၃၁ - ‘ကိုယ်ႏတောႏယေရှု’ လွေꩻထာꩻထီလောင်း

‘ကိုယ်ႏတောႏယေရှု’ နောဝ်ꩻ လွူးစာႏဂလိုꩻငတ်ꩻရေင်ကထွိုင်ႏထွူ ဝွေꩻတပဲ့ꩻဖုံႏယို ဖေႏကထင်ႏဖြီလောင်း မိန်းခန်းနုဲင်းနဝ်ꩻသွူ။ နဝ်ꩻကထွိုင်ႏထွူ ‘ကိုယ်ႏတောႏယေရှု’ နဝ်ꩻ ဝွေꩻတပဲ့ꩻဖုံႏယို အွဉ်ႏဝါးလွေꩻခန်း ထီအွိုင်ႏအွိုး တဖဲ့ꩻနဝ်ꩻသွူ။ နဝ်ꩻတွော့ꩻ ဝွေꩻတပဲ့ꩻဖုံႏ ထန်ႏလွေꩻကထွိုင်ႏထွူ ကအဝ်ႏဒါႏလိုꩻဖုံႏယို ‘ကိုယ်ႏတောႏယေရှု’ နဝ်ꩻ ထွဉ်ႏ သဲင်ꩻခန်းအလမ်းဖုံႏနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ လွေꩻသွူကောင်အွိုးတဖဲ့ꩻတွော့ꩻ ခင်ႏလမ်းနဝ်ꩻ ဗꩻစွဉ်ႏမွူးဟာချိန်ႏ ဝွတ်ꩻပြုဘုရာꩻသျင်ꩻ ဆုꩻတောင်ꩻခန်းဒျာႏနဝ်ꩻသွူ။

ချိန်ႏခါႏနဝ်ꩻတွင်ꩻ ‘ကိုယ်ႏတောႏယေရှု’ တပဲ့ꩻဖုံႏနဝ်ꩻတလီꩻသန်စွဉ်ႏလဲ့ꩻဖြီဖြုဲင်ꩻယိုအဝ်ႏဖြုဲင်ꩻနေကဒွုမ်းသွူ။ ကထွိုင်ႏတွိုႏမွူးကွို့ꩻနာꩻခိန်ႏ ဝွေꩻသီးဖုံႏနဝ်ꩻ စတွိုႏထီအွိုင်ႏအထာꩻဝလွုမ်ꩻနဝ်ꩻသွူ။

အချိန်ႏနဝ်ꩻနဝ်ꩻ ‘ကိုယ်ႏတောႏယေရှု’ နဝ်ꩻ ဆုꩻတောင်ꩻ ဘုရာꩻသျင်ꩻအမုꩻဖုံႏကထွိုင်ႏထွူတဲင် ဖေႏကသဲင်ꩻ ခွဲချာ တွမ်ႏဝွေꩻတပဲ့ꩻဖုံႏအတာႏ ကျွꩻသဲင်ꩻချာခန်းဒျာႏနဝ်ꩻသွူ။ ‘ကိုယ်ႏတောႏယေရှု’ နဝ်ꩻ လွေꩻသွူထာꩻထီလောင်း လွေꩻခန်းဝွေꩻတပဲ့ꩻဖုံႏကအဝ်ႏဒါႏ ဖြီထျꩻနဝ်ꩻသွူ။

ဝွေꩻတပဲ့ꩻတောႏဖုံႏ ကထွိုင်ႏထီႏ ‘ကိုယ်ႏတောႏယေရှု’ နဝ်ꩻ ထင်းဒျာႏထာꩻတဟဝ်တဝ်းတဲင် ငမ်းလွꩻခန်း ဝင်ꩻနဝ်ꩻသွူ။ ‘ကိုယ်ႏတောႏယေရှု’ နောဝ်ꩻ ဝွေꩻသီးကငမ်းယို အဝ်ႏသေဒျာႏတဲင် “တွမ်ႏငမ်းမွိုန်း ခွေနဝ်ꩻ ‘ကိုယ်ႏ တောႏယေရှု’ ဒျာႏ” မိန်းခန်းနုဲင်းနဝ်ꩻသွူ။

နဝ်ꩻဆချာ ‘ပေတရု’ ရိုꩻ ‘ကိုယ်ႏတောႏယေရှု’ “ကိုယ်ႏတောႏ နာꩻ နဝ်ꩻ မဉ်ႏထွာ ‘ကိုယ်ႏတောႏယေရှု’ မဲဉ်ႏ ဒျာႏတဲ့ ကိုယ်ႏတောႏထျꩻယို ခွေသွဉ်းဖေႏကလွေꩻနွောင်ꩻ ထီလောင်းအတာႏ မိန်းလဝ်းခန်း နုဲင်းနဝ်ꩻသွူ။ နောဝ်ꩻ တွော့ꩻ ‘ကိုယ်ႏတောႏယေရှု’ နဝ်ꩻ ‘ပေတရု’ လွဉ်ဟုဲင်း” မိန်းခန်းနုဲင်းနဝ်ꩻသွူ။

နဝ်ꩻတွော့ꩻ ‘ပေတရု’ နဝ်ꩻ လင်ꩻသွူဖြီတဲင် လွေꩻသွူထီမဲ့ꩻငါ လောင်းတွော့ꩻ လွေꩻခန်း ‘ကိုယ်ႏတောႏယေ ရှု’ ထျꩻနဝ်ꩻသွူ။ ကွဲတွော့ꩻ လွေꩻစံꩻသွူဆေ့ꩻဆေ့ꩻတဲင် မဲ့ꩻနဝ်ꩻထွားတဝ်းဒွုမ် ‘ကိုယ်ႏတောႏယေရှု’ တွော့ꩻ ကထွိုင်ႏ ထီႏ ထီလေင်းဖုံႏနဝ်ꩻ ခံႏစာꩻဗာႏဗွိုန်နုဲင်းတလီꩻသန်နဝ်ꩻသွူ။

နဝ်ꩻဆချာ ‘ပေတရု’ ငမ်းလွဉ်ꩻငါႏတဲင် မျွုတ်ꩻသော့ꩻခန်း ထီကိုနဝ်ꩻသွူ။ ဝွေꩻနဝ်ꩻ “ဗွေႏကယ်ႏခွေယို” ခြဝ် ငဝ်းငွိုးခန်းဒျာႏထာꩻနဝ်ꩻသွူ။ တလဲင်ႏချင်ႏစွဉ်ႏဒျာႏ ‘ကိုယ်ႏတောႏယေရှု’ နဝ်ꩻ ‘ပေတရု’ စူအဝ်ႏယွိုင်ႏထာꩻယို ထွို့ꩻ ထန်ႏခန်းဒျာႏနဝ်ꩻသွူ။ နဝ်ꩻဆချာ ဝွေꩻရိုꩻ ‘ပေတရု’ “နာꩻနဝ်ꩻ ထာꩻယွုမ်းအံႏဆေ့ꩻငါႏ။ နာꩻယို ဘေꩻဖေႏက ကင်ꩻနဝ်ꩻ ပွိုးတမုဲင်ꩻတယွုမ်းတဝ်း” မိန်းခန်းနုဲင်းနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ တွမ်ႏ ‘ပေတရု’ သီးနဝ်ꩻ ကထွိုင်ႏတွိုႏ ဖြီလောင်းတွင်ꩻတလီꩻသန်ထာꩻယိုလဲ့ꩻ တလဲင်ႏချင်ႏ ယေန်ထိုꩻသွူတဲင် ထီနဝ်ꩻလဲ့ꩻ စွူထိုꩻခန်းနဝ်ꩻသွူ။ တပဲ့ꩻတောႏဖုံႏနောဝ်ꩻ အံႏဖြာႏလွꩻသွူဝင်ꩻတဲင် အဝ်ႏ ‘ကိုယ်ႏတောႏယေရှု’ ဖဲ့ꩻငါ ဝုဲင်ꩻလွꩻခန်းဝင်ꩻနဝ်ꩻသွူ။ ဝွေꩻသီးဖုံႏနဝ်ꩻ “ကိုယ်ႏတောႏ နဝ်ꩻ ထွာဘုရာꩻ သျင်ꩻ ပိုခို ယို မွေးမဲဉ်ႏဒျာႏ” ဒေါ့ꩻလွꩻဝင်ꩻနုဲင်းနဝ်ꩻတဲင် ငေါက်ကတူႏဝုဲင်ꩻရိုꩻသေႏခန်းဒျာႏ နဝ်ꩻသွူ။

သျင်ႏမဿဲခရစ်နွို့ꩻ ၁၄:၂၂-၃၃; မာကုခရစ်နွို့ꩻ ၆:၄၅-၅၂; သျင်ႏယောဟန်ခရစ်နွို့ꩻ ၆:၁၆-၂၁; မꩻ သမ္မာႏလိတ်ကျမ်ꩻ ငဝ်းခြုဲင်း