၄၆ - ‘ရှောလု’ ထွာလွဉ်ကိုယ်ႏတောႏ ‘ယေရှု’ လွိုက်ꩻဖဲ့ꩻချာသား

တယွုမ်းတဝ်းကိုယ်ႏတောႏ ‘ယေရှု’ ယို ‘ရှောလု’ ကရိုꩻဒါႏလိုꩻပေႏအဝ်ႏတဖြာꩻသွူ။ ဝွေꩻနဝ်ꩻပေႏပေႏခါကာႏ ‘သတေဖန်’ ကမာꩻသီဒါႏလိုꩻဖုံႏခွမ်ꩻလာꩻနဝ်ꩻအုံပွိုးဗာႏဖိုနဝ်ꩻသွူ။ နဝ်ꩻဆချာဝွေꩻနဝ်ꩻလဲ့ꩻကယွုမ်းအံႏဒါႏလိုꩻဖုံႏယို မာꩻ သီနုဲင်းခန်းနဝ်ꩻသွူ။ ဝွေꩻနဝ်ꩻ ‘ယေရုရှလင်’ လိုꩻခိုတွမ်ႏလိုꩻမူႏဖုံႏယိုတလမ်းထင်ႏတလမ်းလင်ꩻဆွမ်ꩻလွꩻသွူတဲင်သော့ꩻ ခန်းထောင်ႏကိုနဝ်ꩻသွူ။ နဝ်ꩻဆချာသာႏသနာႏရေꩻဆဲင်ႏရာꩻမဟာနာႏယကတန်နဝ်ꩻ ‘ရှောလု’ ယိုဖေႏခန်းလွေꩻ ခွင်ꩻ ‘ဒမာသက်’ ဝေင်ꩻတဲင်လိုꩻကယွုမ်းဒါႏကိုယ်ႏတောႏ ‘ယေရှု’ ဖုံႏယို ဖေႏကဆွမ်ꩻလွဉ်ဝွေꩻသီးဖုံႏထျꩻ ထွဉ်ႏဟွိုန်ခါꩻခန်း နုဲင်းနဝ်ꩻသွူ။

နဝ်ꩻတွော့ꩻ ‘ရှောလု’ နဝ်ꩻလွေꩻတွိုႏခန်း ‘ဒမာသက်’ ဝေင်ꩻနဝ်ꩻသွူ။ ဝွေꩻကထွိုင်ႏတွိုႏဝေင်ꩻထျꩻတဲင်မို့ꩻလောင်း ထာꩻလေရောင်ႏဖုံႏနဝ်ꩻပေါႏလွဉ်သွူဝွေꩻသောင်တဲင်ဝွေꩻနဝ်ꩻဝꩻလင်ꩻခန်းဟံႏတန်လောင်းနဝ်ꩻသွူ။ ‘ရှောလု’ နဝ်ꩻတဖြာꩻဖြာꩻ “ရှောလု ရှောလုနာႏပွိုးတမုဲင်ꩻထုမ်ႏတွိုႏခွေအပဲစ်ဟောင်း” ဟွိုန်ခန်းငဝ်းရီနုဲင်းနဝ်ꩻသွူ။ ‘ရှောလု’ နဝ်ꩻ “ဆရာႏနဝ်ꩻပါမုဲင်ꩻ” ရီထွူတဲင် ကိုယ်ႏတောႏ ‘ယေရှု’ နဝ်ꩻ “ပွိုးထမုဲင်ꩻနာꩻထုမ်ႏအပဲစ်ဟောင်း” မိန်းခန်းနုဲင်းနဝ်ꩻသွူ။

‘ရှောလု’ ကထွိုင်ႏထွိုင်ႏလွဉ်အချိန်ႏတွင်ꩻဝွေꩻထာꩻထီႏအာႏရွုဏ်ႏဖုံႏယိုသွုမ်ꩻထိုꩻသွူတဲင်ဝွေꩻသွꩻပေႏဖုံႏနဝ်ꩻဟဲ့ꩻလွေꩻ ခန်းဝွေꩻအွိုး ‘ဒမာသက်’ ဝေင်ꩻနဝ်ꩻသွူ။ ‘ရှောလု’ နဝ်ꩻသွံနီꩻဗွေႏဗွေႏထမုဲင်ꩻမꩻတအံႏတဝ်းအအံႏအအွသွူ။

‘ဒမာသက်’ ဝေင်ꩻယို ‘အာနနိ’ ကဟဲ့ꩻဒါႏတပဲ့ꩻတဖြာꩻအဝ်ႏနဝ်ꩻသွူ။ ဘုရာꩻသျင်ꩻယိုလိုꩻနဝ်ꩻနဝ်ꩻ “နာꩻလွေꩻ သွူ ရှောလု လမ်းတဲင်နာꩻစူနဝ်ꩻအွဉ်ႏဒင်ႏ ရှောလု လောင်းတွော့ꩻမဲ့ꩻ ရှောလ ထာꩻထီႏအာႏ ရွုဏ်ႏ မဲ့ꩻ ရှောလု လꩻ ချာဒျာႏ” မိန်းဟွိုန်ခန်းနုဲင်းနဝ်ꩻသွူ။ ကွဲႏတွော့ꩻ ‘အာနနိ’ နဝ်ꩻ “ဗွေႏ လိုꩻယွုမ်းအံႏသားဖုံႏဖေႏဗာႏအပဲစ်ဖုံႏယိုခွေဟွိုန်ဖို” သျှောက်ဒင်ႏချာခန်းနုဲင်းနဝ်ꩻသွူ။ ဘုရာꩻသျင်ꩻနဝ်ꩻ “ယုဒ လိုꩻမျိုꩻဖုံႏတွမ်ႏလိုꩻအလင်ဖုံႏဖေႏကယွုမ်းလွဉ် နဝ်ꩻ ရှောလု ယိုခွေလွိုက်ရွေꩻသေအတွက်နာꩻလွေꩻဟုဲင်း” မိန်းဟွိုန်ခန်းနုဲင်းနဝ်ꩻသွူ။

နဝ်ꩻတွော့ꩻ ‘အာနနိ’ နဝ်ꩻလွေꩻသွူ ‘ရှောလု’ထျꩻတဲင် ဝွေꩻစူဖုံႏယို ဒင်ႏသွူ ‘ရှောလု’ လောင်းတွော့ꩻ “နာꩻကလွဉ်ဒါႏ တဖူꩻကထီႏဒါႏကိုယ်ႏတောႏ ယေရှု နဝ်ꩻထဲင်ဖေႏသွူနာꩻတဲင်ကကြောင်းစင်ဒါႏဘုရာꩻထာꩻသေဉာဏ်ႏအရောင်ႏနဝ်ꩻဖေႏက ခွဲထီႏတွမ်ႏဝွေꩻတဲင်အွဉ်ႏလွစ်လွေꩻဗာႏခွေ နာꩻထျꩻ” မိန်းခန်းနုဲင်းနဝ်ꩻသွူ။ တလဲင်ႏချင်ႏစွဉ်ႏဒျာႏ ‘ရှောလု’ နဝ်ꩻလꩻချာခန်း ထာꩻထီႏအာႏရွုဏ်ႏဖုံႏတဲင် ‘အာနနိ’ နဝ်ꩻမာꩻဖေႏခန်းဝွေꩻထီမျွုတ်ꩻမင်္ဂလာႏနဝ်ꩻသွူ။ နဝ်ꩻဆချာ ‘ရှောလု’ နဝ်ꩻအံႏသွူအအံႏ အအွယဟန်ႏတဲင်ခြွိုင်ႏချာခန်းဒျာႏနဝ်ꩻသွူ။

တလဲင်ႏချင်ႏစွဉ်ႏဒျာႏ ‘ရှောလု’ နဝ်ꩻ ‘ဒမာသက်’ ဝေင်ꩻကအဝ်ႏဒါႏ ‘ယုဒ’ လိုꩻမျိုꩻဖုံႏယိုဟော်ꩻပျောႏခန်းကိုယ်ႏ တောႏ ‘ယေရှု’ အကျောင်ꩻနဝ်ꩻသွူ။ ဝွေꩻနဝ်ꩻ “ကိုယ်ႏတောႏ ယေရှု ယိုထွာဘုရာꩻ သျင်ꩻပိုခို” ဒေါ့ꩻခန်းနုဲင်းနဝ်ꩻသွူ။‘ရှောလု’ နဝ်ꩻယိုခါကယွုမ်းဒါႏလိုꩻဖုံႏနဝ်ꩻထွာမာꩻသီသားတဲင် ယိုခါထွာယွုမ်းအံႏကိုယ်ႏတောႏ ‘ယေရှု’ လိုꩻတဖြာꩻ အကျောင်ꩻ ‘ယုဒ’ လိုꩻမျိုꩻဖုံႏနဝ်ꩻအံႏသြလွခန်းဒျာႏနဝ်ꩻသွူ။ ‘ရှောလု’ နဝ်ꩻတွမ်ႏ ‘ယုဒ’ လိုꩻမျိုꩻဖုံႏထိန်ငြင်ꩻသွူဝင်ꩻတဲင် ကိုယ်ႏတောႏ ‘ယေရှု’ နဝ်ꩻထွာ ‘မေရှိယ’ ယိုဒေါ့ꩻနယ်သျင်ꩻ သျင်ꩻလဲင်ꩻလဲင်ꩻနဝ်ꩻသွူ။

နီꩻပေါင်ꩻကထွိုင်ႏည ‘ယုဒ’ လိုꩻမျိုꩻဖုံႏနဝ်ꩻအီႏမာꩻသီ ‘ရှောလု’ အတွက်မာꩻခန်းအကျံႏဉာဏ်ႏတဗာႏနဝ်ꩻသွူ။ ဝွေꩻသီးဖုံႏနဝ်ꩻအီႏမာꩻသီ ‘ရှောလု’ အတွက်ဝေင်ꩻတံခါꩻဖုံႏယိုအီႏအွဉ်ႏအုံပွိုးအီတာႏအွဉ်ႏလွဉ်လွေꩻခန်းလိုꩻယဟန်ႏနဝ်ꩻ သွူ။ ကွဲႏတွော့ꩻ ‘ရှောလု’ ကထွိုင်ႏဟွိုန်အကျံႏအဉာဏ်ႏဖုံႏတဲင်ဝွေꩻမိတ်ဆွေႏဖုံႏအကူႏအညီႏတဲင်ဖင်းထန်ႏလွစ်ထိုꩻ ခန်းဒျာႏနဝ်ꩻသွူ။ ‘ရှောလု’ ဖင်းထန်ႏလွစ်ထိုꩻ ‘ဒမာသက်’ ဝေင်ꩻတဲင်ဟော်ꩻသွဉ်ဆွိုက်ခန်းကိုယ်ႏတောႏ ‘ယေရှု’ အ ကျောင်ꩻနဝ်ꩻသွူ။

‘ရှောလု’ နဝ်ꩻလွေꩻသွူ ‘ယေရုရှလင်’ တဲင်လွေꩻကျွုံႏခွဲခန်းတွမ်ႏတပဲ့ꩻအလင်ဖုံႏနဝ်ꩻသွူ။ ကွဲႏတွော့ꩻဝွေꩻသီး ဖုံႏနဝ်ꩻ ငမ်းလွ ‘ရှောလု’ နဝ်ꩻသွူ။ နဝ်ꩻဆချာ ‘ဗာနဗ’ ကဟဲ့ꩻဒါႏယွုမ်းအံႏသားဝွေꩻတဖြာꩻ နဝ်ꩻ ‘ရှောလု’ ယိုဟဲ့ꩻလွေꩻ ခန်းတပဲ့ꩻတောႏဖုံႏထျꩻနဝ်ꩻသွူ။ ‘ရှေလု’ နဝ်ꩻ ‘ဒမာသက်’ ဝေင်ꩻရုဲင်းရုဲင်းဟန်ဟန်ဒေါ့ꩻဟော်ꩻခန်းကိုယ်ႏတောႏ ‘ယေရှု’ အကျောင်ꩻတဲင် ‘ဗာနဗ’ တပဲ့ꩻတောႏဖုံႏဒေါ့ꩻလွꩻ ဝင်ꩻနဝ်ꩻသွူ။ နဝ်ꩻဆချာတပဲ့ꩻတောႏဖုံႏနဝ်ꩻယွုမ်းအံႏလက်ခံႏ ခန်း ‘ရှောလု’ နဝ်ꩻသွူ။

‘ယေရုရှလင်’ ဖေႏအပဲစ်မာꩻသီတန်ႏ ဖင်းထန်ႏလွစ်ထန်ႏထိုꩻဒါႏလိုꩻယွုမ်းအံႏသားယဟန်ႏသားဖုံႏနဝ်ꩻ လွေꩻသွူ ‘အန္တိအုတ်’ ဝေင်ꩻတဲင်ဒေါ့ꩻသွဉ်ခန်းကိုယ်ႏတောႏ ‘ယေရှု’ နဝ်ꩻသွူ။ ‘အန္တိအုတ်’ ဝေင်ꩻကအဝ်ႏဒါႏလိုꩻ အမျာꩻစုꩻနဝ်ꩻ ‘ယုဒ’ လိုꩻမျိုꩻတမွေးတဝ်းသွူ။ ကွဲႏတွော့ꩻပထမသွတ်ꩻအလဲင်ႏအနေႏ ‘ယုဒ’ လိုꩻမျိုꩻတမွေး တဝ်းဖုံႏယိုအီႏသွဉ်ဖေႏကိုယ်ႏတောႏ ‘ယေရှု’ အကျောင်ꩻတွမ်ႏဘုရာꩻသာႏသနာႏတောႏဖေႏကတဉ်ႏခွေါင်နဝ်ꩻ ဒေါ့ꩻဟောထွာလိုꩻ ယွုမ်းအံႏသားဖုံႏနဝ်ꩻသွူ။ ‘ဗာနဗ’ တွမ်ႏ ‘ရှောလု’ သီးဖုံႏနဝ်ꩻခင်ႏလမ်းနဝ်ꩻကိုကအဝ်ႏဒါႏယွုမ်းအံႏသား တသ်ꩻခန်းဒျာႏနဝ်ꩻသွူ။ ‘အန္တိအုတ်’ ကအဝ်ႏဒါႏယွုမ်းကိုယ်ႏတောႏ ‘ယေရှု’ သားဖုံႏယိုလိုꩻဖုံႏဟဲ့ꩻရီးထွာလွဉ် ခရစ်ယာန်နဝ်ꩻသွူ။

တွိုႏတနီꩻတွော့ꩻလိုꩻကယွုမ်းဒါႏကိုယ်ႏတောႏ ‘ယေရှု’ ဖုံႏနဝ်ꩻသျှောင်ႏထာꩻအံႏ ဆုတောင်ꩻထာꩻအချိန်ႏ တွင်ꩻကြောင်းစင်ဒါႏဘုရာꩻထာꩻသေဉာဏ်ႏအရောင်ႏနဝ်ꩻ “ဗာနဗ တွမ်ႏ ရှောလု နဝ်ꩻဝွေꩻသီးဖုံႏယိုခွေကမာꩻဒါႏ အခရာႏဖုံႏယိုထွာမာꩻလွေꩻနုဲင်းလဲဉ်း” မိန်း ခန်းနုဲင်းနဝ်ꩻသွူ။ နဝ်ꩻတွော့ꩻ ‘အန္တိအုတ်’ ဘုရာꩻကျောင်ꩻလိုꩻဖုံႏ နဝ်ꩻ ‘ဗာနဗ’ တွမ်ႏ ‘ရှောလု’ သီးဖုံႏအွဉ်ႏဒင်ႏသွူအစူဖဲ့ꩻကီတဲင်ဆုတောင်ꩻဖေႏခန်းဒျာႏနဝ်ꩻသွူ။ နဝ်ꩻဆချာဝွေꩻသီး ယိုဝင်ꩻနီဖေႏကလွေꩻဒေါ့ꩻသွဉ်ကိုယ်ႏတောႏ ‘ယေရှု’ အကျောင်ꩻယိုအွဉ်ႏလွစ်လွေခန်းခင်ႏလမ်းအလင်ဖုံႏနဝ်ꩻသွူ။ ‘ဗာနဗ’ တွမ်ႏ ‘ရှောလု’ သီးဖုံႏနဝ်ꩻသွဉ်သင်ဖေႏလိုꩻပေါင်ꩻအာတဲင်လိုꩻဖုံႏနဝ်ꩻယွုမ်းခန်းကိုယ်ႏတောႏ ‘ယေရှု’ အ ကျောင်ꩻနဝ်ꩻသွူ။

တမန်တောႏ ၈:၃;၉:၁-၃၁; ၁၁:၁၉-၂၆; ၁၃:၁-၃ မꩻ သမ္မာႏလိတ်ကျမ်ꩻ ငဝ်းခြုဲင်း