၇ - ဘုရာꩻသချင် ဖေႏ ‘ယာကုပ်’ ထာꩻဟဝ်

ပါꩻပေႏနဝ်ꩻဖုံႏ အသက်ကထွိုင်ႏတန်လွဉ်ချိန်ႏ ‘ယာကုပ်’ နဝ်ꩻ နိက်သက် အုံလမ်း၊ ‘ဧသော’ နဝ်ꩻသဘောႏကျဒျာႏထွုမ်ႏလော် တိရိစ္ဆာန်ႏသွူ။ ‘ရေဗက္က’ နောဝ်ꩻ ရက် ‘ယာကုပ်’၊ ‘ဣဇာက်’ နောဝ်ꩻ ရက်ဒျာႏ ‘ဧသော’ သွူ။

တနီꩻနဝ်ꩻတွော့ꩻ ‘ဧသော’ လော်ထာꩻသားသဲင်ꩻ ဟို့ꩻခိုးသဲင်ꩻတဲင် ‘ဧသော’ နဝ်ꩻ ဒေါ့ꩻခန်း ‘ယာကုပ်’ “နာꩻကမာꩻခါꩻဒါႏထာꩻအံႏအဆေ့ꩻတွမ်ႏအအာနဝ်ꩻ ဖေႏခွေဟုဲင်း”။ နဝ်ꩻတွော့ꩻ ‘ယာကုပ်’ နဝ်ꩻ ဒေါ့ꩻချာခန်းနုဲင်းယို“နာꩻနဝ်ꩻလွူးရီးခွေတဲင် နာꩻကအီလꩻဒါႏအမွီႏ ကားကအဝ်ႏ ဖေႏခွေဟုဲင်း။ နဝ်ꩻတဲင်တွော့ꩻ ‘ဧသော’ ဖေႏဒျာႏ ‘ယာကုပ်’ ကရိုꩻနဝ်ꩻ ဖေႏကတိထွူတဲင်၊ ‘ယာကုပ်’ နဝ်ꩻလဲ့ ဖေႏခန်း ‘ဧသော’ အံႏခရာႏယဟန်ႏနဝ်ꩻသွူ။

‘ဣဇာက်’ နဝ်ꩻ မဲဉ်ဖေႏ ‘ဧသော’ ထာꩻဟဝ်အကျိုꩻကေꩻဇူꩻတရာꩻ နဝ်ꩻသွူ။ ကွဲတွော့ꩻ ‘ဣဇာက်’တဖေႏတဝ်းဒွုမ်းတွင်ꩻ ‘ရေဗက္က’ တွမ်ႏ ‘ယာကုပ်’ နောဝ်ꩻ ယောင်ႏဆောင်ႏသွူ‘ဧသော’တဲင်လဲဉ်အံႏခန်းဒျာႏဝွေꩻနောဝ်ꩻသွူ။ ‘ဣဇာက်’ နဝ်ꩻ သက်တန်လဲဉ်းသွူတဲင် မဲ့ထီႏတဝ်းဒွုမ်သွူ။ နဝ်ꩻအချိန်ႏတွင်ꩻ ‘ယာကုပ်’ နောဝ်ꩻ ကꩻ’ဧသော’ ဆဲင်ꩻခွမ်ꩻလာꩻတဲင် ဝွေꩻငွဉ်ꩻတွမ်ႏ စူဖုံႏနဝ်ꩻ ဒို့ꩻခါꩻခန်း ဆိတ်ပီ၊ ဆိတ်ဖျွို့ꩻနဝ်ꩻသွူ။

‘ယာကုပ်’ နဝ်ꩻ လွဉ်ခန်း ‘ဣဇာက်’ ထျꩻတဲင် “ခွေယို ထွာ ‘ဧသော’ တဲင်တွော့ꩻဖေႏနွောင်ꩻဒျာႏထာꩻဟဝ်ကျိုꩻတဲင် နဝ်ꩻမꩻ လွဉ်ဗာႏနုဲင်းယိုသွူ” ဒေါ့ꩻခန်းနုဲင်းနဝ်ꩻသွူ။ ‘ဣဇာက်’ နဝ်ꩻခွုမ်စံꩻခန်းဆိတ်ဖျွို့ꩻထွူတဲင် လꩻပါခွမ်ꩻလာꩻလွီးတဲ့ ထင်းခန်း ‘ဧသော’ တဲင် ဖေႏခန်းထာꩻဟဝ်ကျိုꩻနဝ်ꩻသွူ။

‘ဧသော’ နောဝ်ꩻ ‘ယာကုပ်’ ယို ဝွေꩻပိုတန်တဖြာꩻ ကအီလꩻပဲင်ႏ ခွင်ꩻတွမ်ႏ ဆုꩻဟဝ်ဖုံႏ ထူႏတခွန်ထိုꩻတဲင် လွꩻထီႏခန်းဒျာႏနဝ်ꩻသွူ။ နဝ်ꩻတွော့ꩻ ဝွေꩻသီးဖာ မဉ်ႏသီထိုꩻချိန်ႏနဝ်ꩻ အီႏမာꩻသီ ‘ယာကုပ်’ ကျံႏရွယ်ႏခါꩻ နုဲင်းနဝ်ꩻသွူ။

ကွဲတွော့ꩻ ‘ရေဗက္က’ နဝ်ꩻ သေထိုꩻ ‘ဧသော’ ထာꩻကျံႏတဲင် ဝွေꩻမူႏနောဝ်ꩻ ‘ယာကုပ်’ ယိုအွဉ်ႏအုံငီꩻ ဝွေꩻအမျိုꩻတဲင် ပသာလွေꩻခန်း ခင်ႏလမ်းညာꩻတထွောင်းသွူ။

‘ယာကုပ်’ အုံငီꩻ ‘ရေဗက္က’ အမျိုꩻနဝ်ꩻ ညစွဉ်ႏနေင်ႏပေါင်ꩻလာဆွာꩻသွူ။ အချိန်ႏနဝ်ꩻနဝ်ꩻ ဝွေꩻတောႏလမ်းထွူလဲဉ်းတဲင် လွူးဖွာခန်းပိုခို ( ၁၂ )ဖြာꩻတွမ်ႏ ပိုမူႏ ( ၁ ) ဖြာꩻနဝ်ꩻသွူ။ ဘုရာꩻသျင်ꩻဝွေꩻဖေႏကချံႏသာႏနောဝ်ꩻ မာꩻဖေႏခန်းနောဝ်ꩻသွူ။

‘ခါနန်’ ကို ကအဝ်ႏဒါႏ ဝွေꩻလမ်းယို အုံညာꩻဗာႏအနေင်ႏနီဆီရပ် ချိန်ႏတွင်ꩻ ‘ယာကုပ်’ နဝ်ꩻ ဝွေꩻ မိသားစုꩻ၊ အသွဉ်းအသယ်ႏဖုံႏ၊ တွမ်ႏတိရိစ္ဆာန်ႏဖုံႏ ဖုံႏယို သဲင်ꩻလွဉ်ခန်းဒျာႏနဝ်ꩻသွူ။

‘ယာကုပ်’ နဝ်ꩻ ထင်းဒျာႏ ‘ဧသော’ မဲဉ်မာꩻသီဒွုမ်းကဝွေꩻတဲင် ငမ်းမွေးစွဉ်ႏနဝ်ꩻသွူ။ နဝ်ꩻတွော့ꩻ ဝွေꩻတိရိစ္ဆာန်ႏဖုံႏနဝ်ꩻ ဖေႏခန်း ‘ဧသော’ လက်ဆောင်ႏသွူ။ “နာꩻအသွဉ်းအသယ်ႏကထွာ ‘ယာကုပ်’ နဝ်ꩻ တိရိစ္ဆာန်ႏဖုံႏယိုထွာဖေႏနာꩻသွူ၊ တညတဝ်းမဲ့ ဝွေꩻအီႏလွဉ်ဒျာႏ” ‘ဧသော’ ထျꩻ ကထူႏလွဉ်ဖေႏဒါႏ တိရိစ္ဆာန်ႏ လက်ဆောင်ႏ အသွဉ်ႏအသယ်ႏနဝ်ꩻ ဒေါ့ꩻခန်း ‘ဧသော’ နုဲင်းနဝ်ꩻသွူ။

နဝ်ꩻတွော့ꩻ ‘ဧသော’ နဝ်ꩻ တမာꩻတဝ်းဒွုမ် ‘ယာကုပ်’ အန္တရာယ်ႏသွူ။ နောဝ်ꩻထွူတကာꩻတဝ်း စကထီႏဗာႏဝွေꩻတဲ့ သꩻရေႏငါႏနဝ်ꩻသွူ။ နဝ်ꩻတွော့ꩻ ဝွေꩻသီးတဖူးဝေးဝင်ꩻနီ ချံႏချံႏသာႏသာႏ အုံအဝ်ႏငီꩻခန်းဝင်ꩻ ‘ခါနန်’ ကိုနဝ်ꩻသွူ။ နဝ်ꩻထွူတွော့ꩻ ‘ဣဇာက်’ ထွိုင်ႏသီ ‘ယာကုပ်’တွမ်ႏ ‘ဧသော’ သီးနဝ်ꩻ လွေꩻပလို့ꩻခန်းဒျာႏ ‘ဣဇာက်’ နဝ်ꩻသွူ။ ‘အာဗြဟံ’ တွမ်ႏ ဘုရာꩻသျင်ꩻသီးကမာꩻခါꩻဒါႏ ကတိအဖေႏလူႏလုဲင်ႏနောဝ်ꩻ ဖေႏဆွိုက်ထွာလွေꩻလဲဉ်းဒျာႏ ‘ယာကုပ်’ ထျꩻသွူ။

ကမ္ဘာႏဦꩻကျမ်ꩻ ၂၅:၂၇-၃၅ :၂၉ မꩻ သမ္မာႏလိတ်ကျမ်ꩻ ငဝ်း ခြုဲင်းအာ