၄၄ - ‘ပေတရု’ တွမ်ႏ ‘ယောဟန်’ သီးကုꩻဖေႏ ထာꩻကွီအံႏသားတဖြာꩻတသီႏ

တွိုႏတနီꩻတွော့ꩻ ‘ပေတရု’ တွမ်ႏ ‘ယောဟန်’ သီးဖုံႏနောဝ်ꩻ လွေꩻလွခန်းဘုရာꩻကေျာင်ꩻနဝ်ꩻသွူ။ အင်္ဂါႏတသန်တဝ်း ထာꩻကွီအံႏသားတဖြာꩻနောဝ်ꩻလဲ့ꩻ အုံလင်ꩻသွူဘုရာꩻကျောင်ꩻအနွို့ꩻပေါက်ꩻတဲင် ကွီအံႏခန်းရွဉ်တောင်ꩻနဝ်ꩻ သွူ။

‘ပေတရု’ နဝ်ꩻ ထွားသွူပါꩻနဝ်ꩻတဲင် “အီႏဖေႏအီနာꩻအတာႏခွေယို ရွဉ်တအဝ်ႏတဝ်း။ ကွဲတဲင်တွော့ꩻ ခွေထျꩻ ကအဝ်ႏယိုအီဖေႏနာꩻ။ နေႏတွမ်ႏ ‘ကိုယ်ႏတောႏယေရှု’ နာႏမတောႏတဲင်ထွိုင်ႏလွေꩻထာꩻ ဟုဲင်း” ဒေါ့ꩻဟွိုန်ခန်းနုဲင်း နဝ်ꩻသွူ။

ဘုရာꩻသျင်ꩻနဝ်ꩻ ပါꩻအင်္ဂါႏတသန်တဝ်းလိုꩻယို တလဲင်ႏချင်ꩻ အွဉ်ႏဟဝ်ထိုꩻမားခန်းဒျာႏနဝ်ꩻသွူ။ ဝွေꩻနောဝ်ꩻ ထွိုင်ႏလွေꩻသွူထာꩻတဲင် ကျူႏတဝဉ်ꩻသွူထာꩻတွော့ꩻ အံႏဖြာႏခန်းဒျာႏဘုရာꩻသျင်ꩻဂွုဏ်ႏကေꩻဇူꩻနဝ်ꩻသွူ။ နဝ်ꩻတွော့ꩻ ဘုရာꩻကျောင်ꩻဝဲင်ꩻကိုကအဝ်ႏဒါႏလိုꩻဖုံႏနဝ်ꩻလဲ့ꩻ အံႏဩအံႏဖြာႏလွခန်းဒျာႏနဝ်ꩻသွူ။

ကွဲတွော့ꩻ အီႏထွားလိုꩻကကုꩻဒါႏတသီႏယိုအတာႏ လိုꩻစွိုꩻတန်နဝ်ꩻ စုꩻဗူႏလွဉ်ခန်းဝင်ꩻနဝ်ꩻသွူ။ ‘ပေတရု’ ရိုꩻဝွေꩻ သီးဖုံႏ “ပါꩻယို ကျမ္မာႏရေꩻဟဝ်လဲဉ်း။ တွမ်ႏအံႏအောꩻအံႏဖြာႏလွမွိုန်းအခရာႏဖုံႏယို။ ကုꩻဖေႏစွဉ်ႏနီဖုံႏကိုယ်ႏ ကိုယ်ႏပဲင်ႏစွမ်ꩻအာတမွေးတဝ်း။ ဘုရာꩻသျင်ꩻဖေႏထာꩻဟဝ်လဲ့ꩻတမွေးတောဝ်းသွူ။ တွမ်ႏဝွေꩻအစွမ်ꩻတဲင် ‘ကိုယ်ႏ တောႏယေရှု’ ကုꩻဖေႏတသီႏဒျာႏနဝ်ꩻသွူ။ ပွိုးနုဲင်းမုဲင်ꩻနဲးတဲင် နီဖုံႏနောဝ်ꩻ ကွပ်ထွာယွုမ်းအံႏ ‘ကိုယ်ႏတောႏယေရှု’ နောဝ်ꩻသွူ။"

“သီဖုံႏနောဝ်ꩻ ‘ရောမ’ ဘုရင်ခံႏ ဖေႏကမာꩻသီ ‘ကိုယ်တောႏယေရှု’ ယို ထွာဒေါ့ꩻရိုꩻလိုꩻဖုံႏတဲင် လိုꩻတွိုင်ꩻအတွက်ကဖေႏဒါႏသက် လိုꩻယို ထွာလွဝင်ꩻထွဉ်ႏမာꩻသီသားဖုံႏနောဝ်ꩻသွူ။ ကွဲတွော့ꩻ ဝွေꩻယို ဘုရာꩻသျင်ꩻနောဝ်ꩻ အဝ်ႏ ထာꩻသီမꩻ ဟဲ့ꩻပြန်ႏသဲင်ꩻချာနဝ်ꩻသွူ။ သီဖုံႏကမာꩻလွေꩻဒါႏယို သီဖုံႏတသေတဝ်းရိုꩻကီလဲ့ꩻ သီဖုံႏဆောင်ႏရွက်ချက်ဖုံႏ ယို နိမိတ်ထွားဟော်ꩻပညာႏအဝ်ႏသား ဟော်ꩻပျောꩻခါꩻအတွိုင်ႏထွာပေါႏလွဉ်နဝ်ꩻသွူ။ ဝွေꩻသီးဖုံႏနဝ်ꩻ ‘မေရှိယ’ ယို ခံႏစာꩻသွူဒုက္ခတွော့ꩻအီႏသီဗာႏ ဒေါ့ꩻဟွိုန်ခါꩻနုဲင်းနဝ်ꩻသွူ။ ဘုရာꩻသျင်ꩻနောဝ်ꩻဖေႏကထွာအနယ်ꩻနဝ်ꩻအတွိုင်ꩻ မာꩻ လွေꩻခန်းဒျာႏ နဝ်ꩻသွူ။ နဝ်ꩻတွော့ꩻ လꩻသွူသံႏဝွေႏဂတဲင် လှည့်လွဉ်သွော့ꩻဘုရာꩻသျင်ꩻထျနဝ်ꩻသွူ။ တွိုႏနဝ်ꩻမꩻဝွေꩻနဝ်ꩻ သီဖုံႏအပဲစ်ယို မဲ့ꩻအီႏ ပသေဖေႏ” မိန်းခန်းနုဲင်းနဝ်ꩻသွူ။

ကအဝ်ႏဒါႏကျောင်ꩻအွဉ်ငါသားဖုံႏ ကထွိုင်ႏဟွိုန် ‘ပေတရု’ တွမ်ႏ ‘ယောဟန်’ သီးဖုံႏငေါဝ်းတဲင် ဒေါသ ထန်ႏသန်ခန်းဒျာႏထာꩻနဝ်ꩻသွူ။ နဝ်ꩻတွော့ꩻဝွေꩻသီးဖုံႏနဝ်ꩻ ဆွမ်ꩻသွူ ‘ပေတရု’ တွမ်ႏ ‘ယောဟန်’ တဲင် သော့ꩻခန်း ထောင်ႏကိုနဝ်ꩻသွူ။ ကွဲတွော့ꩻ ‘ပေတရု’ ကဒေါ့ꩻခါꩻဒါႏဖုံႏယို လိုꩻအမျာꩻဖုံႏနောဝ်ꩻ ယွုမ်းအံႏလွတဲင် လိုꩻက ယွုမ်း ‘ကိုယ်ႏတောႏယေရှု’ တွိုပွာꩻခန်းလိုꩻငတ်ရေင်ရပ်နဝ်ꩻသွူ။

ဆုဲင်ꩻတနီꩻတွော့ꩻ ‘ယုဒ’ လိုꩻမျိုꩻအွဉ်ငါသားဖုံႏနဝ်ꩻ ‘ပေတရု’ တွမ်ႏ ‘ယောဟန်’ ယို ဟဲ့ꩻလွေꩻခန်းသာႏသ နာႏရေꩻဆဲင်ႏရာꩻမဟာႏနာႏယကတန်တွမ်ႏ အွဉ်ငါသားအလင်ဖုံႏထျꩻနဝ်ꩻသွူ။ ဝွေꩻသီးဖုံႏနောဝ်ꩻ အစကရီးအင်္ဂါႏတသန် တဝ်း ကထွာဒါႏလိုꩻယိုလဲ့ꩻ ဟဲ့ꩻလွေꩻပါ ခန်းနဝ်ꩻသွူ။ ဝွေꩻသီးဖုံႏနဝ်ꩻ ရီခန်း ‘ပေတရု’ တွမ်ႏ ‘ယောဟန်’ “လိုꩻအင်္ဂါႏ တပြဲ့ꩻစွုမ်ႏတဝ်းယို နေးတွမ်ႏအစွန်ꩻနုဲင်းမုဲင်ꩻကုꩻလွဉ်ဖေႏတသီႏဟောင်း” နုဲင်းနဝ်ꩻသွူ။

‘ပေတရု’ နဝ်ꩻ “သီဖုံႏဖဲ့ꩻငါကအုံနွောင်းဒါႏလိုꩻယို ‘မေရှိယ’ ကထွာဒါႏတွမ်ႏ ‘ကိုယ်ႏတောႏယေရှု’ အစွန်ꩻ ထွာကကုꩻခံႏဗာႏလိုꩻနဝ်ꩻသွူ။ သီဖုံႏနဝ်ꩻ ‘ကိုယ်ႏတောႏယေရှု’ ယိုဒင်ႏသွူစူယာꩻကပ်ꩻထွန်ႏလောင်း မာꩻသီထိုꩻစွဉ်ႏ လဲ့ꩻ ဘုရာꩻသျင်ꩻနဝ်ꩻ အွဉ်ႏမွန်ထွိုင်ႏပြန်ႏတချာဝွေꩻနဝ်ꩻသွူ။ သီဖုံႏနောဝ်ꩻ ညင်ꩻထိုꩻစွဉ်ႏဝွေꩻရိုꩻကီလဲ့ꩻ အဝ်ႏ ‘ကိုယ်ႏ တောႏယေရှု’ ထျꩻတဆွိုက်လွိုကယ်ႏဒင်ႏဖေႏနွောင်ꩻတဲင် အနယ်ꩻအလင်တအဝ်ႏတဝ်း” ဖြေႏပြန်ႏခွိုန်ꩻချာခန်းနုဲင်း နဝ်ꩻသွူ။

အွဉ်ငါသားအာဖုံႏနောဝ်ꩻ ‘ပေတရု’ တွမ်ႏ ‘ယောဟန်’ သီးဖုံႏ ရုဲင်းရုဲင်းဟန်ဟန်ကဒေါ့ꩻဟွိုန်လွဉ်ဒါႏယို အံႏအောႏလွꩻဝင်ꩻနဝ်ꩻသွူ။ ဝွေꩻသီးဖုံႏနောဝ်ꩻ ကထွိုင်ႏသေ ‘ပေတရု’ တွမ်ႏ ‘ယောဟန်’ သီးယို ဒါႏတဝ်းပညာႏ ထွာ ဒျာႏသာႏမန်ႏလိုꩻဖုံႏ သေလွꩻသွူတဲင် လိုꩻဖုံႏအုံ တွမ်ႏ ‘ကိုယ်ႏတောႏယေရှု’ ယိုလဲ့သေလွꩻခန်းဒျာႏနောဝ်ꩻသွူ။ နဝ်ꩻ တွော့ꩻဝွေꩻသီးဖုံႏယို ‘ပေတရု’ တွမ်ႏ ‘ယောဟန်’ ယို “သီဖုံႏမဉ်ႏဖန်းဖြယ်ယင်းပါꩻယို အကျောင်ꩻနောဝ်ꩻ မဲ့ꩻအီႏဖေႏ ဗာႏသီဖုံႏအပဲစ်တန်တန်” ဒေါ့ꩻဟွိုန်သွူနုဲင်းနဝ်ꩻတဲင် လွေꩻခွင်ꩻဖေးခန်း ‘ပေတရု’ တွမ်ႏ ‘ယောဟန်’ သီးနဝ်ꩻသွူ။

တမန်တောႏ ၃:၁-၄:၂၂ မꩻ သမ္မာႏလိတ်ကျမ်ꩻ ငဝ်းခြုဲင်း