၂၄ - သျင်ꩻ ‘ယောဟန်’ နဝ်ꩻ မꩻမာꩻဖေႏ ‘ယေရှု’ ထီမျွုတ်ꩻမင်္ဂလာႏ

‘ဇာခရိ’ တွမ်ႏ ‘အဲလိဇဘက်’ သီး ပိုခိုကထွာဒါႏ ‘ယောဟန်’ သက်ကထွိုင်ႏတန် ထွာထိုꩻခန်းနိမိတ်ထွား ဟောꩻ ပညာႏအဝ်ႏသားနဝ်ꩻသွူ။ ဝွေꩻနဝ်ꩻ အုံထာꩻခြာꩻကန္တာရကိုတဲင် အွတမူထီ အံႏပဒွေႏတဲင် ဆဲင်ꩻနဝ်ꩻ မာꩻသွူ ကုလာꩻအုပ်ဆွမ်ꩻတဲင် ကခန်းဒျာႏခွမ်ꩻလာꩻနဝ်ꩻစားသွူ။

လိုꩻအာဖုံႏနဝ်ꩻ ထန်ႏလွဉ်သွူ ထာꩻခြာꩻကန္တာရကိုတဲင် လွဉ်နာႏခန်း ‘ယောဟန်’ ဟောꩻတရာꩻဖုံႏနဝ်ꩻသွူ။ သျင်ꩻ ‘ယောဟန်’ နဝ်ꩻ လိုꩻအာဖုံႏယို “လလွသွော့ꩻ သံႏဝွေႏဂဟုဲင်း ဘုရာꩻသျင်ꩻသာႏသနာႏတောႏဗော့ꩻလွဉ်သွူ” ဟောသေꩻခန်းနုဲင်းနဝ်ꩻသွူ။

လိုꩻဖုံႏကထွိုင်ႏဟွိုန် သျင်ꩻ ‘ယောဟန်’ ငဝ်းသတင်ꩻ လိုꩻအာဖုံႏနဝ်ꩻ ဝွေꩻသီးဖုံႏအပဲစ်အတာႏ လꩻလွသံႏဝွေႏဂတဲင် သျင်ꩻ ‘ယောဟန်’ နဝ်ꩻမာꩻဖေႏခန်း ထီမျွုတ်ꩻမင်္ဂလာႏနဝ်ꩻသွူ။ ကအာဒါႏဘာႏသာႏရေꩻ အွဉ်ငါသားဖုံႏနဝ်ꩻ လွဉ်စွဉ်ႏသျင်ꩻ ‘ယောဟန်’ ထျꩻရိုꩻကီလဲ့ꩻ ဝွေꩻသီးအပဲစ်ဖုံႏယို ဝွန်ႏခံႏ၊ လꩻသံႏဝွေႏဂ နဝ်ꩻ တအဝ်ႏတဝ်းသွူ။

သျင်ꩻ ‘ယောဟန်’ နဝ်ꩻ ဘာႏသာႏရေꩻအွဉ်ငါသားဖုံႏယို “သီဖုံႏနဝ်ꩻ ထွာသွူရူးဖုံႏအဆိပ်အဝ်ႏတဲင် ပြောင်ꩻ သွူသီအကျင်ꩻစရိတ်တွော့ꩻ လꩻသွော့ꩻ သံႏဝွေႏဂဟုဲင်း။ ဘုရာꩻသျင်ꩻနဝ်ꩻ အရာႏဟဝ် တရာႏတဝ်း အမွူးတွိုင်ꩻယို ဖဲ့ဝꩻထွူတဲင် အီသော့ꩻမေႏကို” ဒေါ့ꩻခန်းနုဲင်းနဝ်ꩻသွူ။ “နာꩻကလွဉ်ဒါႏတဖူꩻယို ဖေႏကဖျင်ဆဲင်ꩻနွောင်ꩻနဝ်ꩻ နာꩻဖဲ့ꩻငါယို မဲ့ꩻခွေအွဉ်ႏလွစ်လွဉ်ဖေႏသတင်ꩻသားတဖြာꩻ” နိမိတ်ထွားဟောꩻပညာႏအဝ်ႏသားငဝ်းယို သျင်ꩻ ‘ယောဟန်’ ထဲင်ဖေႏ နဝ်ꩻသွူ။

ဘာႏသာႏရေꩻအွဉ်ငါသား ယဟန်ႏဖုံႏနောဝ်ꩻ သျင်ꩻ ‘ယောဟန်’ ယို ‘မေရှိယ’ မွေးနေ ရီခန်းနုဲင်းနဝ်ꩻသွူ။ သျင်ꩻ ‘ယောဟန်’ နဝ်ꩻ “ခွေ နဝ်ꩻ ‘မေရှိယ’ မွေးတဝ်း။ ကွဲတွော့ꩻ ဝွေꩻနဝ်ꩻ အီႏတွိုႏလွဉ်ခွေဖဲ့ꩻချာ နဝ်ꩻသွူ။ ဝွေꩻနဝ်ꩻ မျတ်ꩻတန်မွေးငါတဲင် ခွေနဝ်ꩻ အီစွိုင်ဖေႏ၀ွေꩻ ခင်ႏဖာႏဖြွီꩻငါတဲ့ တတန်ႏတဝ်း” ဒေါ့ꩻလဝ်းချာနုဲင်းနဝ်ꩻသွူ။

တွိုႏယင်းတနီꩻတွော့ꩻ ‘ကိုယ်ႏတောႏယေရှု’ နဝ်ꩻ အီမာꩻထီမျွုတ်ꩻ မင်္ဂလာႏတဲင် တွိုႏလွဉ်ခန်း သျင်ꩻ ‘ယော ဟန်’ ထျꩻနဝ်ꩻသွူ။ သျင်ꩻ ‘ယောဟန်’ ကထွိုင်ႏထီႏဝွေꩻနဝ်ꩻ “ကမ္ဘာႏတန် ကအဝ်ႏအပဲစ်တရာꩻဖုံႏယို အီႏထူႏလွေꩻ အွိုးအညာꩻတဲင် ထွားသွော့ꩻ ဘုရာꩻသျင်ꩻသီး ဗဲ့ꩻပေႏဖုံႏဟုဲင်း” ဒေါ့ꩻဟွိုန်ခန်းနုဲင်းနဝ်ꩻသွူ။

သျင်ꩻ ‘ယောဟန်’ နဝ်ꩻ ကိုယ်ႏတောႏ ‘ယေရှု’ “ခွေနဝ်ꩻ အီႏမာꩻဖေႏနာꩻ ထီမျွုတ်ꩻမင်္ဂလာႏနဝ်ꩻ တတန်ႏတဝ်းသွူ။ နာꩻနဝ်ꩻဒျာႏ အဝ်ႏလွိုႏမာꩻဖေႏခွေ ထီမျွုတ်ꩻမင်္ဂလာႏ” ဒေါ့ꩻခန်းနုဲင်းနဝ်ꩻသွူ။ ကွဲတွော့ꩻ ‘ကိုယ်ႏတောႏ ယေꩻရှု’ နဝ်ꩻ “နာꩻနဝ်ꩻ မာꩻဖေႏဗာႏခွေ ထီ မျွုတ်ꩻမင်္ဂလာႏနဝ်ꩻသွူ။ ပွိုးတမုဲင်ꩻနဲးတဲင် အခရာႏယိုနောဝ်ꩻ ထွာအကျောင်ꩻခရာႏမဲဉ်ႏ” မိန်းခန်းနုဲင်းနဝ်ꩻသွူ။ နဝ်ꩻတွော့ꩻ ‘ကိုယ်ႏတောႏ ‘ယေရှု’ နဝ်ꩻ အချိန်ႏမုဲင်ꩻတဲ့ မာꩻဖိုတဝ်း အပဲစ်တဲင် ‘ယောဟန်’ နဝ်ꩻ မာꩻဖေႏခန်း ထီမျွုတ်ꩻမင်္ဂလာႏနဝ်ꩻသွူ။

‘ကိုယ်ႏတောႏ ‘ယေရှု’ နဝ်ꩻ ခံႏထူႏသွူ ထီမျွုတ်ꩻမင်္ဂလာႏတဲင် အဝ်ႏထီကို ပေါႏထန်ႏလွဉ်တွင် ကသင်ႏကျဲႏ ဒါႏ ဘုရာꩻသျင်ꩻ ဝိညာဉ်ႏတောႏနဝ်ꩻ လင်ꩻသွူတွမ်ႏ ဝါးတောက်တူး အနေႏတဲင် လင်ꩻခန်း ‘ကိုယ်ႏတောႏ ယေရှု’ လောင်းနဝ်ꩻသွူ။ အချိန်ႏနဝ်ꩻတွင် ဘုရာꩻသျင်ꩻနောဝ်ꩻ “ဝွေꩻယိုနဝ်ꩻ ထွာခွေပိုခို။ ခွေ ရက်စွယ်ꩻ ဝွေꩻတဲင် ဝွေꩻအလောင်း ကေꩻ နပ်နိက်သက်လွေꩻငါႏနဝ်ꩻသွူ”။ အဝ်ႏမို့ꩻလောင်း မိန်းလင်ꩻခန်းနုဲင်းနဝ်ꩻသွူ။

ဘုရာꩻသျင်ꩻဒေါ့ꩻ ‘သျင်ꩻယောဟန်’ “နာꩻမာꩻဖေႏဒါႏ လိုꩻတဖြာꩻဖြာꩻအလောင်း ထီမျွုတ်ꩻမင်္ဂလာႏတဲင် ဝွေꩻသူꩻအလောင်း ကကြောင်းစင်ဒါႏဉာဏ်ႏအရောင်ႏတောႏနဝ်ꩻ အီႏကျွꩻလင်ꩻလွဉ်နဝ်ꩻသွူ။ ဝွေꩻယိုနဝ်ꩻ ထွာဘုရာꩻသျင်ꩻပိုခို” ဒေါ့ꩻခန်းနုဲင်းနဝ်ꩻသွူ။ ဘုရာꩻသျင်ꩻနောဝ်ꩻ ထွာဘုရာꩻတဆူႏပေႏလွုမ်ꩻနဝ်ꩻသွူ။ ကွဲတွော့ꩻ ‘သျင်ꩻယောဟန်’ နဝ်ꩻ မာꩻဖေႏ ‘ကိုယ်ႏတောႏယေရှု’ ထီမျွုတ်ꩻမင်္ဂလာႏခိန်ႏတွင်ꩻ ဟွိုန်သွူ ဝွေꩻဖာဘုရာꩻသျင်ꩻ မိန်းလဝ်းငဝ်း တဲင် ဘုရာꩻပိုခို ‘ယေရှု’ ထျꩻ ကကြောင်းစင်ဒါႏ ဉာဏ်ႏအလေရောင်ႏတောႏ တွိုႏလွဉ်ယိုလဲ့ꩻ ထီႏခန်းဒျာႏနဝ်ꩻသွူ။

သျင်ႏမဿဲခရစ်နွို့ꩻ ၃; ၁: ၉-၁၁; မာကုခရစ်နွို့ꩻ ၁:၉-၁၁; သျင်ႏလုကာခရစ်နွို့ꩻ ၃:၁-၂၃ မꩻ သမ္မာႏလိတ်ကျမ်ꩻ ငဝ်းခြုဲင်း