၁၂ - ထန်ႏထိုꩻ

‘ဣစရေး’ လိုꩻမျိုꩻနဝ်ꩻ ဖခွာႏထိုꩻဗာႏ ‘အီဂျစ်’ တဲင် ပျောႏသွင်ႏလွဝင်ꩻ မရေႏမရာႏနဝ်ꩻသွူ။ ဝွေꩻသီးဖုံႏနဝ်ꩻ ကူႏလီႏတမွေးတဝ်းဒွုမ်၊ ဝွေꩻသီးဖုံႏ လွေꩻလွသွူ ဘုရာꩻသျင်ꩻကဖေႏခါꩻဒါႏ ဝွေꩻသီးဟံႏခင်ႏလမ်းနဝ်ꩻသွူ။ ‘အီဂျစ်’ လိုꩻမျိုꩻနောဝ်ꩻ ‘ဣစရေး’ လိုꩻမျိုꩻဖုံႏ ကကွီဒါႏ ရွဉ်ခံꩻတွမ်ႏ တန်ႏဖိုꩻကတန်ဒါႏ အလင်ဖုံႏယိုတဲ့ ဖေႏလွခန်းနဝ်ꩻသွူ။ ကယွုမ်းအံႏဒါႏဘုရာꩻသျင်ꩻ နုဲင်ႏငံႏအလင်လိုꩻမျိုꩻယဟန်ႏဖုံႏနောဝ်ꩻ ‘ဣစရေး’ လိုꩻမျိုꩻဖုံႏကထန်ႏဒါႏ ‘အီဂျစ်’ ယို ပါ လွေꩻလွဉ် ခန်းဒျာႏနဝ်ꩻသွူ။

မွူးယာချိန်ႏနဝ်ꩻ မို့ꩻအေႏထွန်ႏထိုတဗာႏ အွဉ်လွေꩻ ဝွေꩻသီးဖဲ့ꩻငါ နဝ်ꩻသွူ။ မို့ꩻအေႏထွန်ႏထိုယို မွူးဟာချိန်ႏ နဝ်ꩻထွာတေားဒျာႏ မေႏတေန်ꩻတန်သွူ။ ဘုရာꩻသျင်ꩻနဝ်ꩻ အဝ်ႏညီꩻတသေႏ ဝွေꩻသီးထွူ တွမ်ႏမို့ꩻအေႏတန်၊ တွမ်ႏမေႏတေန်ꩻတန်အနေႏ ထွာအွဉ်ႏနယ်တဖူꩻသားသွူ။ ဝွေꩻသီးဖုံႏ ကဆောင်ႏရွက်ဗာႏ ထာꩻမာꩻတဗာႏယို ထွာလဲ့ကျွို့ꩻ လွိုက်ꩻလွဉ်ꩻဝွေꩻ ဆချာနဝ်ꩻသွူ။

အချိန်ႏတဆင်ႏအတွင်ꩻ ‘ဖာရို’ တွမ်ႏဝွေꩻလိုꩻဖုံႏ သꩻပြောင်ꩻလုဲင်ႏထွူတဲင် ဝွေꩻသီးနောဝ်ꩻမဲဉ်အွဉ်ႏထွာချာ‘ဣစရေး’ လိုꩻမျိုꩻဖုံႏ ကူႏလီႏထာꩻမာꩻသားဖုံႏသွူ။ နဝ်ꩻတွော့ꩻ ဝွေꩻသီးနောဝ်ꩻ လော်ႏလွဉ်ꩻ မွိုင်မွိုင်ခန်း ‘ဣစရေး’လိုꩻမျိုꩻဆချာနဝ်ꩻသွူ။ ဝွေꩻသီးဖုံႏ သꩻဖေႏကပြောင်ꩻလုဲင်ႏနုဲင်းယိုနောဝ်ꩻ ဘုရာꩻသျင်ꩻ မာꩻဒျာႏသွူ။ ကမာꩻဗာႏနုဲင်းယိုနောဝ်ꩻ ‘ယာဝေ’ ကရိုꩻဒါႏပါꩻယို အစွန်ꩻထင်ကယ်ꩻထဲင်းက ‘ဖာရော’ တွမ်ႏ ‘အီဂျစ်’ ကအဝ်ႏဒါႏတနံဘုရာꩻအလို့အကျောင်ꩻမဲဉ်အွဉ်ႏသေငါႏလိုꩻထွိုင်ႏဖုံႏနဝ်ꩻသွူ။

‘ဣစရေး’ လိုꩻမျိုꩻနဝ်ꩻ ကထွိုင်ႏထီႏ ‘အီဂျစ်’ စဲ့တပ်ထင်ႏလွဉ်ချိန်ႏတွင်ꩻ ‘ဖာရို’ စဲ့တပ်တွမ်ႏ ပင်ႏလယ်ႏနျာႏခါႏ နီဖိုႏ ရဲးပေ့ꩻထိုꩻလဲဉ်းအကျောင်ꩻ အွဉ်ႏသတိခန်းနဝ်ꩻသွူ။ လိုꩻဖုံႏကားကအဝ်ႏနဝ်ꩻ ငမ်းလို့ စွဉ်ႏတဲင်၊ “ပွိုးတမုဲင်ꩻ နီဖုံႏပယ်ႏခွာႏလွေꩻဗာႏ အီဂျစ်ဟောင်း၊ နီဖုံႏယို အီသီဗာႏသွူထာꩻ” ဒေါ့ꩻသွူနုဲင်းနဝ်ꩻ ငွိုးလွခန်း၀င်ꩻထာꩻနဝ်ꩻသွူ။

‘မောရှေ’ နဝ်ꩻ ‘ဣစရေး’ လိုꩻမျိုꩻဖုံႏ “သီကငမ်းဒါႏထာꩻဖုံႏနဝ်ꩻ အွဉ်ထွူခန်ႏလုဲင်း” ဘုရာꩻသျင်ꩻနဝ်ꩻ ဟန်ႏနီꩻအတာႏ အီနွို့တွိုက်ꩻပွယ်ꩻအီကယ်ႏဒျာႏသီ ရိုꩻနုဲင်းနဝ်ꩻသွူ။ နဝ်ꩻတွော့ꩻ ဘုရာꩻသျင်ꩻနဝ်ꩻ“လိုꩻဖုံႏယို ထွဉ်ႏပြောင်ꩻလွေꩻခန်း ပင်ႏလယ်ႏနျာႏထျꩻ” ဒေါ့ꩻခန်း ‘မောရှေ’ နုဲင်းနဝ်ꩻသွူ။

နဝ်ꩻဆချာ မို့ꩻအေႏတန်နဝ်ꩻ ပြောင်ꩻတေားလွေꩻသွူ ‘ဣစရေး’ လိုꩻမျိုꩻတွမ်ႏ ‘အီဂျစ်’ လိုꩻမျိုꩻဖုံႏအခါႏတဲင် မွူးထွိုင်ႏဟာထွာထိုꩻမေႏတေန်ꩻတန်သွူ။ ‘အီဂျစ်’ လိုꩻမျိုꩻဖုံႏနဝ်ꩻ တဟာလွုမ်းလွုမ်းလွေꩻတွိုက် ‘ဣစရေး’ လိုꩻမျိုꩻ ထျꩻတလတဝ်းနဝ်ꩻသွူ။

နဝ်ꩻတွော့ꩻ ဘုရာꩻသျင်ꩻနဝ်ꩻ ထွဉ်ႏယောင်းသွူ ‘မောရှေ’ စူ ပင်ႏ လယ်ႏအလောင်းတဲင် တွမ်ႏတလီꩻ ထွဉ်ႏနွမ်ႏနဝ် ထင်ꩻပင်ႏလယ်ႏထီတွော့ꩻ ပင်ႏလယ်ႏအကို တဖူꩻတလီး ထွဉ်ႏပေါႏပေါက်လွဉ်ခန်ႏနဝ်ꩻသွူ။

‘ဣစရေး’ လိုꩻမျိုꩻဖုံႏနဝ်ꩻ ဖျက်သွူထီပင်ႏလယ်ႏတွော့ꩻ ထန်ႏလွေꩻခန်း ထီႏတံႏတွိုင်ႏနီဖဲ့ꩻ အခါႏကအဝ်ႏဒါႏ ဟံႏကွုံꩻသဲင် အလောင်း နဝ်ꩻသွူ။

နဝ်ꩻတွော့ꩻ အီဂျစ်လိုꩻမျိုꩻဖုံႏနဝ်ꩻ ထီႏခန်း ‘ဣစရေး’ လိုꩻမျိုꩻဖုံႏ လွင်းထန်ႏတဲင် လော်ႏဆွမ်ꩻလွဉ်ꩻခန်း ‘ဣစရေး’ လိုꩻမျိုꩻဖုံႏနဝ်ꩻသွူ။

နဝ်ꩻအချိန်ႏ ဝွေꩻသီးဖုံႏနောဝ်ꩻ ဗွိုန်နုဲင်း ‘ဣစရေး’ လိုꩻမျိုꩻအတွိုင်ႏ လော်ႏလွဉ်ခန်း ပင်ႏလယ်ႏကိုကအဝ်ႏဒါႏတဖူꩻအတွိုင်ႏနဝ်ꩻသွူ။ ကွဲႏတွော့ꩻဘုရာꩻသျင်ꩻနဝ်ꩻ ‘အီဂျစ်’ လိုꩻမျိုꩻဖုံႏဖေႏကငမ်းတဲင် ဝွေꩻသီးလောဖုံႏ ထွဉ်ႏအွဉ်ႏတပတ်စွဉ်ႏထာꩻသွူ။ ဝွေꩻသီးဖုံႏနဝ် “ဖင်းလွꩻခန်ႏဟုဲင်း ဘုရာꩻသျင်ꩻ တွိုက်ꩻရဝ်း ‘ဣစရေး’ လိုꩻမျိုꩻဖုံႏဖဲ့ꩻ” ခြောဝ်လွဝင်ꩻနုဲင်းနဝ်ꩻသွူ။

‘ဣစရေး’ လိုꩻမျိုꩻဖုံႏ ကားကအဝ်ႏ ထွိုင်ႏတွိုႏလွေꩻ အွိုးတဖဲ့ꩻတဲင် ဘုရာꩻသျင်ꩻနောဝ်ꩻ ထွဉ်ႏအွဉ်ႏယောင်းယင်း ‘မောရှေ’ စူ ထီလောင်းနဝ်ꩻသွူ။ ‘မောရှေ’ ကထွိုင်ႏမာꩻယင်းနဝ်ꩻ ထီဖုံႏလင်ꩻလို့ ‘အီဂျစ်’ စဲ့ꩻတပ်လောင်းထီထွာချာယင်း နုဲင်းအလီꩻတဲင် ‘အီဂျစ်’ စဲ့ꩻတပ်တတပ်လွုမ်း ထီဗဉ်ႏထိုꩻခန်းဒျာႏနဝ်ꩻသွူ။

‘ဣစရေး’ လိုꩻမျိုꩻဖုံႏ ကထွိုင်ႏထီႏ ‘အီဂျစ်’ လိုꩻမျိုꩻဖုံႏကသီထိုꩻတဲင်၊ ဝွေꩻသီးနဝ်ꩻ ယွုမ်းအံႏထိုꩻမွေးစွဉ်ႏ ဘုရာꩻသျင်ꩻထွူ၊ ‘မောရှေ’ ယို ထွာဘုရာꩻသျင်ꩻ နိမိတ်ထွားဟော်ꩻ ပညာႏသားတဖြာꩻကရိုꩻ နဝ်ꩻ ယွုမ်းထိုꩻလွဝင်ꩻသွူ။

ဘုရာꩻသျင်ꩻနောဝ်ꩻ ကယ်ႏဒင်ႏဖေႏ ‘ဣစရေး’ လိုꩻမျိုꩻဖုံႏ အသက်ဖုံႏလွုမ်ꩻမကာႏ ကူႏလီႏသွဉ်းသယ်ႏ ဘဝတဲ့ ကယ်ႏဒင်ႏတဲင်တွော့ꩻ ဝွေꩻသီးဖုံႏ ပျောႏသွင်ႏသꩻရေꩻမွေးစွဉ်ႏနဝ်ꩻသွူ။ ယိုခါ ဝွေꩻသီးဖုံႏနောဝ်ꩻ ကိုႏကွယ်ႏလွတ်လွတ်လပ်လပ်ခန်း ဘုရာꩻသျင်ꩻနဝ်ꩻသွူ။ ဝွေꩻသီးဖုံႏနဝ်ꩻ ဘုရာꩻသျင်ꩻ ကကယ်ႏဖေႏ ‘အီဂျစ်’ စဲ့ꩻတပ်ဘေꩻယို ထူႏ ဂုဏ်ႏတွမ်ႏငဝ်းသချင်ꩻဖုံႏတွော့ꩻ ခံႏလွခန်း၀င်ꩻ အောင်ႏပွယ်ꩻ နဝ်ꩻသွူ။

‘ဣစရေး’ လိုꩻမျိုꩻဖုံႏနဝ်ꩻ ဘုရာꩻသျင်ꩻယို ထူႏ ‘အီဂျစ်’ အနွောင်ꩻ၊ မာꩻလွစ်ဖေႏ ကူႏလီႏသွဉ်းသယ်ႏ ဘဝတွော့ꩻ ထူႏဂုဏ်ႏအထိန်ꩻအမတ်အနေႏတဲင် နေင်ႏတွိုင်ꩻ ဖေႏကမာꩻပွယ်ꩻတဖြုံႏ မိန်းခါꩻနုဲင်းနဝ်ꩻသွူ။ ပွယ်ꩻယိုနဝ်ꩻဟဲ့ꩻ ‘ပသခါ ပွယ်ꩻတောႏ’ တွော့ꩻ မိဉ်ႏမာꩻ ပွယ်ꩻနဝ်ꩻ မာꩻသီသွူ ဗဲ့ꩻ ခြွိုင်ႏသန်ꩻ တဗာႏတွော့ꩻ ခွိုင်ꩻသွူမေႏတဲင် ဖေႏကအံႏတွမ်ႏ တခိုးနဝ်ꩻသွူ။

ဓမ္မလီꩻ ၁၂:၃၃-၁၅:၂၁ မꩻ သမ္မာႏလိတ်ကျမ်ꩻ ငဝ်းခြုဲင်း