၂၀ - ခံႏဗာႏ ၀င်ꩻ၀ါးထမ်းတွမ်ႏ သဲင်ꩻပြန်ႏချာ

‘ဣစရေး’ နုဲင်ႏငံႏတောႏတွမ်ႏ ‘ယုဒ’ နုဲင်ႏငံႏတောႏဖုံႏနောဝ်ꩻ မာꩻဗာႏအပဲစ် ဘုရာꩻသျင်ꩻအလောင်းသွူ။ ‘သိနာ’ ကောင်လောင်း ဝွေꩻသီးတွမ်ႏ ဘုရာꩻသျင်ꩻအခါႏ ဖျက်ကုဲင်ဗာႏ ကအွဉ်ႏသေꩻခါꩻ ကတိငဝ်းသွူ။ ဘုရာꩻသျင်ꩻနဝ်ꩻ ဝွေꩻနိမိတ်ထွားဟော်ꩻ ပညာႏအဝ်ႏသားဖုံႏယို အွဉ်ႏလွစ်လွေꩻသွူ ဝွေꩻသီးထျꩻတဲင် ဝွေꩻသီးအပဲစ်ဖုံႏယို ဖေႏကလꩻသံႏဝွေႏဂ ဖေႏကကိုႏကွယ်ႏချာ ဘုရာꩻသျင်ꩻ ဖေႏသတိစွဉ်ႏနုဲင်းနဝ်ꩻတဲ့ ဝွေꩻသီးဖုံႏတနာႏခံႏတဝ်း လွိုဆန်ꩻ လွꩻ၀င်ꩻသွူ။

နောဝ်ꩻတွော့ꩻ ဘုရာꩻသျင်ꩻနဝ်ꩻ နုဲင်ႏငံႏနီနုဲင်ႏငံႏယို ဖေႏဝွေꩻသီးရန်ႏသူႏမာꩻကုဲင်ခွင်ꩻတဲင် ‘အာရှုရိ’ နဝ်ꩻ ထွာလွဉ်ထဲင်း စွန်ꩻအာႏရဲင်ꩻတန် နုဲင်ႏငံႏတနုဲင်ႏငံႏနဝ်ꩻသွူ။ ‘အာရှုရိ’ လိုꩻမျိုꩻဖုံႏနဝ်ꩻ နုဲင်ႏငံႏအလောင်ႏလင်ဖုံႏအလောင်းယို နှိပ်စက်အံႏနွိုင်ꩻငါႏသွူ။ ဝွေꩻသီးဖုံႏ လွဉ်ယားကုဲင် ‘ဣစရေး’ နုဲင်ႏငံႏတောႏသွူ။ ‘အာရှုရိ’ ဖုံႏ မာꩻသီအာမွေး ‘ဣစရေး’ လိုꩻမျိုꩻဖုံႏထွူတကာႏတဝ်း၊ ဝွေꩻသီးကမဲဉ်လꩻဒါႏ မန်ႏသမျထူႏသွူတွော့ꩻ နုဲင်ႏငံႏခင်ႏလမ်းအာထွောင်း ယိုလဲ့ꩻလွꩻမေႏဖုံႏနဝ်ꩻသွူ။

‘အာရှုရိ’ ဖုံႏနဝ်ꩻ လိုꩻမျိုꩻစုꩻ အွဉ်ငါသား၊ လိုꩻချံႏသာႏတွမ်ႏတန်ႏဖိုꩻကအဝ်ႏဒါႏ ထာꩻခြွိုꩻဖုံႏ ကဖန်ဆင်ꩻနွောင်ꩻဒါႏ လိုꩻဖုံႏယို စုꩻခြွမ်းထွူ ဟဲ့လွေꩻခန်း ‘အာရှုရိ’ နဝ်ꩻသွူ။ ‘ဣစရေး’ နဝ်ꩻ အဝ်ႏကုဲင်ကွို့ꩻ ဆင်ꩻရယ်ꩻသား ယဟန်ႏလွုမ်ꩻသွူ။

နဝ်ꩻမာꩻချာ ‘အာရှုရိ’ လိုꩻမျိုꩻဖုံႏနဝ်ꩻ အီအုံဟံႏခင်ႏလမ်းနဝ်ꩻအတာႏ ဟဲ့ꩻလွဉ်စွဉ်ႏခမ်းအလင်သားတဲင် ဝွေꩻသီးဖုံႏ တဲႏထောင်ႏချာယင်းဝေင်ꩻဖုံႏသွူ။ ဝွေꩻသီးဖုံႏနဝ်ꩻ ခင်ႏလမ်းနောဝ်ꩻကို ကအဝ်ႏကုဲင်ဒါႏ ‘ဣစရေး’ လိုꩻမျိုꩻဖုံႏယို ဝွေꩻသီးဖုံႏတောႏလမ်းလွ၀င်ꩻတဲင်ကအဝ်ႏကုဲင်ဒါႏ လိုꩻမျိုꩻဆက်ဖုံႏနဝ်ꩻ ဆုဲင်ꩻတွော့ꩻ ဟဲ့ꩻခန်း ‘ဆာမာရီတန်’ လိုꩻမျိုꩻသွူ။

‘ယုဒ’ နုဲင်ႏငံႏတောႏကို ကအဝ်ႏကုဲင်ဒါႏ လိုꩻမျိုꩻဖုံႏတွမ်ႏ ‘ဣစရေး’ နုဲင်ႏငံႏတောႏကို ကအဝ်ႏဒါႏ လိုꩻဖုံႏနဝ်ꩻ ကွပ်ယွုမ်းတဝ်း ဘုရာꩻ သျင်ꩻတဲင် ဖေႏအပဲစ်နုဲင်းမုဲင်ꩻကရိုꩻနဝ်ꩻ အဝ်ႏထီႏထွဗာႏသွူ။ ကွဲတွော့ꩻ ဝွေꩻသီးဖုံႏနဝ်ꩻ ‘ခါနန်’ ကိုကအဝ်ႏဒါႏ ဘုရာꩻဖုံႏအပါ ကိုႏ ကွယ်ႏဆွိုက်ယင်း ရျွုတ်တုဖုံႏနဝ်ꩻသွူ။ ဘုရာꩻသျင်ꩻနဝ်ꩻ ဝွေꩻသီးအလောင်းဖုံႏယို အွဉ်ႏလွစ်သွူ နိမိတ်ထွားဟော်ꩻ ပညာႏအဝ်ႏသားဖုံႏတဲင် ထွဉ်ႏဒေါ့ꩻငဝ်းကတိတဲ့ ဝွေꩻသီးဖုံႏလွိုဆန်ꩻထိုꩻသွူ။

‘အာရှုရိ’ လိုꩻမျိုꩻယားကုဲင် ‘ဣစရေး’ နုဲင်ႏငံႏတောႏကထွိုင်ႏည နေင်ႏတရျာꩻရပ်တွော့ꩻ ဘုရာꩻသျင်ꩻနောဝ်ꩻ ‘ဗာဗုလုန်’ လိုꩻမျိုꩻဖုံႏခွန်ကထွာဒါႏ ‘နေဗုခဒ်နေဇာ’ ယို ဖေႏကတွိုက် ‘ယုဒနုဲင်ႏငဲႏတောႏ’ အွဉ်ႏစွꩻလွေꩻသွူ။ ‘ဗာဗုလုန်’ ယို လိုꩻအင်ႏပေါင်ꩻတန်နုဲင်ႏငံႏတဲင် ‘ယုဒခွန်’ နောဝ်ꩻ အုံအဝ်ႏလွေꩻဒျာႏ ‘နေဗုခဒ်နေဇာ’ သီး ကူႏလီႏ နုဲင်ႏငံႏအထွာတွော့ꩻ စွုမ်ႏနေင်ႏ မဲ့အီႏဖေႏဆက်သဒျာႏရွဉ်ဖုံႏခံꩻဖုံႏ သဘောတူႏခန်းနဝ်ꩻသွူ။

ကွဲတွော့ꩻ နေင်ႏကထွိုင်ႏညပသာ ‘ယုဒ’ ခွန်နဝ်ꩻ ပုန်ႏကန်ႏချာ ‘ဗာဗုလုန်’ တဲင် ‘ဗာဗုလုန်’ လိုꩻမျိုꩻဖုံႏနဝ်ꩻ တွိုက်ꩻချာယင်း ‘ယုဒ’ နုဲင်ႏငံႏသွူ။ ဝွေꩻသီးဖုံႏနောဝ်ꩻ သိမ်ꩻထိုꩻ ‘ယေရှုရှလင်’ ဝေင်ꩻတွော့ꩻ မာꩻကုဲင်ထိုꩻသွူ ဘုရာꩻကျောင်ꩻတဲင် ဝေင်ꩻကိုတွမ်ႏဘုရာꩻကျောင်ꩻကိုကအဝ်ႏဒါႏ ရွဉ်ခံꩻရတနာႏဖုံႏယို ထူႏလွေꩻထိုꩻသွူ။

ကပုန်ႏကန်ႏဒါႏ ‘နေဗုခဒ်နေဇာခွန်’ ‘ယုဒခွန်’ ယို အီဖေႏအပဲစ်တဲင် ‘နေဗုခဒ်နေဇာ’ စဲ့ꩻသားဖုံႏနဝ်ꩻ မာꩻသီထွူခွန်ပို ခွန်မဲ့ဆငါတဲင် မာꩻခေ့ꩻထိုꩻစွဉ်ႏ ခွန်မဲ့သွူ။ ကထွိုင်ႏမာꩻထွူနုဲင်းနဝ်ꩻချိန်ႏ ဝွေꩻသီးဖုံႏဟဲ့ꩻလွေꩻသွူခွန်တဲင် အွဉ်ႏသီထိုꩻစွဉ်ႏ အွိုး ‘ဗာဗုလုန်’ ထောင်ႏကိုသွူ။

‘နေဗုခဒ်နေဇာ’ တွမ်ႏ ဝွေꩻစဲ့ꩻတပ်နဝ်ꩻ ‘ယုဒနုဲင်ႏငံႏတောႏ’ ကို က အဝ်ႏဒါႏလိုꩻဖုံႏ အလို့ဗော့ꩻဗော့ꩻ ဟဲ့ꩻလွေꩻသွူ ‘ဗာဗုလုန်’ တဲင် အွဉ်ႏကုဲင်ခါꩻကွော့ꩻဒျာႏ လုဲင်းလွုပ်ခြံမာꩻသား လိုꩻဆင်ꩻရယ်ꩻဖုံႏ လွုမ်ꩻသွူ။ ဘုရာꩻသျင်ꩻတွမ်ႏလိုꩻဖုံႏကပျုခါꩻဒါႏ ကတိသစ္စာႏ ဟံႏနယ်ႏကို ကထန်ႏထိုꩻဗာႏ အချိန်ႏကာႏလယို ဟဲ့ꩻ ခံႏဗာႏ ဝါးထိုꩻ ထန်ႏ သွူ။

ဘုရာꩻသျင်ꩻနဝ်ꩻ ဝွေꩻလိုꩻဖုံႏအပဲစ်အတာႏ ဝါးထိုꩻထန်ႏ ဖေႏအပဲစ် နုဲင်းနဝ်ꩻတဲ့ ဝွေꩻသီးအလောင်း ကဖေႏခါꩻဒါႏ ငဝ်းကတိဖုံႏယို ဘုရာꩻသျင်ꩻတအွဉ်ႏဖြေင်တဝ်းသွူ။ ဘုရာꩻသျင်ꩻနဝ်ꩻ ထွားဆွိုက်ဒျာႏ ဝွေꩻလိုꩻဖုံႏအလောင်းတဲင် တွမ်ႏဝွေꩻ နိမိတ်ထွားဟော်ꩻ ပညာႏ အဝ်ႏသားမꩻ တဆွုပ် မိန်ꩻကျာꩻထွူတွော့ꩻ ဝွေꩻနောဝ်ꩻ ကတိကဖေႏခါꩻဒါႏ ဟံႏခင်ႏလမ်းယို မဉ်ႏည နေင်ႏနွတ်ဆီနဝ်ꩻ ဝွေꩻသီးဖုံႏ အီႏသဲင်ꩻပြန်ႏချာဗာႏ ကတိဖေႏခါꩻနုဲင်းယိုသွူ။

ကထွိုင်ႏညနေင်ႏနွတ်ဆီရပ်နဝ်ꩻ ‘ပေရသိ’ ခွန် ကထွာဒါႏ ( ဇေရစ် ) နဝ်ꩻ အောင်ႏနွောင်ꩻ ‘ဗာဗုလုန်’လိုꩻမျိုꩻတဲင် ‘ဗာဗုလုန်’ အင်ပါယာကိုယ်ႏစာꩻ ( ပေရသိ ) အင်ပါယာနဝ်ꩻ အုပ်ချွုတ်စွဉ်ႏနုဲင်ႏငံႏအာပေါင်ꩻသွူ။ ‘ဣစရေး’ လိုꩻမျိုꩻဖုံႏနဝ်ꩻ ယိုခါဟဲ့ꩻ ‘ဂျူး’ လိုꩻမျိုꩻတဲင်၊ ဝွေꩻသီးဖုံႏ ဘဝတသက် ကဉ်းအာအာနဝ်ꩻ အုံလွဉ် ‘ဗာဗုလုန်’ သွူ။ သက်အတန်သွတ်ꩻ ‘ဂျူး’ လိုꩻမျိုꩻဖုံႏလွုမ်ꩻ ယူႏလꩻ ‘ယုဒ’နုဲင်ႏငံႏတောႏသွူ။

‘ပေရသိ’ လိုꩻမျိုꩻဖုံႏနဝ်ꩻ ဆွို့ꩻ၊ အာႏရဲင်ꩻသန် ရိုꩻကီလဲ့ ဝွေꩻသီးက သိမ်ꩻခါꩻဒါႏလိုꩻအလောင်း သꩻညင်ꩻမုꩻအဝ်ႏသွူ၊ ( ဇေရစ် ) နဝ်ꩻ ထွာ ‘ပေရသိ’ သီးခွန်တဲင် အချိန်ႏကထွိုင်ႏညပသာနဝ်ꩻ ကမွိုင် သဲင်ꩻဒါႏ ‘ယုဒ’ ‘ဂျူး’လိုꩻမျိုꩻမန်ႏသမျှအွဉ်ႏကုဲင် ‘ပေရသိ’ တဲင် သဲင်ꩻနွောင်ꩻဒျာႏ ‘ယုဒ’ အကျောင်ꩻ ထေထန်ႏခန်း အမိန်းနုဲင်းနဝ်ꩻသွူ။ ဝွေꩻသီးဖုံႏ တယ်ႏပြန်ႏအီ ဘုရာꩻကျောင်ꩻဆောင်အတာႏ ဝွေꩻပံးပိုးစွဉ်ႏ ရွဉ်တောင်ꩻသွူ။ နေင်ႏနွတ်ဆီရပ် ကထွိုင်ႏခံႏထွူတံႏ ဝင်ꩻဝါးထန်ႏခမ်းတဲင် ‘ယုဒ’ ကအဝ်ႏဒါႏ ‘ယေရှုရှလင်’ ဝေင်ꩻကို ‘ဂျူး’ လိုꩻမျိုꩻတွိုႏလွဉ်စွဉ်ႏဆေ့ꩻဆေ့ꩻ သွူ။

လိုꩻဖုံႏ ကထွိုင်ႏတွိုႏသဲင်ꩻချာ ‘ယေရှုရှလင်’ ဝေင်ꩻတဲင် ဝွေꩻသီးဖုံႏတယ်ႏချာယင်း ဘုရာꩻသျင်ꩻ ကျောင်ꩻတောႏ၊ ဝေင်ꩻခူနားတဲ့ တယ်ႏစွဉ်ႏအကာႏအကွယ် တံႏတွိုင်ꩻသွူ။ ‘ပေရသိ’ လိုꩻမျိုꩻ အုပ်ချွုတ်ဆွုက်ဝွေꩻသီးရိုꩻလဲ့ ဝွေꩻသီးဖုံႏကတိကဖေႏခါꩻဒါႏ ဟံႏခင်ႏလမ်းယို အုံချာတဲင်တွော့ꩻ ဘုရာꩻသျင်ꩻတဲ့ ကိုယ်ႏကွယ်ႏသော့ꩻချာ ဘုရာꩻကျောင်ꩻကိုသွူ။

၂ သျင်ႏဘုရင်ဖုံႏ ၁၇; ၂၄-၂၅; ၂ ရာႏဇဝင်ႏအထွာအကုဲင် ၃၆; ဧဇရလိတ်မတ် ၁-၁၀; နေဟမိလိတ်မတ် ၁-၁၃ မꩻ သမ္မာႏလိတ်ကျမ်ꩻ ငဝ်းခြုဲင်း