ထွဉ်ႏလောင်ခါꩻစွဉ်ႏ အဆာႏအဟာႏရလွံးလွံးတဲင် ကပ်ဘေႏနွတ်နေင်ႏ မိဉ်ႏတွိုႏနဝ်ꩻ အံႏခရာႏဖေႏကအဝ်ႏ လိုꩻအမျာꩻတာႏ ‘ယောသပ်’ စာဖေႏချာ အအံႏအအွဖုံႏသွူ။

ကပ်ဘေႏယို ‘အီဂျစ်’ ကိုလွုမ်ꩻတမွေးတဝ်း ‘ယာကုပ်’ တွမ်ႏဝွေꩻမိသားစုꩻ ကအဝ်ႏအုံဒါႏ ‘ခါနန်’ သူꩻနဝ်ꩻ လဲ့ အဝ်ႏထွာသန်နေနေသွူ။

တွိုႏနဝ်ꩻတွော့ꩻ ‘ယာကုပ်’ နဝ်ꩻ ဝွေꩻပိုအတန်ဖုံႏ ဖေႏကလွေꩻဖြေꩻ ထာꩻအံꩻခရာႏ ‘အီဂျစ်’ သွူနဝ်ꩻအွဉ်ႏလွေꩻခန်းနဝ်ꩻသွူ။ ဝွေꩻသီးတဖူးဝေးဖုံႏ အဝ်ႏဖြေꩻထာꩻအံႏခရာႏဖုံႏတွင်ꩻ‘ယောသပ်’နဝ်ꩻအုံနွိုင်း ခန်းဝွေꩻသီးဖဲ့ငါနဝ်ꩻသွူ။ ဝွေꩻသီးနဝ်ꩻ တောင်ꩻတဝ်း ‘ယောသပ်’ တဲင် ‘ယောသပ်’ နဝ်ꩻ တောင်ꩻဒျာႏဝွေꩻသီးနဝ်ꩻသွူ။

နဝ်ꩻတွော့ꩻ ဝွေꩻသီးတဖူးဝေးဖုံႏ ပြောင်ꩻလုဲင်ꩻမုꩻအဝ်ႏတအဝ်ႏတဝ်းနဝ်ꩻ စဲစ်ဆေꩻထွူတဲင် ‘ယောသပ်’ နဝ်ꩻ “ခွေယိုထွာဒျာႏ သီဖူး ‘ယောသပ်’ တဲင် သီဖုံႏ တွမ်ႏငမ်းမွုန်းခွေ။ ခွေယို ဖေႏကထွာပါꩻကူႏလီႏ သီစာထွူတဲင် မာꩻစွဉ်ႏထာꩻတဟဝ်တဝ်းရိုꩻကီလဲ့ ယံက ဟဝ်ချာနဝ်ꩻ ဘုရာꩻသျင်ꩻ ပြောင်ꩻဖေႏချာဒျာႏနီသွူ။ နာꩻတွမ်ႏ နာꩻမိသားစုꩻဖုံႏခွေဖေႏကကူႏညီႏနွောင်ꩻနဝ်ꩻ လွဉ်အုံ အီဂျစ်သွူဟုဲင်း” ဒေါ့ꩻရိုꩻနုဲင်းနဝ်ꩻသွူ။

‘ယောသပ်’ ဖူးဝေးဖုံႏနဝ်ꩻ ကထွိုင်ႏတွိုႏသဲင်ꩻလမ်းချိန်ႏ ‘ယောသပ်’ အသက်မွန်နေဒွိုန်းကရိုꩻယို ဒေါ့ꩻဟွိုန်ခန်း ဝွေꩻသီးဖာကထွာဒါႏ ‘ယာကုပ်’ တဲင် ပျောႏသွင်ႏလွမွေးဝင်ꩻဖုံႏသွူ။

‘ယာကုပ်’ နဝ်ꩻ ဖြားစွဉ်ႏရိုꩻကီလဲ့ ပြောင်ꩻလွေꩻခန်း ‘အီဂျစ်’ တဲင် တွမ်ႏဝွေꩻမိသားစုꩻလွေꩻအုံပျောႏသွင်ႏခန်းအီဂျစ်နဝ်ꩻသွူ။ ခလား ‘ယာကုပ်’ ကသီ ဖေႏခါꩻခန်းအပို ဆုꩻဟဝ်ဆုꩻမျတ်ꩻဖုံႏနဝ်ꩻသွူ။

ဘုရာꩻသျင်ꩻ ကဖေႏခါꩻဒါႏ ‘အာဗြဟံ’ ကတိယို ဖေႏဆွိုက်လင်ꩻ ‘ဣဇာက်’ ထျꩻထွူဆချာ၊ ‘ယာကုပ်’ တွမ်ႏဝွေꩻပို ( ၁၂ ) ဖြာꩻသီးဖုံႏ မိသားစုꩻထျꩻ ထွိုင်ႏဖေႏဆွိုက်ထွူတဲင် မိသားစုꩻ ( ၁၂ )စုꩻသီး မျိုꩻဆက်ဖုံႏနဝ်ꩻလဲ့ ထွာထိုꩻ ‘ဣစရေး’ ကို ကအဝ်ႏဒါႏ လိုꩻမျိုꩻ( ၁၂ ) မျိုꩻနဝ်ꩻသွူ။

ကမ္ဘာႏဦꩻကျမ်ꩻ ၃၇-၅၀ မꩻ သမ္မာႏလိတ်ကျမ်ꩻ ငဝ်းခြုဲင်းအာ