၁၅ - ကတိတောႏ ကဖေႏခါꩻဒါႏ ခမ်း

အဆုဲင်ꩻသွတ်ꩻတွော့ꩻ ‘ခါနန်’ ကရိုꩻဒါႏ ကတိတောႏ ကဖေႏခါꩻဒါႏ ခမ်းယို ‘ဣစရေး’ လိုꩻမျိုꩻဖုံႏ အီနွို့သော့ꩻချိန်ႏ တွိုႏလဲဉ်းနဝ်ꩻသွူ။ ဟံႏခင်ႏလမ်းယို ကအဝ်ႏသော့ꩻဒါႏ ဝေင်ႏတောႏနဝ်ꩻ ဟဲ့ꩻ ‘ယေရိခေါ’ တဲင် ကာႏ ကွယ်ႏအီ ဝေင်ꩻအတာႏနဝ်ꩻ အသောင်ယို ရဲးသေꩻခန်း ကခွိုင်ခံꩻဒါႏတံႏတွိုင်ꩻနဝ်ꩻသွူ။ ‘ယောရှု’ နဝ်ꩻ အွဉ်လွစ် လွေꩻခန်း ထောက်လမ်းသား ဝေင်ꩻနဝ်ꩻကိုနဝ်ꩻသွူ။ ဝေင်ꩻနဝ်ꩻကို ‘ရာခပ်’ ကဟဲ့ꩻဒါႏ မဲးဖြဲးမူႏ အဝ်ႏတဖြာꩻနဝ်ꩻ သွူ။ ဝွေꩻမူႏနဝ်ꩻ အွဉ်ႏဒို့ꩻဗဉ်သေꩻခန်း ထောက်လမ်းသားတဲင် အီႏထန်ႏဝေင်ꩻယိုလဲ့ꩻ ကူႏညီႏဖေႏခန်းနဝ်ꩻသွူ။ ဝွေꩻ မူႏကမာꩻဗာႏနုဲင်းယိုနဝ်ꩻ ကွပ်ယွုမ်း ဘုရာꩻသျင်ꩻနဝ်ꩻသွူ။ ‘ဣစရေး’ လိုꩻမျိုꩻဖုံႏ နွို့မာꩻကုဲင် ‘ယေရိခေါ’ ချိန်ႏနောဝ်ꩻ လဲ့ꩻ ‘ရာခပ်’ တွမ်ႏ ဝွေꩻလမ်းသားကားကအဝ်ႏယို အီႏကာႏကွယ်ႏဖေႏဒျာႏ မာꩻသေꩻခန်း ကတိသစ္စာႏနဝ်ꩻသွူ။

‘ဣစရေး’ လိုꩻမျိုꩻဖုံႏ အီႏနွို့သော့ꩻ ကဖေႏခါꩻကတိတောႏ ခမ်းယို ကာႏ ‘ယောဒန်’ ထီခြောင်တွင်ꩻ ဘုရာꩻ ရိုꩻ ‘ယောရှု’ “ထွဉ်ႏလွေꩻရီး ဘာႏသာႏရေꩻ အွဉ်ငါသားဟုဲင်း” မိန်းခန်းနုဲင်းနဝ်ꩻသွူ။ ဘာႏသာႏရေꩻအွဉ်ငါသာႏဖုံႏ ထွိုင်ႏလင်ꩻသော့ꩻ ‘ယောဒန်’ ထီခြောင်ကိုတဲင် ထီကလင်ꩻဒါႏ ဖဲ့ꩻခိုႏနောဝ်ꩻ အဝ်ႏနွိုင်းထိုꩻသွူတွော့ꩻ ‘ဣစရေး’ လိုꩻ မျိုꩻဖုံႏနဝ်ꩻ ဖျက်ကာႏလွေꩻခန်း ဟံႏသဲင်လောင်း ထီခြောင်အွိုးတဖဲ့ꩻနဝ်ꩻသွူ။

လိုꩻဖုံႏကာႏ ‘ယောဒန်’ ထီခြောင် ကထွိုင်ႏထွူ အီႏတွိုက်ꩻခꩻ စွန်ꩻအာတန် ‘ယေရိခေါ’ ဝေင်ꩻယို ဘုရာꩻသျင်ꩻ ထွဉ်ႏဖျင်ဆင်ꩻသေꩻခန်း ‘ယောရှု’ နဝ်ꩻသွူ။ ဘုရာꩻသျင်ꩻနဝ်ꩻ လိုꩻဖုံႏယို ဝွေꩻသီး ဘာႏသာႏရေꩻအွဉ်ငါသာႏ တွမ်ႏစဲ့ꩻသားဖုံႏနဝ်ꩻ အွဉ်ႏပတ်ခန်း ဝေင်ꩻနဝ်ꩻသူနီꩻ ဗွေဗွေနဝ်ꩻသွူ။ နဝ်ꩻအတွင်ꩻ ဘာႏသာႏရေꩻအွဉ်ငါသာႏတွမ်ႏ စဲ့ꩻသားဖုံႏနဝ်ꩻလဲ့ꩻ မာꩻလွေꩻခန်းနုဲင်းနဝ်ꩻအတွိုင်ꩻသွူ။

ဘုရာꩻသျင်ꩻနောဝ်ꩻ နွတ်နီꩻမျောက်တွော့ꩻ ထွဉ်ႏပတ်ခန်း ‘ဣစရေး’ လိုꩻမျိုꩻဖုံႏ နွတ်လဲင်ႏဗွေဗွေနဝ်ꩻသွူ။ နဝ်ꩻဆချာ ဘာႏသာႏရေꩻအွဉ်ငါသားဖုံႏနဝ်ꩻ အူဗာႏဝွေꩻသီးဖုံႏ ‘ခယာ’ တဲင် လိုꩻတွိုင်ꩻယို ခြောဝ်သန်ဗာႏငဝ်းတွော့ꩻ ဝွေꩻသီးတဲ့ꩻ ခြောဝ်သန်ခန်းဒျာႏနဝ်ꩻသွူ။

နဝ်ꩻဆချာ ‘ယေရိခေါ’ ကပေ့ꩻခါꩻဒါႏ ဝေင်ꩻတံႏတွိုင်ꩻယို ပြုဲင်ႏထိုꩻသွူတဲင် ‘ဣစရေး’ လိုꩻမျိုꩻဖုံႏနဝ်ꩻ ဘုရာꩻသျင်ꩻမိန်းအတွိုင်ꩻ မာꩻ ကုဲင်ခန်းဝေင်ꩻနဝ်ꩻကို ကားကအဝ်ႏနဝ်ꩻသွူ။ ဝွေꩻသီးဖုံႏနဝ်ꩻ ဖေႏသွူ ‘ရာခပ်’ တွမ်ႏ ဝွေꩻ မူႏလမ်းသားကားကအဝ်ႏ ထာꩻချံႏသာႏ တဲင် နွို့လွဉ်ခန်း ‘ဣစရေး’ လိုꩻမျိုꩻအနွယ်ႏနဝ်ꩻသွူ။ ‘ခါနန်’ ကိုကအုံဒါႏ လိုꩻအလင်ꩻဖုံႏနောဝ်ꩻ ကထွိုင်ႏဟွိုန် ‘ဣစရေး’ လိုꩻမျိုꩻဖုံႏ တွိုက်ꩻခꩻ ‘ယေရိခေါ’ သတင်ꩻတဲင် အဝ်ႏငမ်းစွဉ်ႏ ‘ဣစရေး’လိုꩻမျိုꩻဖုံႏ လွဉ်တွိုက်ခꩻ ဝွေꩻသီးဖုံႏနဝ်ꩻသွူ။

ဘုရာꩻသျင်ꩻရိုꩻ ‘ဣစရေး’ လိုꩻမျိုꩻဖုံႏ ‘ခါနန်’ ကို ကအဝ်ႏဒါႏ လိုꩻမျိုꩻမုဲင်ꩻငါတဲ့ တွမ်ႏချွုတ်မွိုန်း ငိမ်ꩻချံႏရေꩻ လိတ်ချွုတ် မိန်းခန်းနုဲင်းနဝ်ꩻသွူ။ ကွဲတွောꩻ (ဂိဗောင်) ကရိုꩻဒါႏ ‘ခါနန်’ လိုꩻမျိုꩻတမျိုꩻနဝ်ꩻ ဝွေꩻသီးဖုံႏယို တွမ်ႏ ‘ခါ နန်’ ကညာꩻမွေးငါႏအရပ်သွူ လွဉ်ဒျာႏ ဒေါ့ꩻ လဲဉ်သွူ ‘ယောရှု’ တဲင် ‘ယောရှု’ တွမ်ႏဝွေꩻသီး ဖေႏကချွုတ် ငိမ်ꩻချံႏရေꩻလိတ်ချွုတ် ဒေါ့ꩻခန်း နုဲင်းနဝ်ꩻသွူ။ ‘ယောရှု’ တွမ်ႏ ‘ဣစရေး’ လိုꩻမျိုꩻအွဉ်ငါသား ယဟန်ႏဖုံႏနဝ်ꩻ အီႏမာꩻဗာႏ နုဲင်းမုဲင်ꩻကရိုꩻယို တသျောက်လဝ်းတဝ်း ဘုရာꩻသျင်ꩻ တွမ်ႏ ‘ဂိဗောင်’ လိုꩻမျိုꩻဖုံႏ ချွုတ်ထိုꩻခန်း ငိမ်ꩻချံႏရေꩻလိတ် ချွုတ်နဝ်ꩻသွူ။

ကထွိုင်ႏညသွံနီꩻ ‘ဂိဗောင်’ လိုꩻမျိုꩻယို အမန်ႏတဗာႏ အစကာႏ အဝ်ႏအုံဒျာႏ ‘ခါနန်’ ကရိုꩻယို ထွုမ်ႏထွား ထီႏထိုꩻတဲင် ‘ဂိဗောင်’ လိုꩻမျိုꩻဖုံႏ လဲဉ်အံႏထိုꩻဝွေꩻသီးအလောင်းတွော့ꩻ ဒေါသထန်ႏမွေးမုဲင်း ခန်းထာꩻနဝ်ꩻသွူ။ ကွဲ တွော့ꩻ တွမ်ႏဝွေꩻသီး ကပျုꩻခါꩻဒါႏ ငိမ်ꩻချံႏရေꩻလိတ်ချွုတ်ꩻနဝ်ꩻတဲ့ သဘောႏတူႏခါꩻ တွမ်ႏဘုရာꩻသျင်ꩻတဲင် အဝ်ႏတီႏ ဆွိုက်ကနဝ်ꩻသွူ။ အချိန်ႏကထွိုင်ႏညပသာနဝ်ꩻ ‘ခါနန်’ ကို ‘အာမောရိ’ ကဟဲ့ꩻဒါႏ လိုꩻမျိုꩻတစုခွန်နဝ်ꩻ ‘ဣစရေး’ လိုꩻမျိုꩻတွမ်ႏ ‘ခါနန်’ လိုꩻမျိုꩻဖုံႏ ချွုတ်ခါꩻ ငိမ်ꩻချံႏရေꩻလိတ်ချွုတ်တဲင် ဝွေꩻသီးဖုံႏနောဝ်ꩻ ဝွေꩻသီးစဲ့ꩻတပ်ဖုံႏယို ဖေႏက ထွာ စဲ့ꩻတပ်တန်တတပ် စုꩻပေါင်ꩻသွူတဲင် တွိုက်ꩻခန်း ‘ဂိဗောင်ဝေင်ꩻ’ နဝ်ꩻသွူ။ ‘ဂိဗောင်’ ဖုံႏ နဝ်ꩻလဲ့ ဖေႏကဖေႏ အကူႏညီႏ ပသာခန်းသတင်ꩻ ‘ယောရှု’ ထျꩻနဝ်ꩻသွူ။

နဝ်ꩻတွော့ꩻ ‘ယောရှု’ နောဝ်ꩻ စုꩻပေါင်ꩻသွူ ‘ဣစရေး’ စဲ့ꩻတပ်တဲင် ဖေႏကတွိုႏ ‘ဂိဗောင်’ လိုꩻမျိုꩻထျꩻတွော့ꩻ ထန်ႏလွေꩻခန်း တဟာ လွုမ်းလွုမ်းနဝ်ꩻသွူ။ မွူႏကထွိုင်ႏလေ နွို့တွိုက်ꩻခꩻတခွန်ꩻခန်း ‘အာမောရိ’ စဲ့ꩻတပ်နဝ်ꩻသွူ။

အနီꩻနဝ်ꩻ ‘ဣစရေး’အတွက်တာႏ ဘုရာꩻသျင်ꩻနွိုꩻခန်း တွိုက်ꩻပွယ်ꩻနဝ်ꩻသွူ။ ဝွေꩻနဝ်ꩻ ‘အာမောရိ’လိုꩻမျိုꩻ သꩻဖေႏကတရိမ်တဲင် ဝွေꩻသီးထျ လိုꩻဖုံႏဖေႏကသီအာနဝ်ꩻ မာꩻထဲ့လင်ꩻခန်း ခမ်းရာႏ မို့ꩻလောင်းနဝ်ꩻသွူ။

‘ဣစရေး’ လိုꩻမျိုꩻဖုံႏနောဝ်ꩻ တွိုက်ꩻခꩻအီ ‘အာမောရိ’ လိုꩻမျိုꩻဖုံႏအတွက် အချိန်ႏဖေႏကလွံး ဘုရာꩻသျင်ꩻနဝ်ꩻ အွဉ်နွိုင်းသေꩻခန်း မွူး မို့ꩻလောင်းခင်ႏလမ်းတထွိုင်းနဝ်ꩻသွူ။ အနီꩻနဝ်ꩻတွော့ꩻ ဘုရာꩻသျင်ꩻနဝ်ꩻ ‘ဣစရေး’ လိုꩻမျိုꩻဖုံႏတွက်တာႏ ထူႏဖေႏခန်း အောင်ႏ ပွယ်ꩻတန်နဝ်ꩻသွူ။

ဘုရာꩻသျင်ꩻနဝ်ꩻ တွိုက်ꩻခꩻစဲ့ꩻတပ် ကထွိုင်ႏအီထွူချိန်ႏ ‘ခါနန်’ ကအဝ်ႏဒါႏ လိုꩻအလင်ဖုံႏနဝ်ꩻ အီတွိုက်ꩻ ခꩻရဝ်း ‘ဣစရေး’ လိုꩻမျိုꩻဖုံႏယို စုꩻဗူႏခန်းဝင်ꩻနဝ်ꩻသွူ။ ‘ယောရှု’ တွမ်ႏ ‘ဣစရေး’ လိုꩻမျိုꩻဖုံႏ နောဝ်ꩻ တွိုက်ꩻခꩻထွူ လွေꩻခန်း ဝွေꩻသီးဖုံႏနဝ်ꩻသွူ။

စဲ့ꩻပွယ်ꩻနဝ်ꩻဖုံႏအထွူ ကတိတောႏကဖေႏခါꩻဒါႏခမ်းယို ခွယ်ႏသွူတွော့ꩻ ဖန်းဖေႏခန်း ‘ဣစရေး’ ကို က အဝ်ႏဒါႏ လိုꩻမျိုꩻတစုꩻစီႏနဝ်ꩻသွူ။ နဝ်ꩻဆချာ ဘုရာꩻသျင်ꩻနဝ်ꩻ အွဉ်ႏငိမ်ꩻချံႏခန်း ‘ဣစရေး’ နယ်ႏနိမိတ်တသျောက် လွုမ်းနဝ်ꩻသွူ။

‘ယောရှု’ ကထွိုင်ႏဖြား ‘ဣစရေး’ လိုꩻမျိုꩻဖုံႏ ကားကအဝ်ႏယို စုဗူႏခန်းဝင်ꩻနောဝ်ꩻသွူ။ နောဝ်ꩻဆချာ ‘သိနာ’ ကောင်လောင်းသွူ ‘ဣစရေး’ လိုꩻမျိုꩻဖုံႏနောဝ်ꩻ တွမ်ႏဘုရာꩻသျင်ꩻ ကမာꩻခါꩻ ကတိညာဉ်ႏယို ‘ယောရှု’ ဖေႏသတိတဲင် လိုꩻဖုံႏတဲ့ꩻ သစ္စာႏအောဝ်ႏ ဘုရာꩻ သျင်ꩻတဲင် ပညတ်တောႏကားကအဝ်ႏယို လွိုက်ꩻနာႏလွေꩻဒျာႏ အွဉ်ႏလွꩻခန်းကတိနဝ်ꩻသွူ။

ယောရှု ၁-၂၄ မꩻ သမ္မာႏလိတ်ကျမ်ꩻ ငဝ်းခြုဲင်း