၃၇ - ‘ကိုယ်ႏတောႏယေရှု’ သီထွူထွဉ်ႏမွန်တချာ ‘လာဇရု’

‘လာဇရု’ ကဟဲ့ꩻဒါႏလိုꩻတဖြာꩻအဝ်ꩻတဲင် ဝွေꩻထျꩻနောဝ်ꩻ ‘မာရိ’ တွမ်ႏ ‘မာသ’ ကဟဲ့ꩻဒါႏဖူႏအဝေးမူႏဝင်ꩻနီ အဝ်ႏသွူ။ ဝွေꩻသီးဖုံႏနဝ်ꩻတွမ်ႏ ‘ကိုယ်ႏတောႏယေရှု’ ယိုလဲ့ꩻ ထွာဖစ်မွိုက်မွေးဝင်ꩻမိတ်ဆွေႏဖုံႏနဝ်ꩻသွူ။ တနီꩻတွော့ꩻ လိုꩻတဖြာꩻနောဝ်ꩻလွဉ်ဒေါ့ꩻ ‘ကိုယ်ႏတောႏယေရှု’ ‘လူဇရု’ ဆာတဝ်ထာꩻအကျောင်ꩻ ဒေါ့ꩻနယ်ခန်းနုဲင်းနဝ်ꩻသွူ။ ‘ကိုယ်ႏတောႏယေရှု’ ကထွိုင်ႏဟွိုန်နုဲင်းနဝ်ꩻတဲင် “ထာꩻဆာယိုအီထွဉ်ႏထွာကေႏညိုႏလွို” မိန်းခန်းနုဲင်းနဝ်ꩻသွူ။

‘ကိုယ်ႏတောႏယေရှု’ နဝ်ꩻ ရက်မွေးငါႏ ‘လာဇရု’ နဝ်ꩻသွူ။ ဝွေꩻနဝ်ꩻ လွေꩻထိုꩻတဝ်းတလဲင်ႏချင်ꩻတဲင် အုံ ပွေါးခန်းနီနီꩻရပ်နဝ်ꩻသွူ။ နဝ်ꩻနီနီꩻကထွိုင်ႏထွူထိုꩻတွော့ꩻ ‘ကိုယ်ႏတောႏယေရှု’ နဝ်ꩻ ဝွေꩻတပဲ့ꩻတောႏဖုံႏယို “ဖေႏ ကသဲင်ꩻချာ ‘ယုဒ’ ခမ်းထျꩻ” ကထွိုင်ႏမိန်းနုဲင်း နဝ်ꩻတဲင် တပဲ့ꩻတောႏဖုံႏနဝ်ꩻ “တညတဝ်းဒွုမ်းခင်ႏလမ်းယိုကိုလိုꩻ ဖုံႏနဝ်ꩻ မဲဉ်မာꩻသီ ‘ကိုယ်ႏတောႏ’ မွေးတဝ်းနဲ့ꩻ” သျောက်ဒင်ႏခွိုင်ꩻချာခန်းနုဲင်းနဝ်ꩻသွူ။ နဝ်ꩻတွော့ꩻ ‘ကိုယ်ႏတောႏ 'ယေရှု’ “နီသွဉ်း သီးဖုံႏမိတ်ဆွေႏ ‘လာဇရု’ နဝ်ꩻ ထွာဗေင်ႏအွီႏထာꩻတဲင် ခွေနဝ်ꩻတမာထွိုင်ႏဗာႏဝွေꩻ” မိန်းချာခန်း နုဲင်းနဝ်ꩻသွူ။

လွေꩻလွဉ်ꩻ ‘ကိုယ်ႏတောႏယေရှု’ ဆချာသားဖုံႏနဝ်ꩻ “ကိုယ်ႏတောႏ လာဇရုယိုမိဉ်ႏထွာ ဗေင်ႏအွီႏထာꩻအ မန်ႏနဝ်ꩻ မဲ့ꩻဝွေꩻအီႏအုံဟဝ်ချာဒျာႏ” သျောက်ပြန်ႏခါꩻခန်းနုဲင်းနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ မိန်း ခန်းဝွေꩻသီးဖုံႏ “လာဇရုယိုထွာသီထွူလဲဉ်းနဝ်ꩻသွူ။ ခွေတအဝ်ႏတဝ်းခင်ႏလမ်းယိုကိုနဝ်ꩻ ခွေအတွက်ယံမွေးငါႏ နဝ်ꩻသွူ။နုဲင်းနဝ်ꩻမꩻ ထွာသီဖုံႏအီယွုမ်းလွခွေ” မိန်းစွဉ်ႏစွော့ꩻ ခန်းနုဲင်းနဝ်ꩻသွူ။

‘ကိုယ်ႏတောႏယေရှု’ ကထွိုင်ႏတွိုႏ ‘လာဇရု’ လွူးဇာတိဟံႏအချိန်ႏနဝ်ꩻ ‘လာဇရု’ သီထိုꩻလဲဉ်းတဲင် ညထိုꩻ လဲဉ်းလစ်နီꩻနဝ်ꩻသွူ။ ‘မာသ’ နဝ်ꩻ အီခွဲတွမ်ႏ ‘ကိုယ်ႏတောႏယေရှု’ တာႏထန်ႏလွဉ်သွူတင် “ကိုယ်ႏတောႏ၊ ကိုယ်ႏ တောႏမဉ်ႏအဝ်ႏခင်ႏလမ်းယိုကိုနဝ်ꩻ ခွေသွဉ်းမူႏအဝေးယိုအီႏသီထိုꩻဗာႏတမွေးတဝ်း။ ကွဲတွော့ꩻ ဘုရာꩻသျင်ꩻနဝ်ꩻ ကိုယ်တောႏကကွီဒါႏကားကအဝ်ႏယို မဲ့ꩻအီဖေႏဒျာႏကရိုꩻယို ခွေသွဉ်းမူႏယွုမ်းဒျာႏ” သျောက်ဒင်ႏခန်းနုဲင်းနဝ်ꩻသွူ။

‘ကိုယ်ႏတောႏယေရှု’ နဝ်ꩻ “ခွေယိုမွန်ပြန်ႏတချာတွမ်ႏ ‘အသက်’ လဲ့ꩻထွာသွူ။ လိုꩻကယွုမ်းခွေနဝ်ꩻ ဗꩻ တွိုႏစွဉ်ႏသီထွူတဲ့ꩻအီမွန်နေကဒွုမ်းနဝ်ꩻသွူ။ နာꩻနဝ်ꩻ အခရာႏယိုဖုံႏယွုမ်းနေဟောင်း” မိန်းပြန်ႏခန်းနုဲင်းနဝ်ꩻသွူ။ နဝ်ꩻအချိန်ႏတွင်ꩻ ‘မာသ’ နဝ်ꩻ “အော်၊ ဗွေႏကိုယ်ႏတောႏနဝ်ꩻ ထွာမေရှိယတွော့ꩻ ထွာဘုရာꩻသီးပိုခိုတောႏယိုလဲ့ꩻ ယွုမ်းဒျား” သျောက်ပြန်ႏချာခန်းနုဲင်းနဝ်ꩻသွူ။

နဝ်ꩻဆချာ ‘မာရိ’ ကထွိုင်ႏတွိုႏလွဉ် ဝꩻလင်ꩻခန်း ‘ကိုယ်ႏတောႏယေရှု’ ခင်ႏထျꩻတဲင် “ကိုယ်ႏတောႏ၊ ကိုယ်ႏ တောႏမဉ်ႏအဝ်ႏခင်ႏလမ်းယိုကိုနောဝ်ꩻ ခွေသွဉ်းဝေးယို အီသီဗာႏတမွေးတဝ်း” သျောက်လဝ်းခန်းနုဲင်းနဝ်ꩻသွူ။ ‘ကိုယ်ႏတောႏယေရှု’ နဝ်ꩻ ရီခန်းဝွေꩻသီးဖုံႏ “သီဖုံႏအွဉ်ႏသေꩻ ‘လာဇရု’ မုဲင်ꩻကိုဟောင်း” ရီခန်းနုဲင်း နဝ်ꩻသွူ။ ဝွေꩻ သီးဖုံႏသျောက်ခါꩻ ‘ကိုယ်ႏတောႏယေရှု’ “အွဉ်ႏသော့ꩻသေꩻ အုတ်ဂူႏကိုနဝ်ꩻသွူ။ လွဉ်ထွားသွော့ꩻဟုဲင်း” နုဲင်းနဝ်ꩻ သွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ သꩻပေႏသွူတဲင် ငွိုးခန်းဒျာႏထာꩻနဝ်ꩻသွူ။

သင်္ချိုင်ႏကရိုꩻနဝ်ꩻ အနွို့ꩻပေါက်ꩻယိုပေ့ꩻသေꩻတွမ်ႏလုံးတူႏ ထွာဒျာႏကြွို့ꩻလုံးဂူႏတဖြုံႏနဝ်ꩻသွူ။ ‘ကိုယ်ႏတောႏ ယေရှု’ ကထွိုင်ႏတွိုႏလွဉ် လုံးဂူႏထျꩻအချိန်ႏတွင်ꩻ မိန်းခန်းလိုꩻအလင်ဖုံႏ “ဖုဲင်းထိုꩻလုံးတူႏယိုဟုဲင်း” နုဲင်းနဝ်ꩻသွူ။ ကွဲတွော့ꩻ ‘မာသ’ နဝ်ꩻ သျောက်ခါꩻခန်း “ဝွေꩻယိုကသီနဝ်ꩻ လꩻလဲဉ်းလစ်နီꩻရပ်တဲင် မဲ့ꩻအလွီးကုဲင်ထန်ႏ လွဉ်” နုဲင်း နဝ်ꩻသွူ။

‘ကိုယ်ႏတောႏယေရှု’ နဝ်ꩻ “ထာꩻယွုမ်းအံႏခွေမဉ်ႏအဝ်ႏ ဘုရာꩻ သျင်ꩻသီးတန်ႏခိုꩻတောႏယိုမဲ့ꩻအီႏထီႏလွဉ်ဗာႏ ခွေဒေါ့ꩻခါꩻမွေးတဝ်းဟောင်း” မိန်းခန်းနုဲင်းနဝ်ꩻသွူ။ တွိုႏနဝ်ꩻတွော့ꩻ ဝွေꩻသီးဖုံႏနဝ်ꩻ နွန်ႏဖုဲင်းထိုꩻလွခန်းလုံးတူႏ နောဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻ အွော့ꩻထွားထင်ႏသွူမို့ꩻ တဲင် “ဖာဘုရာꩻသျင်ꩻ ပိုခိုကသျောက်ခါꩻဒါႏ နာႏဖေႏတဲင်တွော့ꩻ ကေꩻဇူꩻတင်ႏငါႏနဝ်ꩻသွူ။ ပိုခိုတောႏသီးငဝ်းဖုံႏယို ဖာဘုရာꩻသျင်ꩻ နာႏတသေႏဒျာႏယိုလဲ့ꩻ သေ ဒျာႏသွူ။ ကွဲတွော့ꩻခင်ႏလမ်းယိုကို ကအုံနွိုင်းဒါႏလိုꩻဖုံႏယိုယံကကယ်ႏဒင်ႏနွောင်ꩻအတာႏ ထွာဒေါ့ꩻရိုꩻသျောက်ခါꩻ ဗာႏငဝ်းယိုသွူ။ နုဲင်းနဝ်ꩻမꩻ ပိုခိုတောႏယို ဖာဘုရာꩻ သျင်ꩻအွဉ်ႏလွစ်လွဉ်ကရိုꩻနဝ်ꩻ ဝွေꩻသီးဖုံႏ အီထွာယွုမ်းအံႏလွ” ဆုတောင်ꩻသျောက်ခါꩻခန်းနုဲင်းနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ နဝ်ꩻ “လာဇရု ထန်ႏလွဉ်ဟုဲင်း” ခြဝ်ငဝ်း ဟဲ့ꩻခန်းနုဲင်းနဝ်ꩻသွူ။

တွိုႏနဝ်ꩻတွော့ꩻ ‘လာဇရု’ နဝ်ꩻ တွမ်ႏခွမ်ꩻလာꩻဖုံႏစွိုင်ပတ်ခါꩻဒါႏအတွိုင်ꩻ အဝ်ႏသင်္ချိုင်ႏဂူႏကို ထန်ႏလွဉ်ခန်း နဝ်ꩻသွူ။ ‘ကိုယ်ႏတောႏယေရှု’ နဝ်ꩻ ဒေါ့ꩻခန်းလိုꩻစားနဝ်ꩻဖုံႏ “ဖုဲင်းထိုꩻဖေႏ ခွမ်ꩻလာꩻတခဝ်ꩻဖုံႏတွော့ꩻ ဖေႏသွော့ꩻဝွေꩻ လွစ်ထန်ႏခွင်ꩻဟုဲင်း” နုဲင်းယိုသွူ။ ‘ယုဒ’ လိုꩻမျိုꩻကဲဉ်းအာအာနဝ်ꩻ ကွပ်ထူꩻဆန်ꩻအံႏယောꩻခရာႏအထွာအ ကုဲင်ယို တဲင် ယွုမ်းလွဉ်လွခန်း ‘ကိုယ်ႏတောႏယေရှု’ နဝ်ꩻသွူ။

ကွဲတဲင်တွော့ꩻ ‘ယုဒ’ လိုꩻမျိုꩻဖုံႏတွမ်ႏ ဘာႏသာႏရေꩻအွဉ်ငါသားဖုံႏ နဝ်ꩻ နာႏလွိုႏလွတဝ်း ‘ကိုယ်ႏတောႏ ယေရှု’ တဲင် အီႏမာꩻသီ ‘ကိုယ်ႏတောႏယေရှု’ တွမ်ႏ ‘လာဇရု’ အတာႏ ပူꩻပေါင်ꩻ ကျံႏစယ်ႏငီꩻခန်းလွဝင်ꩻနဝ်ꩻသွူ။

သျင်ႏယောဟန်ခရစ်နွို့ꩻ ၁၁:၁-၄၆ မꩻ သမ္မာႏလိတ်ကျမ်ꩻ ငဝ်းခြုဲင်း