၁၈ - ကကွဲꩻပျာꩻဒါႏ နုဲင်ႏငံႏတောႏ

‘ဒါဝိဒ်’ ခွန် အုပ်ချွုတ်ကထွိုင်ႏည နေင်ႏလစ်ဆီမာꩻချာ စဝွေꩻကသီထိုꩻချိန်ႏတွင်ꩻဝွေꩻပို ‘ဆော်လမွန်’ နဝ်ꩻ စအုပ်ချွုတ်သွူ ‘ဣစရေး’ နဝ်ꩻသွူ။ ဘုရာꩻသျင်ꩻနဝ်ꩻ ‘ဆော်လမွန်’ အမဲဉ်လꩻသွတ်ꩻနဝ်ꩻ တ မုဲင်ꩻ၊ ခွေအီမာꩻဖေႏဗာႏနုဲင်းမုဲင်ꩻရီခန်းနုဲင်းနဝ်ꩻသွူ။ ‘ဆော်လမွန်’ နဝ်ꩻ နမ်းပညာႏဖေႏကတန် ဖေႏကချံႏသာႏ မာꩻဖေႏသွော့ꩻနုဲင်းနဝ်ꩻ သျောက်လဝ်ႏစွဉ်ꩻ ဘုရာꩻသျင်ꩻနုဲင်းနောဝ်ꩻသွူ။ မာꩻပျောႏသွူ ဘုရာꩻသျင်ꩻနုဲင်းယိုတဲင် ကမ္ဘာႏလောင်းဖေႏကထွာဉာဏ်ႏပညာႏအထင်မျတ်ꩻသွတ်ꩻလိုꩻတဖြာꩻနဝ်ꩻ မာꩻဖေႏခန်း ‘ဆော်လမွန်’ နဝ်ꩻသွူ။ ‘ဆော်လမွန်’ နဝ်ꩻ စစရာႏရာႏသွဉ်ꩻထူႏထွူတဲင် ထွာလွဉ်စွဉ်ႏဉာဏ်ႏပညာႏအဝ်ႏ အုပ်ချွုတ်သားတဖြာꩻနောဝ်ꩻသွူ။ ဘုရာꩻသျင်ꩻတဲ့ဖေႏမွေးစွဉ်ႏဝွေႏထာꩻချံႏသာႏနဝ်ꩻသွူ။

‘ဆော်လမွန်’ နဝ်ꩻ ‘ဣစရေး’ယို သွုံꩻသွူ ဖာခွန် ‘ဒါဝိဒ်’ အကျံႏအစဲႏတွမ်ႏ ဝွေꩻကစုရွဉ်ꩻသေꩻဒါႏ ကွန်ႏကျံꩻဖုံႏယိုတဲင် မာꩻလွေꩻခန်း ဘုရာꩻကျောင်ꩻတောႏဆောင်နဝ်ꩻသွူ။ လိုꩻဖုံႏကကိုႏကွယ်ႏဒါႏ ဘုရာꩻသျင်ꩻ ခွဲကျုံႏသိုမ်းခင်ႏလမ်းအစား ကိုႏကွယ်ႏသော့ꩻလုဲင်ႏ ဘုရာꩻသျင်ꩻ ကျောင်ꩻတောႏဆောင်နဝ်ꩻသွူ။ ဘုရာꩻသျင်ꩻ ကျွꩻလွဉ် ထွူတဲင်။ အုံအဝ်ႏဘုရာꩻကျောင်ꩻကိုတွော့ꩻ စံႏတောႏညီꩻခန်း၀င်ꩻဖုံႏနဝ်ꩻသွူ။

ကွဲတွော့ꩻ ‘ဆော်လမွန်’ နဝ်ꩻ ကျွိုက်ရက်စွယ်ꩻခန်း လိုꩻမူႏနုဲင်ႏငံႏအလင်တွော့ꩻ ဝွေꩻနဝ်ꩻ တောႏလမ်းခန်း လိုꩻမူႏ တရေင်ရပ်တဲင် လွိုဆန်ꩻစွဉ်ႏဒျာႏ ဘုရာꩻသျင်ꩻငဝ်းနဝ်ꩻသွူ။ လိုꩻမူႏအာဖုံႏနဝ်ꩻ ထွာဒျာႏနုဲင်ႏငံႏအလင်ဖုံႏတဲင် ထူႏလွဉ်ပါ ဝွေꩻသီးကကိုႏကွယ်ႏဒါႏ ဘုရာꩻဖုံႏတွော့ꩻ အဝ်ႏကိုႏကွယ်ႏဆွိုက်လွဝင်ꩻနဝ်ꩻသွူ။ ‘ဆော်လမွန်’ က ထွိုင်ႏဖြားနဝ်ꩻ ဝွေꩻသီးဖုံႏဘုရာꩻယိုꩻတဲ့ ကိုႏကွယ်ႏလွꩻနဝ်ꩻသွူ။

ဘုရာꩻသျင်ꩻ ပွိုးအကျောင်ꩻနဝ်ꩻဖုံႏတဲင် သꩻလျား ‘ဆော်လမွန်’ တွော့ꩻ ‘ဣစရေး’ ယို ဖနီခဝ် အီဖေႏအပဲစ် မိန်းနုဲင်းနဝ်ꩻသွူ။ ‘ဆော်လမွန်’ ကထွိုင်ႏသီထိုꩻနဝ်ꩻ ဖေႏအပဲစ် နုဲင်းနဝ်ꩻအတွိုင်ႏသွူ။

‘ဆော်လမွန်’ ထွိုင်ႏသီထွူ ဝွေꩻပိုခို ‘ရောဗောင်’ ထွာလွဉ်ခွန်တဲင် ‘ဣစရေး’ ကို ကအဝ်ႏဒါႏလိုꩻဖုံႏနဝ်ꩻ အီႏဒင်ႏမျောက် ဝွေꩻခွန်အတာႏ စုꩻပြုံႏလွဉ်ခန်းဒျာႏနောဝ်ꩻသွူ။ ဝွေꩻသီးဖုံႏ ‘ဆော်လမွန်’ ခွန်စူကို ကေပ်အာငါႏအခွဉ်ႏ ထွဉ်ႏအာငါႏထာꩻမာꩻ သောင်ခြင်ꩻ ဒေါ့ꩻ ဟွိုန်ခန်း ‘ရောဗောင်’ နုဲင်းနဝ်ꩻထွူ ထွဉ်ႏချော့ꩻဖေႏနီထာꩻမာꩻ ဒေါ့ꩻလွဝင်ꩻနုဲင်းနဝ်ꩻသွူ။

‘ရောဗောင်’ နဝ်ꩻ “သီဖုံႏနဝ်ꩻ ရိုꩻခွေဖာ ‘ဆော်လမွန်’ ထွဉ်ႏအာငါႏ ထာꩻမာꩻ ဒေါ့ꩻလွ၀င်ꩻနုဲင်းနဝ်ꩻသွူ။ ကွဲတွော့ꩻခွေယိုနဝ်ꩻ အီႏထွဉ်ႏအာကယ်ထဲင်း ကဝွေꩻ” ဒေါ့ꩻဟွိုန်ဗားမွေးစွဉ်ႏနုဲင်းနဝ်ꩻသွူ။

ကထွိုင်ႏဟွိုန် ဝွေꩻဒေါ့ꩻနုဲင်းယို လိုꩻကဲဉ်းအာအာနဝ်ꩻ ပုန်ႏကန်ႏလွဝွေꩻတဲင် လိုꩻမျိုꩻစုꩻဆီမျိုꩻနဝ်ꩻထန်ႏထိုꩻဝွေꩻထျꩻတွော့ꩻ ဝွေꩻအထျꩻအဝ်ႏကုဲင်ကွို့ꩻ လိုꩻမျိုꩻစုꩻနီစုꩻလွုမ်ꩻသွူ။ ကအဝ်ႏကုဲင်ဒါႏ လိုꩻမျိုꩻစုꩻနဝ်ꩻတဲ့ ဝွေꩻသီးနမ်းတွမ်ႏဝွေꩻသီး သတ်မတ်လွဒျာႏ ‘ယုဒနုဲင်ႏငံႏတောႏ’ နဝ်ꩻသွူ။

အဝ်ႏကုဲင်လိုꩻမျိုꩻစုꩻဆီစုꩻနောဝ်ꩻ ‘ယေရောဗောင်’ ကဟဲ့ꩻဒါႏလိုꩻတဖြာꩻယို ဒင်ႏမျောက်ထွာစွဉ်ႏ ဝွေꩻသီးဖုံႏအွဉ်ငါႏသားနဝ်ꩻသွူ။ လိုꩻမျိုꩻစုꩻနဝ်ꩻဖုံႏနဝ်ꩻ အဝ်ႏဖဲ့ꩻထင်ꩻတခဝ်တဲင် ဝွေꩻသီးနမ်းတွမ်ႏဝွေꩻသီးဖုံႏနဝ်ꩻ သတ်မတ်လွ ‘ဣစရေး’ နုဲင်ႏငံႏတောႏ ဖုံႏသွူ။

‘ရောဗောင်’ နဝ်ꩻ လွိုဆန်ꩻသွူ ဘုရာꩻသျင်ꩻ လိုꩻဖုံႏယို ထွဉ်ႏမာꩻလို့ခန်းအပဲစ်နဝ်ꩻသွူ။ ဝွေꩻနဝ်ꩻဝွေꩻလိုꩻမျိုꩻဖုံႏကိုႏကွယ်ႏအီအတာႏ ဖေႏခါꩻရျွုတ်တုနီဗာႏတဲင် ဝွေꩻသီးဖုံႏ မဉ်ႏကိုႏကွယ်ႏ ဘုရာꩻသျင်ꩻ တလွေꩻဗာႏတောဝ်းဒွုမ် ‘ယေရုရှလင်’ ကအဝ်ႏဒါႏ ဘုရာꩻကျောင်ꩻတောႏကို နဝ်ꩻသွူ။

‘ယုဒနုဲင်ႏငံႏတောႏ’ တွမ်ႏ ‘ဣစရေး’ ဖုံႏနဝ်ꩻ ထွာလွဉ်ရန်ႏသူႏဖုံႏတဲင် မညတဆင်ႏအချင်ꩻချင်ꩻတွိုက်ꩻရန်ႏလွဝင်ꩻသွူ။

‘ဣစရေး’ နုဲင်ႏငံႏတောႏတသာယို ခွန်အလို့နဝ်ꩻ အယံတအဝ်ႏတဝ်း ဟုဲင်းငါႏလွဖုံႏသွူ။ ခွန်နဝ်ꩻဖုံႏတဲ့ꩻ ခံႏဗာႏ ‘ဣစရေး’ လိုꩻမျိုꩻ ကမဲဉ်ထွာဒါႏခွန်သားဖုံႏ မာꩻသီသွူ။

ခွန်အလို့တွမ်ႏ ‘ဣစရေး’ လိုꩻမျိုꩻအလို့ဖုံႏနဝ်ꩻ ကိုႏကွယ်ႏလွ ရျွုတ်တုဖုံႏနဝ်ꩻသွူ။ ဝွေꩻသီးဖုံႏနဝ်ꩻ ကမာꩻလွဉ်နုဲင်းယိုချိန်ႏတွင်ꩻ ည တဝ်းတဆင်ႏ ဗေင်ႏညီꩻပြည့်တန်ဆာမ ( မေႏဖျဲး ) ဝွေꩻသီးရျွုတ်တုဖုံႏယို ယလဲင်ႏလဲင်ႏလိုꩻပေႏဖုံႏ ပူႏဇောႏပသဗာႏဒျာႏနဝ်ꩻသွူ။

‘ယုဒ’ သီးခွန်ဖုံႏနဝ်ꩻ ထွာဘုရာꩻမျိုꩻနွယ်ႏတဲင် ခွန်ယဟန်ႏ အုပ်ချွုတ်ယံတဲ့ꩻ ခွန်ကဲဉ်းအာဖုံႏနဝ်ꩻ ထွာဒျာႏလိုꩻတယံတဝ်းဖုံႏနဝ်ꩻသွူ။ ဝွေꩻသီးဖုံႏနဝ်ꩻ အုပ်ချွုတ်ဟုဲင်းခါꩻငါႏတဲင် ရျွုတ်တုဖုံႏတဲ့ꩻ ကိုႏ ကွယ်ႏခါꩻဒျာႏသွူ။ ခွန်ယဟန်ႏဖုံႏနဝ်ꩻ ဘုရာꩻအတုဖုံႏယို ဝွေꩻသီးဖုံႏ ပိုပေႏဖုံႏတဲ့ꩻ မာꩻစွဉ်ႏလူႏသက် စွန်ꩻကျဲꩻသက်ဖုံႏသွူ။ ‘ယုဒ’ကို ကအဝ်ႏဒါႏလိုꩻဖုံႏနဝ်ꩻ ဆန့်ကျင်လွိုဆန်ꩻသွူ ဘုရာꩻသျင်ꩻတဲင်ꩻ ကိုႏ ကွယ်ႏလုဲင်ႏဘုရာꩻအလင်ꩻဖုံႏနဝ်ꩻသွူ။

၁ သျင်ႏဘုရင်ဖုံႏ ၁-၆: ၁၁-၁၂ မꩻ သမ္မာႏလိတ်ကျမ်ꩻ ငဝ်းခြုဲင်း