၁၉ - နိမိတ်ထွားဟော်ꩻ ပညာႏအ၀်ႏသား

ဘုရာꩻသျင်ꩻနဝ်ꩻ ‘ဣစရေး’ လိုꩻမျိုꩻဖုံႏအထျꩻ အွဉ်ႏလွစ်လွေꩻတသေႏ နိမိတ်ထွားဟော်ꩻပညာႏအဝ်ႏသားဖုံႏနဝ်ꩻသွူ။ နိမိတ်ထွားဟော်ꩻ ပညာႏအဝ်ႏသားဖုံႏနဝ်ꩻ နာႏခံႏသွူ ဘုရာꩻသျင်ꩻ ငဝ်းသ တင်ꩻဖုံႏတဲင် ဟော်ꩻပျောꩻနယ်ချာ လိုꩻထုဖုံႏနဝ်ꩻသွူ။

‘ဣစရေး’ ယို ‘အာဟတ်’ ထွာခွန်အချိန်ႏ ‘ဧလိယ’ နဝ်ꩻ ထွာနိမိတ်ထွားဟော်ꩻပညာႏအဝ်ႏသာႏတဖြာꩻတဲင် ‘အာဟတ်’ ခွန်နဝ်ꩻ ထွာလိုꩻကုဲင်တဖြာꩻနဝ်ꩻသွူ။ ဝွေꩻနဝ်ꩻ လိုꩻတုအမျာꩻယို ဖေႏကကိုႏ ကွယ်ႏ ‘ဗာလ’ ကရိုꩻဒါႏ ဘုရာꩻ အတုတဲင် ‘ဧလိယ’ နဝ်ꩻ ဘုရာꩻ သျင်ꩻ အီဖေႏသွူ လိုꩻဖုံႏအပဲစ် ဒေါ့ꩻဟွိုန်နုဲင်းနဝ်ꩻသွူ။ ဝွေꩻနဝ်ꩻ “ခမ်းအီလော့ချာသွူ ခွေမဒေါ့ꩻမချင်း ‘ဣစရေး’ နန်ꩻတောႏယို ခမ်းတွမ်ႏဝဖုံႏအီထဲ့ꩻလင်ꩻတမွေးတဝ်း” ဒေါ့ꩻဟွိုန်နုဲင်းနဝ်ꩻသွူ။ ပွိုးနုဲင်းနဝ်ꩻတဲင် ‘အာဟတ်’ နဝ်ꩻ သလျားထွူထာꩻတွော့ꩻ ဆွုံꩻဖျက်မာꩻသီစွဉ်ႏ ‘ဧလိယ’ နဝ်ꩻသွူ။

နဝ်ꩻတွော့ꩻ ဘုရာꩻသျင်ꩻ ‘အာဟတ်’ ဖေႏကထီႏမွုန်း ‘ဧလိယ’ အွဉ်ႏစွꩻလွေꩻခန်းဒျာႏ ကန္တာရထာꩻခြာꩻကိုနဝ်ꩻသွူ။ ‘ဧလိယ’ နဝ်ꩻ ဘုရာꩻသျင်ꩻ ကဒေါ့ꩻနယ်အတွိုင်ႏ လွေꩻခန်းဒျာႏ ကန္တာရထာꩻခြာꩻကို ကအဝ်ႏဒါႏထီခြောင်တခြောင်ထျꩻနဝ်ꩻသွူ။ မွူးရဝ်ꩻ တွမ်ႏမွူးဟာဒွိုတွိုင်ꩻ ဝါးဖုံႏနောဝ်ꩻ အီလွဉ်ဖေႏ ‘ဧလိယ’ တခိုးတွမ်ႏအယာႏဖုံႏနဝ်ꩻသွူ။ ‘အာဟတ်’ တွမ်ႏ အစဲ့ꩻတပ်နဝ်ꩻ ထွုမ်ႏလွဉ်ꩻစွဉ်ႏ ‘ဧလိယ’ တဲ့ꩻ တမော့ꩻတဝ်းနဝ်ꩻသွူ။

အချိန်ႏကထွိုင်ႏညလွဉ် ခမ်းထွိုင်ႏတလော့ꩻတဝ်းတဲင် ထီခြောင်ဖုံႏသဲင်သေ့ꩻထိုꩻခန်းနဝ်ꩻသွူ။ တွိုႏနဝ်ꩻတွော့ꩻ‘ဧလိယ’ နဝ်ꩻ လွေꩻခန်းကအဝ်ႏဗော့ꩻဒါႏခမ်းတခမ်းနဝ်ꩻသွူ။ နုဲင်ႏငံႏနဝ်ꩻနဝ်ꩻ ကဆင်ꩻရယ်ꩻဒါႏ မေႏမုဲင်းမူႏတဖြာꩻတွမ်ႏအပို အဝ်ႏအုံနဝ်ꩻသွူ။ ဝွေꩻသီးနဝ်ꩻ လုဲင်းဖုံႏတထွာတဝ်းတဲင် အံႏခရာႏအီလို့လို့ ထွာစွဉ်ႏနုဲင်းနဝ်ꩻသွူ။ ထွာစွဉ်ႏနုဲင်းယိုလဲ့ ပါꩻမူႏနဝ်ꩻနဝ်ꩻ ဂရုစိုက်အွဉ်ႏရေꩻဖေႏ ‘ဧလိယ’ တဲင် ဘုရာꩻသျင်ꩻနဝ်ꩻ ကူႏညီႏပွိုးထွားဖေႏ ဝွေꩻမူႏသီးတမွိုးပို နဝ်ꩻသွူ။ ဝွေꩻမူႏ ဂျုံဗူးတွမ်ႏ လꩻမန်ႏပလင်ꩻယို အချိန်ႏမုဲင်ꩻတဲ့ တလို့ထိုꩻဒါႏတဝ်းတဲင် ထာꩻအံႏမꩻဘေႏကထွာဒါႏချိန်ႏဖုံႏတဲ့ ဝွေꩻသီးယို အအံႏအအွဖုံႏလို့ထိုꩻ တအဝ်ႏဖိုတဝ်းသွူ။ ‘ဧလိယ’ နဝ်ꩻ အုံခန်း နဝ်ꩻကို သွံနေင်ႏရပ်သွူ။

ကထွိုင်ႏညသွံနေင်ႏထာꩻဝရပ်ချိန်ႏတွင်ꩻ ဘုရာꩻသျင်ꩻနဝ်ꩻ အီမာꩻလော့သွူခမ်း ဒေါ့ꩻဟွိုန်ခန်း ‘ဧလိယ’ နုဲင်းနောဝ်ꩻသွူ။ ‘ဧလိယ’ ယို သဲင်ꩻသွူ ‘ဣစရေး’ တွော့ꩻ ထွဉ်ႏဒေါ့ꩻဟွိုန်ငဝ်း တွမ်ႏ ‘အာဟတ်’ တဲင် ‘ဧလိယ’ နဝ်ꩻလွေꩻခန်း ‘အာဟတ်’ ထျꩻနဝ်ꩻသွူ။ ‘အာဟတ်’ ကထွိုင်ႏထီႏဝွေꩻတဲင် “အော် နာꩻနဝ်ꩻ အဝ်ႏဒျာႏယိုကိုနဲ့၊ နာꩻနဝ်ꩻ လိုꩻဖေႏမွေးစွဉ်ႏပါꩻထာꩻဒုက္ခ” ရိုꩻစွဉ်ႏနုဲင်းနဝ်ꩻသွူ။ ‘ဧလိယ’ ရိုꩻချာ “နာꩻမꩻ လိုꩻပျဿနာႏ၊ နာꩻနဝ်ꩻ ပယ်ႏခါႏ ‘ယေဝါ’ သွူ၊ ဝွေꩻလွုမ်ꩻ ထွာအစဲစ်အမဲဉ်ႏဘုရာꩻသွူ။ ကွဲတွော့ꩻ နာꩻနဝ်ꩻ ကိုႏကွယ်ႏဒျာႏ ‘ဗာလ’ လွုမ်ꩻသွူ။ ယိုခါတွင်ꩻနာꩻနဝ်ꩻ ‘ဣစရေး’ နန်ႏတောႏဟော်ꩻကိုကအဝ်ႏဒါႏလိုꩻဖုံႏယို မဲ့အီႏဟဲ့ꩻလွေꩻဗာႏ ‘ကရမေလ’ ကောင်လောင်း” ဒေါ့ꩻဟွိုန်နုဲင်းနဝ်ꩻသွူ။

‘ဣစရေး’ နန်ႏတောႏဟော်ꩻနန်ႏကို ကအဝ်ႏဒါႏလိုꩻဖုံႏ ထွိုင်ႏလွေꩻ ‘ကရမေလ’ ကောင်ချိန်ႏနဝ်ꩻ ‘ဗာလ’ ငဝ်းသတင်ꩻကဒေါ့ꩻဟွိုန်ဒါႏလိုꩻဖုံႏတဲ့အဝ်ႏပါလွဉ်နဝ်ꩻသွူ။ လိုꩻယိုဖုံႏနဝ်ꩻ ထွာဗာလနိမိတ်ထွားဟော်ꩻပညာႏအဝ်ႏသားဖုံႏတဲင်အဝ်ႏလိုꩻဖြာꩻပေါင်ꩻ လစ်ရျာꩻငတ်ꩻဆီရပ်နဝ်ꩻသွူ။ ‘ဧလိယ’ နဝ်ꩻ“ပွိုးတမုဲင်သီသꩻဖုံႏ တဆင်ႏဆင်ႏ အဝ်ႏပြောင်ꩻလုဲင်တွိုႏဟောင်း၊ ‘ယေဝါ’ မဉ်ꩻထွာဘုရာꩻလဲ့ ကိုႏ ကွယ်ႏသွော့ꩻ ‘ယေဝါ’၊ ‘ဗာလ’ မဉ်ꩻထွာဘုရာꩻလဲ့ ကိုႏကွယ်ႏသွော့ꩻ‘ဗာလ’ ဟုဲင်း” ဒေါ့ꩻခန်းလိုꩻသားနဝ်ꩻဖုံႏ နုဲင်းနဝ်ꩻသွူ။

နဝ်ꩻထွူ ‘ဧလိယ’ နဝ်ꩻ ‘ဗာလ’ နိမိတ်ထွားဟော်ꩻပညာႏအဝ်ႏသားဖုံႏ “မာꩻသီသွူ ပနားတဗာႏတဲင် ဖျက်ထွူ ပဉ်ကွို့ꩻကွို့ꩻ ပူႏဇောႏတာႏ ဒင်ႏခန်းဒျာႏ စွန်ꩻကျဲꩻသက်ပလ္လင်ႏလောင်းနောဝ်ꩻသွူ၊ ကွဲတွော့ꩻ လဲ့ꩻမွိုန်းတဝ်း မေႏ။ မိဉ်ႏထွူ ခွေတဲ့ꩻ စွန်ꩻကျဲꩻသက်ပလ္လင်ႏလောင်း အီမာꩻနဝ်ꩻအတွိုင်ႏနေနေသွူ။ ဘုရာꩻသျင်ꩻယို စွန်ꩻကျဲꩻသက်ပလ္လင်ႏလောင်း မဉ်ႏမာꩻထွာမေႏနဝ်ꩻ ဝွေꩻယို ထွာဘုရာꩻအစဲစ်ကရိုꩻနဝ်ꩻ မဲ့သီဖုံႏ အီသေဗာႏဒျာႏ” ဒေါ့ꩻဟွိုန်ခန်းနုဲင်းနဝ်ꩻသွူ။ နောဝ်ꩻတွော့ꩻ ‘ဗာလ’ နိမိတ်ထွားဟော်ꩻပညာႏအဝ်ႏသားဖုံႏနဝ်ꩻ ပူႏဇောႏတာႏဖန်ဆင်ꩻထွူတဲင် တတဲစ်တဝ်းမေႏ အုံလွဝင်ꩻသွူ။

နောဝ်ꩻဆချာ ‘ဗာလ’ နိမိတ်ထွားဟော်ꩻပညာႏအဝ်ႏသားဖုံႏနောဝ်ꩻ “ဖေႏသေဟွိုန်လွꩻသွော့ꩻ နီဖုံႏ” ဆုတောင်ꩻလွဝင်ꩻ ‘ဗာလ’ ထျꩻနုဲင်းနဝ်ꩻသွူ။ ဝွေꩻသီးဖုံႏဆုတောင်ꩻခြဝ်တနီꩻလွုမ်း ဝွေꩻသီးနမ်းခန္ဓာႏယို ကျာႏစွယ်ႏသွူ တွမ်ႏနꩻတဲင် ဆုတောင်ꩻတနီꩻလွုမ်းလွုမ်းတဲ့ ‘ဗာလ’ နောဝ်ꩻ ဖြေႏပြန်ႏချာလဲ့ꩻ တအဝ်ႏတဝ်း မေႏတမုဲင်ꩻတဲ့ꩻ အွဉ်ႏလွစ်မုꩻ တအဝ်ႏတဝ်းသွူ။

‘ဗာလ’ နိမိတ်ထွားဟော်ꩻပညာႏအဝ်ႏသားဖုံႏနဝ်ꩻဆုတောင်ꩻ ‘ဗာလ’ ယို လို့ထိုꩻခန်းတနီꩻလွုမ်းတဲင် အဆုဲင်သွတ်ꩻ အွဉ်ႏဆွိုးထိုꩻဗာႏ ဆုတောင်ꩻမုꩻဖုံႏနဝ်ꩻသွူ။ နဝ်ꩻတွော့ꩻ ‘ဧလိယ’ နဝ်ꩻ ယင်းပနားတဗာႏအယာႏယို ဒင်ႏသွူ ဘုရာꩻသျင်ꩻစွန်ꩻကျဲꩻသက်ပလ္လင်ႏလောင်းတဲင် ထွဉ်ႏထူႏလွဉ်ခန်း လိုꩻထုဖုံႏ ထီဖွိုင်ꩻတန် တဆီနီဖြုံႏတွော့ꩻအယာႏဖုံႏတွမ်ႏ စွန်ꩻကျဲꩻသက်ပလ္လင်ႏဖုံႏ ဟံႏတန်ဖုံႏအပါ ထွဉ်ႏဆျူပဲစ်တနဲစ်ꩻခန်းဒျာႏနဝ်ꩻသွူ။

နဝ်ꩻထွူ ‘ဧလိယ’ နဝ်ꩻ “ယေဝါ၊ အာဗြဟံသီးဘုရာꩻ၊ ဣဇာက်တွမ်ႏယာကုပ်၊ သီဖုံႏနဝ်ꩻ ထွာ ‘ဣစရေး’ သီးဘုရာꩻသျင်ꩻတဲင် နီဖုံႏနဝ်ꩻ ထွာသီဖုံႏကူႏလီႏကရိုꩻယို ဟန်ႏနီꩻယိုအွဉ်ႏနယ်နီꩻဟုဲင်း၊ လိုꩻယိုဖုံႏတဲ့ꩻ ဘုရာꩻသျင်ꩻနဝ်ꩻထွာဘုရာꩻသျင်ꩻအစဲစ်အကျောင်ꩻယို ဖြေႏဟွိုန်ဖေႏသွော့ꩻ နီသွဉ်ႏသီးဖုံႏဟုဲင်း“ ဆုတောင်ꩻနုဲင်းနဝ်ꩻသွူ။

တလဲင်ႏချင်ꩻမို့ꩻလောင်းသူꩻမေႏဖုံႏထဲ့ꩻလင်သွူတဲင် အယာႏဖုံႏ၊ သေင်ႏယာႏဖုံႏ၊ လုံးတူႏဖုံႏ၊ ဟံႏတန်တွမ်ႏ စွန်ꩻကျဲꩻသက်ပလ္လင်ႏသောင်ကအဝ်ႏဒါႏထီဖုံႏယို ထွဉ်ႏခိုးထိုꩻလို့တဲင် လိုꩻဖုံႏနဝ်ꩻ ဗေင်ႏ လင်သွူဟံႏလောင်းတွော့ꩻ “ယေဝါနဝ်ꩻ ထွာဘုရာꩻသွူ။ ယေဝါ နဝ်ꩻ ထွာဘုရာꩻသွူ” ဒေါ့ꩻလွခန်း၀င်ꩻနုဲင်းနဝ်ꩻသွူ။

နဝ်ꩻထွူ ‘ဧလိယ’ နဝ်ꩻ “ဗာလ နိမိတ်ထွားဟော်ꩻပညာႏအဝ်ႏသားဖုံႏယို ဖေႏလွစ်မွုန်းတဝ်ႏ” ဒေါ့ꩻဟွိုန်ခန်းနုဲင်းနဝ်ꩻသွူ။ နဝ်ꩻအချိန်ႏ လိုꩻအမျာꩻဖုံႏနောဝ်ꩻ ဆွမ်ꩻသွူ ‘ဗာလ’ နိမိတ်ထွားဟော်ꩻပညာႏ အဝ်ႏသားဖုံႏတွော့ꩻ ဟဲ့ꩻလွေꩻညာꩻထွူတဲင် မာꩻသီထိုꩻခန်းဒျာႏနဝ်ꩻသွူ။

နောဝ်ꩻထွူ ‘ဧလိယ’ နဝ်ꩻ “ခမ်းအီလော့သွူတဲင် သဲင်ꩻသွူးခန်းနာꩻလမ်းဟုဲင်း” ဒေါ့ꩻဟွိုန်ခန်း ‘ခွန်အာဟတ်’ နုဲင်းနဝ်ꩻသွူ။ နဝ်ꩻဆချာ မို့ꩻလောင်းဖြိန်းကရစ်လွဉ်သွူတဲင် ခမ်းတန်လွဉ်ခန်းဒျာႏနဝ်ꩻသွူ။ ‘ယေဝါ’ နဝ်ꩻအွဉ်ႏဆွိုးသွူ ခမ်းခေါင်ႏထာꩻတဲင် ဝွေꩻယို ထွာဘုရာꩻသျင်ꩻစဲစ်အကျောင်ꩻကရိုꩻနောဝ်ꩻ အွဉ်ႏနယ်ခန်းဒျာႏနဝ်ꩻသွူ။

‘ဧလိယ’ ထာꩻမာꩻကထွိုင်ႏထွူတဲင် ဘုရာꩻသျင်ꩻနဝ်ꩻ ‘ဧလိရှဲ’ ကရိုꩻဒါႏလိုꩻတဖြာꩻယို ရွေꩻသွူ နိမိတ်ထွားဟော်ꩻပညာႏအဝ်ႏသားအထွာတွော့ꩻ ‘ဧလိရှဲ’ မꩻတဆွုက်မာꩻစွဉ်ႏ ထူꩻဆန်ꩻအံႏယောꩻခရာꩻဖုံႏနဝ်ꩻသွူ။ အံႏယောꩻခရာꩻဖုံႏအကို အံႏယောꩻခရာꩻတဗာႏနောဝ်ꩻ ပက်သက်လွေꩻစွဉ်ႏ ‘နေမန်’ ကရိုꩻဒါႏ လိုꩻတဖြာꩻလောင်းနဝ်ꩻသွူ။ ‘နေမန်’ နဝ်ꩻ ထွာရန်ႏသူႏစဲ့ꩻတပ် စဲ့ꩻပိုႏတဖြာꩻရိုꩻကီလဲ့ ဝွေꩻနဝ်ꩻ အရေပျားရောႏဂါႏထွာဟုဲင်းငါႏနဝ်ꩻသွူ။ ‘နေမန်’ နဝ်ꩻကထွိုင်ႏ ဟွိုန်ႏ ‘ဧလိရှဲ’ အကျောင်ꩻတဲင် အီႏကုꩻအီတသီႏတာႏ လွေꩻကွီꩻခန်းဒျာႏအကူႏညီႏ ‘ဧလိရှဲ’ ထျꩻနဝ်ꩻသွူ။ ‘ဧလိရှဲ’ နဝ်ꩻ ‘နေမန်’ ယို လွေꩻသွူ ‘ယောဒန်’ ဝေင်ꩻတဲင် လွေꩻအွဉ်ႏမျွုတ်ꩻခန်း ‘နေမန်’ ထီ နွတ်ꩻလဲင်ႏနဝ်ꩻသွူ။

ကထွိုင်ႏဒေါ့ꩻနုဲင်းယိုတဲင် မာꩻဗားထာꩻ ထင်းနေးနဝ်ꩻတဲင်တွော့ꩻ ‘နေမန်’ နဝ်ꩻ သလျားမွေးငါႏ ‘ဧလိရှဲ’ နဝ်ꩻသွူ။ ကွဲတွော့ꩻဆုဲင်ꩻ နဝ်ꩻ သꩻပြောင်ꩻလုဲင်ႏထိုꩻတဲင် ‘နေမန်’ နဝ်ꩻ လွေꩻသွူ ‘ယောဒန်’ ခြောင်တွော့ꩻ စဲခန်းအနမ်းထီကို နွတ်ꩻလဲင်ႏနဝ်ꩻသွူ။ အဆုဲင်ꩻသွတ်ꩻတလဲင်ႏအဝ်ႏထီကို ထွိုင်ႏပေါနဝ်ꩻ ဘုရာꩻသျင်ꩻ ကုဖေႏခန်း ‘နေမန်’ တသီႏနဝ်ꩻသွူ။

ဘုရာꩻသျင်ꩻနဝ်ꩻ နိမိတ်ထွားဟော်ꩻ ပညာႏအဝ်ႏသားဖုံႏယို အွဉ်ႏ လွစ်လွေꩻခန်း ‘ဣစရေး’ ကအဝ်ႏဒါႏ လိုꩻဖုံႏထျꩻနဝ်ꩻသွူ။ ဝွေꩻသီးဖုံႏနဝ်ꩻ လိုꩻဖုံႏကကိုႏကွယ်ႏဒါႏရျွုတ်ထုဖုံႏယို ဖေႏကအွဉ်ႏဆွိုး ဒေါ့ꩻလွထွူတဲင် လိုꩻဖုံႏ ကလားကကိုႏကွယ်ႏရျွုတ်ထုနဝ်ꩻ အချင်ꩻချင်ꩻဆွုက်ဆန်ꩻတရျားရျားထွူတွော့ꩻ ထာꩻသꩻညင်ꩻမုꩻဖေႏကအဝ်ႏလွ ဝင်ꩻ ဒေါ့ꩻဟွိုန်နုဲင်းနဝ်ꩻဖုံႏသွူ။ လိုꩻဖုံႏကလား ကမာꩻထာꩻတဟဝ်တဝ်းအစား ကိုႏကွယ်ႏဆယ်ꩻကပ်လုဲင်ႏသွူ ဘုရာꩻသျင်ꩻတွော့ꩻ ဖေႏကလွိုက်ꩻနာႏလွဝင်ꩻ ဒေါ့ꩻဟွိုန်နုဲင်းနဝ်ꩻသွူ။ လိုꩻနဝ်ꩻ မိဉ်ႏတလွိုက်ꩻနာႏတဝ်းနုဲင်းယိုနဝ်ꩻ ဘုရာꩻသျင်ꩻမတ်အပဲစ်အဝ်ႏလိုꩻတဲင် ဘုရာꩻသျင်ꩻကဖေႏဒါႏ အပဲစ်ယို မဲ့အီႏခံႏဗာႏနဝ်ꩻသွူ။

လိုꩻဖုံႏကဉ်းအာအာ နဝ်ꩻ တလွိုက်ꩻနာႏတဝ်း ဘုရာꩻသျင်ꩻငဝ်းငွါသွူ၊ ဝွေꩻသီးဖုံႏနဝ်ꩻ ဆွိုက်ဆံယံတဝ်း ဘုရာꩻသျင်ꩻနိမိတ်ထွားဟော်ꩻပညာႏအဝ်ႏသားဖုံႏတကာႏတဝ်း ယလဲင်ႏလဲင်ႏ မာꩻသီနေး စွဉ်ႏသွူ။ တလဲင်ႏတွော့ꩻ ‘ယေရမိ’ ကဟဲ့ꩻဒါႏ နိမိတ်ထွားဟော်ꩻပညာႏအဝ်ႏသားတဖြာꩻယို လွဉ်းသော့ꩻစွဉ်ႏ ထီအွိုင်ႏကုဲင်ကိုတွော့ꩻ အွဉ်ႏသီစွဉ်ႏတဲင် ဝွေꩻဗဉ်သော့ꩻခန်း ထီအွိုင်ႏတလကအဝ်ႏဒါႏ ရွဉ်ꩻကိုနဝ်ꩻသွူ။ ကွဲတွော့ꩻ ခွန်နဝ်ꩻ သꩻသꩻညင်ꩻပေါႏ ‘ယေရမိ’ အလောင်းတဲင် ထွဉ်ႏထေꩻ ထွဉ်ႏကယ်ႏ ဝွေꩻကူႏလီႏဖုံႏတဲင်တွော့ꩻ ထေꩻထန်ႏလခန်း ထီအွိုင်ႏလောင်းနဝ်ꩻသွူ။

နိမိတ်ထွားဟော်ꩻ ပညာႏအဝ်ႏသားဖုံႏနဝ်ꩻ ဝွေꩻသီးအလောင်း လိုꩻဖုံႏလွꩻထီႏခန်းစွဉ်ႏတဲ့ ဘုရာꩻသျင်ꩻမိန်းကျာꩻချက်ဖုံႏယို အဝ်ႏဒေါ့ꩻဟွိုန်ဆွိုက်ယင်းနဝ်ꩻသွူ။ ဝွေꩻသီးဖုံႏနဝ်ꩻ သီလိုꩻအမျာꩻဖုံႏယို မဉ်ႏတလတဝ်း သံႏဝွေႏဂနဝ်ꩻ နီဖုံႏယိုဘုရာꩻသျင်ꩻ အီယားကုဲင် ဖေႏသတိနုဲင်းနဝ်ꩻထွူ။ ဘုရာꩻသျင်ꩻနဝ်ꩻ လိုꩻဖုံႏယို အီဟဲ့ꩻလွေꩻ ‘မေရှိယ’ ထျꩻဖေႏပြန်ႏချာကတိနုဲင်းနဝ်ꩻသွူ။

၁ သျင်ႏဘုရင်ဖုံႏ ၁၆-၁၈: ၂ ဘုရင်ဖုံႏ ၅: ယေရမိအနာဂတ္တိ 38 မꩻ သမ္မာႏလိတ်ကျမ်ꩻ ငဝ်းခြုဲင်း