၂၃။ လွူးဖွာꩻလင် ကိုယ်ႏတောႏ ‘ယေရှု’

‘မာရိ’ နဝ်ꩻ စေ့ꩻစပ်ခါꩻစွဉ်ႏ ‘ယောသပ်’ အမဉ်ꩻကအဝ်ႏဒါႏ လိုꩻရိုꩻသာꩻစွဉ်ႏစွော့ꩻတဖြာꩻနဝ်ꩻသွူ။ ‘ယောသပ်’ ကထွိုင်ႏဟွိုန် ‘မာရိ’ အဝ်ႏနမ်းလောင်းထာꩻတဲင်ꩻ ပါꩻပေႏယိုနဝ်ꩻ ဝွေꩻပိုတမွေးတဝ်းယိုအဝ်ႏသေꩻဒျာႏသွူ။ ကွဲတွော့ꩻ ဝွေꩻနဝ်ꩻ ‘မာရိ’ ဖေႏက၀င်ꩻသꩻဗာႏ မွိုန်း၀င်ꩻတဲင် ဝွေꩻမူႏအလောင်း အွဉ်ႏခန်း ဂရုဏာႏတွော့ꩻ ဆွုံꩻ ဖျက်တေ့ꩻခန်း ထွဉ်ႏအွဉ်ႏကုဲင်ဖေႏ ဝွေꩻမူႏနဝ်ꩻသွူ။ ကွဲတွော့ꩻ ကလားကမာꩻ နုဲင်းယိုချိန်ႏတွင် တနံဗျဟ္မာႏ တဖြာꩻနဝ်ꩻ နွို့ꩻလွဉ်သွူ ဝွေꩻ ထာꩻဗေင်ႏမင်းကိုတဲင် လွဉ်ဒေါ့ꩻဝွေꩻငဝ်းနဝ်ꩻသွူ။

တနံဗျဟ္မာႏနဝ်ꩻနဝ်ꩻ “ယောသပ်၊ ‘မာရိ’ ဖေႏကလက်ခံႏနာꩻမာꩻအတာႏ တွမ်ႏထွာမွိုန်းထာꩻသူႏရိမ်ႏ။ ဝွေꩻမူႏ ကဆဲင်ခါႏဒါႏလိုꩻပေႏယိုနဝ်ꩻ နေးတွမ်ႏ ဘုရာꩻသျင်ꩻမျတ်ꩻတန်ႏခိုꩻအစွန်ꩻတဲင် ပဋိသန္ဓေႏလလွဉ်ဒျာႏသွူ။ ဝွေꩻမူႏနဝ်ꩻ မဲ့အီႏလွူးလင်ꩻဒျာႏပိုခိုတောႏတဖြာꩻ နဝ်ꩻသွူ။ ဝွေꩻယိုဖေႏသွော့ꩻအမဉ်ꩻ ‘ယေရှု’ သွူ။ (အဓိပ္ပါယ်ႏ နောဝ်ꩻ ကယ်ႏဒင်ႏ တောႏ ထာꩻ၀ရ ဘုရာꩻသျင်ꩻ အဓိပ္ပါယ်ႏလꩻ နုဲင်းနဝ်ꩻသွူ)။ ပွိုးနုဲင်းမုဲင်နဲးတဲင် ဝွေꩻနောဝ်ꩻ လိုꩻဖုံႏအပဲစ်ဖုံႏယို ထွာအီကယ်ႏဒင်ႏနဝ်ꩻသွူ” မိန်ခန်းနုဲင်းနဝ်ꩻသွူ။

နဝ်ꩻတွော့ꩻ ‘ယောသပ်’ နဝ်ꩻ တောႏလမ်းခန်း ‘မာရိ’ တွော့ꩻ သဲင်ꩻ ခန်းဝွေႏလမ်းနောဝ်ꩻသွူ။ ကွဲတွော့ꩻဝွေꩻနဝ်ꩻ ဗတွိုႏစွဉ်ႏ လွူးပိုထွူချိန်ႏ တဗေင်ႏညီႏတဝ်းဝင်ꩻသွူ။

‘မာရိ’ လွူးဖွာꩻပိုအချိန်ႏကထွိုင်ႏဗော့ꩻ ဝွေꩻမူႏတွမ်ႏ ‘ယောသပ်’ နဝ်ꩻ လွေꩻခန်းတဖူꩻညာꩻ ‘ဝေင်ꩻဗက်လင်’ နဝ်ꩻသွူ။ ပွိုးတမုဲင်ꩻနဲး တဲင် ‘ဣစရေး’ လိုꩻမျိုꩻဖုံႏယို ရောမ အာႏဏာႏသား ကောက်သန်ꩻခေါင်စꩻရင်ႏတဲင် နဝ်ꩻမလွေꩻ ဗာႏနဝ်ꩻသွူ။ ဝွေꩻသီးဖုံႏနဝ်ꩻ လိုꩻ တွိုင်ꩻယို ထွဉ်ႏလွေꩻခန်း ဝွေꩻသီး မွိုးဖြားဖာဖြား ကအဝ်ႏအုံဒါႏခင်ႏလမ်းထျꩻနဝ်ꩻသွူ။ ခွန်တန် ‘ဒါဝိဒ်’ နဝ်ꩻ လွူးဖွာꩻဝေင်ꩻ ‘ဗက်လင်’ တဲင် ဝွေꩻယိုနဝ်ꩻ ထွာ ‘မာရိ’ တွမ်ႏ ‘ယောသပ်’ သီး ဖာ ဖြားနဝ်ꩻသွူ။

‘မာရိ’ တွမ်ႏ ‘ယောသပ်’ သီးနဝ်ꩻ လွေꩻခန်းဝေင်ꩻ ‘ဗက်လင်’ နဝ်ꩻသွူ။ ကွဲတွော့ꩻ ဝွေꩻသီးအတွက်တာႏမꩻ တိရိစ္ဆာန်ႏအလင်ခင်ႏလမ်းတဲင် အလင်နောဝ်ꩻ လꩻတဝ်းခင်ႏလမ်းသွူ။ ဝွေꩻမူႏနဝ်ꩻ လိုꩻပေႏဗေင်ႏခရာႏ ခင်ႏလမ်းအဝ်ႏ တဝ်းတွော့ꩻ အွဉ်ႏဗေင်ႏသော့ꩻခန်း ဖိုးဆာႏခြောင်းကိုတဲင် ဝွေꩻသီးနောဝ်ꩻ လိုꩻပေႏမဉ်ꩻယို ဟဲ့ꩻခန်း ‘ယေရှု’ နောဝ်ꩻသွူ။

အဟာနဝ်ꩻတွော့ꩻ မဗော့ꩻမညာꩻလုဲင်းကွင်ꩻကိုနဝ်ꩻ ကထိန်ꩻသိမ်ꩻဒါႏ ‘ဗဲ့ꩻ’ ဖုံႏနဝ်ꩻ ‘ဗဲ့ꩻ’ ထိန်ꩻသားယဟန်ႏဖုံႏနောဝ်ꩻအဝ်ႏသွူ။ တလဲင်ႏ ချင်ꩻထာꩻလေသွူထာꩻတွော့ꩻ တနံဗျဟ္မာႏတပါꩻ ပေါႏလွဉ်သွူ တဲင် ‘ဗဲ့ꩻ’ တီသားဖုံႏ သꩻဝꩻခန်းနဝ်ꩻသွူ။ တနံဗျဟ္မာႏ နောဝ်ꩻ “တွမ်ႏငမ်းမွိုန်း ‘သျင်ꩻမေရှိယ’ နောဝ်ꩻလွူးဖွာꩻလင်လွဉ်လဲဉ်း ‘ဝေင်ꩻဗက်လင်’ အကျောင်ꩻ လွဉ်ဒေါ့ꩻသတင်ꩻဟဝ်ဒျာႏ” မိန်းခန်း နုဲင်းနဝ်ꩻသွူ။

“လွေꩻထွုမ်ႏပါပေႏနဝ်ꩻဟုဲင်း ဝွေꩻယိုလွဉ်ပတ်ခါꩻသွူတဲင် အဝ်ႏ ဗေင်ႏသော့ꩻ ဖိုးဆာꩻခြောင်းကိုနဝ်ꩻ မဲ့ꩻသီထီႏဒျာႏ” မိန်းခန်းနုဲင်းနဝ်ꩻသွူ။ တလဲင်ႏချင်ꩻ မို့ꩻတန်နဝ်ꩻ တနံဗျဟ္မာႏဗွေဗိတ်သွူတဲင် ဘုရာꩻသျင်ꩻနဝ်ꩻ ဖေႏခန်းဝွေꩻသီး ထာꩻဟဝ်နဝ်ꩻသွူ။ တနံဗျဟ္မာႏဖုံႏနဝ်ꩻ “နိဗ္ဗာန်ႏခံꩻဝေင်ꩻ ကအဝ်ႏဒါႏ ဘုရာꩻသျင်ꩻဂုဏ်ႏကေꩻဇူꩻအပေါင်ꩻယိုနီဖုံႏ ကေꩻဇူꩻ တင်ႏငါႏနဝ်ꩻသွူ။ ကမ္ဘာႏလောင်းယို ဘုရာꩻသျင်ꩻအလွိုႏတောႏ ကအဝ်ႏဒါႏလိုꩻပေါင်ꩻ ကားကအဝ်ႏယို ယံကငိမ်ꩻချံꩻ” ကေꩻဇူꩻတင်ႏခန်းဘုရာꩻသျင်ꩻနဝ်ꩻသွူ။

နဝ်ꩻဆချာ တနံဗျဟ္မာႏ ကထွိုင်ႏထန်ႏထိုꩻထွူ ‘ဗဲ့ꩻ’ တီသားဖုံႏလဲ့အွဉ်ႏကုဲင်သွူ အဗဲ့ꩻဖုံႏတဲင်လွေꩻထွုမ်ႏလွဉ်ခန်းပါꩻပေႏနဝ်ꩻသွူ။ ဝွေꩻသီးဖုံႏနဝ်ꩻ တညတဝ်းအချိန်ႏ တွိုႏလွဉ်ခန်းပါꩻပေႏ ‘ယေရှု’ ကအဝ်ႏဒါႏခင်ႏလမ်းထျꩻတဲင် တနံဗျဟ္မာႏကဒေါ့ꩻဒါႏဝွေꩻသီးအတွိုင်ꩻ ထီႏခန်းပါꩻပေႏဗေင်ႏတလွာꩻထာꩻဖိုးဆာꩻခြောင်းကိုနဝ်ꩻသွူ။ ဝွေꩻသီးဖုံႏနဝ်ꩻ သꩻတနွို့ꩻမွေႏငါႏထာꩻတဲင် သဲင်ꩻချာခန်းဝွေꩻသီးဖုံႏ ‘ဗဲ့ꩻ’ ဖုံႏ ကအဝ်ႏဒါႏလုဲင်းကွင်ꩻထျꩻနဝ်ꩻသွူ။ ဝွေꩻသီးဖုံႏနောဝ်ꩻ ဝွေꩻသီး ဟွိုန်ဗာႏထီႏဗာႏမန်ႏသမျှအတာႏ ကေꩻဇူꩻတင်ႏမွေးငါႏ ဘုရာꩻသျင်ꩻနဝ်ꩻသွူ။

ဆကွဉ်ႏဖဲ့ꩻကအဝ်ႏဒါႏနုဲင်ႏငံႏတနုဲင်ႏ လိုꩻခိုယဟန်ဖုံႏနောဝ်ꩻ ပညာႏအဝ်ႏသားဖုံႏယို ထွားခေႏလေ့ꩻလာခန်း ဆာႏ ဖုံႏနဝ်ꩻသွူ။ ဝွေꩻသီးဖုံႏနဝ်ꩻ မို့ꩻလောင်းကီ ထီႏခန်း ကထူႏဆန်ꩻဒါႏ ဆာႏတန်တဖြုံႏတဲင် ဝွေꩻသီးဖုံႏနဝ်ꩻ ယိုနဝ်ꩻ ‘ယုဒ’ လိုꩻမျိုꩻဖုံႏ လွူးဖွာꩻလင်ခွန်တသာ အဓိပ္ပါယ်ႏလꩻနုဲင်းယို ဒေါ့ꩻလွခန်းဝင်ꩻနဝ်ꩻသွူ။ လွေꩻထွားပါꩻပေႏ နဝ်ꩻ ဆွုံꩻဖျက်သွူနုဲင်းနောဝ်ꩻတဲင် ဝွေꩻသီးဖုံႏနဝ်ꩻ အဝ်ႏဝွေꩻသီး နုဲင်ႏငံႏထန်ႏခန်းတဖူꩻနဝ်ꩻသွူ။ လွေꩻတဖူꩻညာꩻထွူဝွေꩻသီးဖုံႏနဝ်ꩻ တွိုႏ လွေꩻသွူ ‘ဝေင်ꩻဗက်လင်’ တဲင် ထီႏခန်း ပါꩻပေႏ ‘ယေရှု’ တွမ်ႏ ဝွေꩻအမွိုးဖာဖုံႏ ကအုံဒါႏလမ်းနဝ်ꩻသွူ။

ဝွေꩻသီးဖုံႏနဝ်ꩻ ခွဲသွူတွမ်ႏ ‘ယေရှု’ မွိုးတဲင် ခံႏနွမ်ꩻရိုꩻသေခန်း ‘ယေရှု’ နဝ်ꩻသွူ။ ဝွေꩻသီးဖုံႏနဝ်ꩻ တန်ႏဖိုꩻကတန်ဒါႏ လက်ဆောင်ႏဘဏ္ဍာႏဖုံႏယို ပူႏဇောႏခန်း ပါꩻပေႏ ‘ယေရှု’ နဝ်ꩻသွူ။ ဝွေꩻသီးဖုံႏ နဝ်ꩻ သဲင်ꩻချာခန်းအလမ်းဖုံႏနဝ်ꩻသွူ။

သျင်ႏမဿဲခရစ်နွို့ꩻ ၁; သျင်ႏလုကာခရစ်နွို့ꩻ ၂ မꩻ သမ္မာႏလိတ်ကျမ်ꩻ ငဝ်းခြုဲင်း