၅ - ငေါ၀်းကတိ ပိုꩻခို

‘အာဗြံ’ တွမ်ႏ ‘စာရဲ’ သီးယိုတွိုႏ ‘ခါနန်’ ညလဲဉ်းဆီနေင်ႏတဲ့ ဝွေꩻသီးဖုံႏ ပိုခိုပိုမူႏတအဝ်ႏတဝ်းသွူ။ တွိုႏနဝ်ꩻတွော့ꩻ ‘အာဗြံ’ မာကထွာဒါႏ စာရဲ နဝ်ꩻတဲ့ “ခွေဖေႏကလွူးပိုနဝ်ꩻ ဘုရာꩻသျင်ꩻ တခွင်ꩻပျုꩻတဝ်းဒွုမ်း နဝ်ꩻသွူ။ ခွေအီလွူးပိုတဲ့ သက်တန်လဲဉ်းဒျာႏနဝ်ꩻသွူ။ ပါꩻယိုနဝ်ꩻ ထွာခွေ အသွဉ်းအသယ်ႏ ‘ဟာဂရု’ သွူ။ ခွေအတာႏ ဖေႏကလွူးဖေႏပို နာꩻတောႏလမ်းအုံငီꩻ သွော့ꩻဟုဲင်း” ဒေါ့ꩻရိုꩻခန်း ‘အာဗြံ’ နုဲင်းနဝ်ꩻသွူ။

နဝ်ꩻတွော့ꩻ ‘အာဗြံ’ နဝ်ꩻ တောႏလမ်းခန်း ‘ဟာဂရု’ သွူ။ ‘ဟာဂရု’ နဝ်ꩻ လွူးခန်းဒျာႏပိုခိုတဖြာꩻတဲင် ‘အာဗြံ’ ဟဲ့ꩻခန်း ‘ဣရှမေလ’ နဝ်ꩻသွူ။ နဝ်ꩻတွော့ꩻ ‘စာရဲ’ နဝ်ꩻ နာႏလွိုႏတဝ်း ‘ဟာဂရု’ နဝ်ꩻသွူ။ ‘ဣရှမေလ’ သက်ထွိုင်ႏလꩻတဆီသွံနေင်ႏချိန်ႏနဝ်ꩻ ဘုရာꩻသျင်ꩻ ဒေါ့ꩻဆွိုက်ယင်း ‘အာဗြံ’ငဝ်းနဝ်ꩻသွူ။

ဘုရာꩻသျင်ꩻနဝ်ꩻ “ခွေယို ထွာဒျာႏဘုရာꩻသျင်ꩻမျတ်ꩻတဲင် ခွေတွမ်ႏနာꩻ မာꩻအဖေႏအထူႏကတိတဗာႏ” မိန်းရိုꩻစားနဝ်ꩻသွူ။ နဝ်ꩻအချိန်ႏ ‘အာဗြံ’ နဝ်ꩻ အဝ်ႏဟံႏလောင်းရိုꩻသေႏခန်းဒျာႏ နဝ်ꩻသွူ။ ဘုရာꩻ သျင်ꩻနဝ်ꩻ “နာꩻယို ထွာနုဲင်ႏငံႏအာဖုံႏ ‘ဖာ’ သွူ။ ခွေနဝ်ꩻ နာꩻတွမ်ႏနာꩻမျိုꩻအဆွိုက်ဆွိုက်ဖုံႏယို အီႏဖေႏပဲင်ႏ ‘ခါနန်’ ဟံႏတဲင် ခွေနဝ်ꩻ အီႏထွာထိုꩻ သီဖုံႏ ထာꩻဝရဘုရာꩻသျင်ꩻသွူ။ နာꩻမိသားစုꩻကို က အဝ်ႏဒါႏလိုꩻခိုꩻပေႏတွိုင်ႏဖုံႏယို မာꩻစွယ်ꩻအနာပီ မင်္ဂလာႏဟုဲင်း” မိန်းဒေါ့ꩻဟွိုန်ခန်း ‘အာဗြံ’ နုဲင်းနဝ်ꩻသွူ။

“နာꩻမာကထွာဒါႏ ‘စာရဲ’ နဝ်ꩻ မဲ့အီႏလွူးလွဉ် ပိုခိုတဖြာꩻတဲင် ဝွေꩻ နဝ်ꩻ မဲ့ထွာတွမ်ႏကတိသစ္စာႏတောႏ စပ်ဆွိုင်ꩻပိုခိုနဝ်ꩻသွူ။ ဝွေꩻယို ဟဲ့ꩻသွော့ꩻအမဉ်ꩻ ‘ဣဇာက်’ နုဲင်းနောဝ်ꩻသွူ။ ခွေတွမ်ႏဝွေꩻ အီႏမာꩻကတိအဖေႏအထူႏတဲင် ဝွေꩻယို အီႏထွာလွဉ် တန်မွေးငါꩻ လိုꩻမျိုꩻစုꩻတစုꩻသွူ။ ‘ဣရှမေလ’ ယိုတဲ့ ခွေအီႏမာꩻဖေႏ တန်မွေးငါႏ လိုꩻမျိုꩻစုꩻတစုꩻသွူ၊ ကွဲတွော့ꩻခွေနောဝ်ꩻ ထွာပျုခါꩻကွို့ ငဝ်းကတိ တွမ်ႏ ‘ဣဇာက်’ လွုမ်ꩻသွူ။ နဝ်ꩻထွူတဲင် ဘုရာꩻသျင်ꩻနဝ်ꩻ ‘အာဗြံ’ မဉ်ꩻယို ပြောင်ꩻခန်း ‘အာဗြဟံ’ နဝ်ꩻသွူ။ အဓိပ္ပါယ်ႏနဝ်ꩻ ထွာလိုꩻအာသီးဖုံႏ ‘ဖာ’ နဝ်ꩻသွူ။ နဝ်ꩻထွူတွော့ꩻဘုရာꩻသျင်ꩻနဝ်ꩻ ‘စာရဲ’ မဉ်ꩻယို အဓိပ္ပါယ်ႏလꩻ မင်ꩻသမီꩻတဲင် ပြောင်ꩻခန်း ‘စာရာ’ နဝ်ꩻသွူ။

အနီꩻနဝ်ꩻတွင်ꩻ ‘အာဗြဟံ’ နဝ်ꩻ ဝွေꩻအိန်ႏထောင်ႏကိုကအဝ်ႏဒါႏ လိုꩻခိုပေႏမန်ႏမျဖုံႏယို မာꩻထိုꩻစွဉ်ႏ စွယ်ꩻအနာပီ မင်္ဂလာႏသွူ။ ထွိုင်ႏညလွဉ်တနေင်ႏ ‘အာဗြဟံ’ သက်လꩻတရျာꩻတွမ်ႏ ‘စာရာ’ သက်လꩻကွတ်ဆီနဝ်ꩻမꩻ ‘စာရာ’ လꩻလွဉ်ပိုခိုတဖြာꩻနဝ်ꩻသွူ။ ပိုခိုနဝ်ꩻ နဝ်ꩻ ဘုရာꩻသျင်ꩻ ဒေါ့ꩻအတွိုင်ႏဟဲ့ခန်း ‘ဣဇာက်’ နဝ်ꩻသွူ။

‘ဣဇာက်’ အရွယ်ႏကထွိုင်ႏလꩻ ဘုရာꩻသျင်ꩻနေဝ်ꩻ စံꩻ ‘အာဗြဟံ’ ထာꩻယွုမ်းအံႏအနေႏတဲင် “ဟဲ့သွူ တဖြာꩻဝွေꩻကထွာဒါႏ နာꩻပို ‘ဣဇာက်’ ယို ခွေတွက်တာႏ ပူႏဇောႏလူႏသွော့ꩻ သက်ဟုဲင်း” ဒေါ့ꩻ လဝ်းနုဲင်းနဝ်ꩻသွူ။ ‘အာဗြံ’ နဝ်ꩻလွိုက်ꩻနာႏယင်းသွူ ဘုရာꩻသျင်ꩻအမိန်းတောႏတဲင် အီပူႏဇောႏဝွေꩻပိုအတာႏ ဖဲင်ဆင်ꩻခန်းဒျာႏနဝ်ꩻသွူ။

‘အာဗြဟံ’ တွမ်ႏ ‘ဣဇာက်’ သီး သျောက်ထောင်လွဉ် လူႏပူႏဇောႏသက်ခင်ႏလမ်းတွင်ꩻ ‘ဣဇာက်’ နဝ်ꩻ “ဖာ၊ ပူႏဇောႏလူႏအီသက်တာႏ နီသေင်ႏဖုံႏအဝ်ႏသွူ၊ ကွဲႏတွော့ꩻ ‘ဗဲ့ꩻ’ နဝ်ꩻကာꩻ အဝ်ႏမုဲင်ꩻ” ရီ နုဲင်းနဝ်ꩻတဲင်၊ ‘အာဗြဟံ’နဝ်ꩻ “လူႏပူႏဇောႏတာႏ မဲ့ꩻဘုရာꩻသျင်ꩻ ဖေႏဒျာႏပိုခို” ဖြေႏပြန်ႏချာနုဲင်းနဝ်ꩻသွူ။

ကထွိုင်ႏတွိုႏ လူႏပူႏဇောႏသက်ခင်ႏလမ်းတဲင် ‘အာဗြဟံ’ နောဝ်ꩻ ဝွေꩻပို ‘ဣဇာက်’ ယို စွိုင်ထွူတဖွီတွော့ꩻ အွဉ်ႏဗေင်ႏတလွှာခန်း လူႏပူႏဇောႏသက်ခင်ႏလမ်းနဝ်ꩻသွူ။ ထွိုင်ႏအီႏမာꩻသီ ဝွေꩻပိုအချိန်ႏတွော့ꩻ ဘုရာꩻသျင်ꩻနဝ်ꩻ “အုံနွိုင်းဟုဲင်း၊ ပါꩻပေႏဖေႏကဆာနဝ်ꩻ တွမ်ႏမာꩻမွိုန်း၊ ခွေကဖေႏခါꩻဒါႏ တဖြာꩻဝွေꩻပိုယိုမိဉ်ႏတဲ့ စွန်ꩻထိုꩻနွောင်ꩻနဝ်ꩻနာꩻငမ်းရိုႏသေႏခွေနဝ်ꩻ ယိုခါခွေသေဗာႏသွူ”။ မိန်းခန်းနုဲင်းနဝ်ꩻသွူ။

အဗော့ꩻအဗꩻကအဝ်ႏဒါႏ ‘အာဗြဟံ’ ထီႏခန်း ဆိတ်ကောင်တဗာႏ အဝ်ႏခံသေင်ႏပုံႏသွူ။ ဘုရာꩻသျင်ꩻနဝ်ꩻ ‘ဣ ဇာက်’ ကိုယ်ႏစာႏပူႏဇောႏလူႏသက်တာႏ ပျုခါꩻဖေႏ အကူႏအညီႏတဲင် ‘အာဗြဟံ’ နဝ်ꩻတွမ်ႏသꩻရေꩻရေꩻဆိတ်ကောင်ယို ပူႏဇောႏလူႏခန်းသက်နဝ်ꩻသွူ။

နဝ်ꩻဆချာ ဘုရာꩻသျင်ꩻနဝ်ꩻ ‘အာဗြဟံ’ ယို “နာꩻနဝ်ꩻ နာꩻပိုတဖြာꩻဝွေꩻအပါꩻ နာꩻအီဖေႏ ခွေနဝ်ꩻ ဝန်ႏတတန်တဝ်း၊ နဝ်ꩻတွော့ꩻခွေနဝ်ꩻ အီႏဖေႏနာꩻထာꩻဟဝ် ကတိကဖေႏခါꩻဒါႏအတွိုင်ꩻ၊ နာꩻဆုဲင်ꩻချာသားဖုံႏတဲ့ အီႏပွာꩻအာကယ်ထဲင်း ဆာႏမို့ꩻလောင်း၊ နာꩻနာႏခံႏခွေ ငဝ်းအတွက်တဲင် ကမ္ဘာႏလောင်း ကအဝ်ႏဒါႏမိသားစုꩻဖုံႏယို အဝ်ႏနာꩻမိသာႏစုꩻမꩻ တဆွိုက် ခွေအီဖေႏထာꩻဟဝ်” မိန်းရိုꩻစားနဝ်ꩻသွူ။

ကမ္ဘာႏဦꩻကျမ်ꩻ ၁၆-၂၂ မꩻ သမ္မာႏလိတ်ကျမ်ꩻ ငဝ်းခြုဲင်းအာ